Read Quechua Cuzco Bible 1988 DEUTERONOMIO 4 Bible Online

DEUTERONOMIO 4 - Quechua Cuzco Bible 1988 bible

DEUTERONOMIO 4

¹Chhaynaqa, Israel runakuna, uyariychis, qankunamanmi yachachiykichis kamachikuy simikunatapas chaninchaykunatapas, chaykunata hunt'aspan kawsankichis, hinallataq machulaykichispa Señor Diosninpa qonasuykichis hallp'atapas hap'ikapunkichis.

²Aman yapankichischu kamachisqayman, amallataq qechunkichispaschu, aswanpas kamachisqayman hina Apu Señor Diosninchispa kamachikuy siminkunata hunt'aychis.

³Qankunaqa rikurqankichismi Señor Diospa Baal-peorpi ruwasqanta, Peor nisqa orqopin qankuna ukhumanta Baal ídolo llapan yupaychaqkunata ch'usaqyachirqan.

⁴Qankunataq ichaqa llapaykichis Apu Señor Diosninchispi hunt'aq sayaspaykichis kawsashankichisraq.

⁵Qhawariychis, Apu Señor Diosniypa kamachiwasqanta hinan kamachikuy simikunatapas chaninchaykunatapas yachachirqaykichis, hap'ikapunaykichis suyupi hunt'anaykichispaq.

⁶Chay hinaqa chaykunata hunt'aychis kasuychistaq, ahinapin llaqtakuna yachanqaku yachaysapa yuyaysapa kasqaykichista. Hinan chay kamachikuykunata uyarispanku ninqaku: Cheqaqtapunin kay hatun llaqtaqa yachaysapa yuyaysapataq kanku, nispa.

⁷Ahinaqa, ¿mayqen hatun suyuqtaq huk diosnin paykunaq sinchi qayllanpi kashan, imaynan Apu Señor Diosninchisqa qayllanchispi kashan sapa kuti waqyakuqtinchis hinaqa?

⁸Icha, ¿mayqen hatun suyuqtaq chanin kamachikuyninkuna chaninchayninkunapas kan, tukuy kay yachachisqay kamachikuykuna hinaqa?

⁹Qankuna kikiykichista allinta qhawakuychis, paqtan qonqawaqchis rikusqaykichis Diospa ruwasqanta, paqtataq mana hayk'aqpas yuyaripuwaqchischu. Aswanpas wawaykichismanpas nietoykichismanpas tukuy rikusqaykichista yachachiychis.

¹⁰Horeb orqopi Apu Señor Diosninchispa qayllanpi kashasqaykichis p'unchayta ama qonqaychischu. Chay p'unchaymi payqa niwarqan: Runakunata huñumuy simiykunata uyarinankupaq, ahinapin tukuy kawsasqanku p'unchaypi ñoqa yupaychayta yachanqaku, wawankumanpas yachachillanqakutaq ñoqa yupaychayta, nispa.

¹¹Hinan qankunaqa Horeb orqo k'uchuman asuykuspa chaypi kasharqankichis, orqotaq tutayaykurqan yanay-yana ati phuyuq pakaykusqan, hinallataq orqo rawrarqan cielo taripaykamaraq.

¹²Señor Diostaq chay nina rawray ukhumanta rimamurqan. Qankunataq rimasqallanta uyarirqankichis, manataq ima rikch'aytapas rikurqankichischu.

¹³Hinan Señor Diosqa rimanakuyninta yachachirqasunkichis, chay rimanakuymi chunka kamachikuy simi, chaytan iskay p'alta rumipi qelqarqan, hinaspa kamachirqasunkichis hunt'anaykichispaq.

¹⁴Ñoqatapas kamachillawarqantaq qankunaman chay kamachikuynin simikunata chaninchayninkunatawan yachachinaypaq, hap'ikapunaykichis hallp'aman haykuspa hunt'anaykichispaq.

¹⁵Señor Diospa Horebpi nina ukhumanta rimamusqasuykichis p'unchayqa manan ima rikch'aytapas rikurqankichischu. Chayrayku qankuna kikiykichista allinta qhawakuychis.

¹⁶Paqtataq mana chaninman urmawaqchis rikch'aykunata ruwakuspaykichis. Aman ruwankichischu warmiq rikch'aynintapas qhariq rikch'aynintapas,

¹⁷amallataq hallp'a patapi puriq mayqen animalpa rikch'aynintapas, mayqen phalaq animalpa rikch'aynintapas,

¹⁸pampan suchuq mayqen animalpa rikch'aynintapas, mayqen challwaq rikch'aynintapas ruwankichischu.

¹⁹Cielota qhawarispaykichisqa, intita, killata, qoyllurkunata, llapan ch'askakunatapas rikuspaykichisqa, paqtataq wateqachikuwaqchis chaykunata yupaychanaykichispaq servinaykichispaq ima, Apu Señor Diosninchismi chaykunata kamarqan llapan kay pacha llaqtakunapaq.

²⁰Qankunatan Señor Diosqa akllarqasunkichis, hinaspan Egiptomanta horqomurqasunkichis fierro unuyachina hornomanta hina, paypa llaqtan kanaykichispaq, imaynan kunan p'unchay kashankichis hina.

²¹Señor Diostaq ichaqa qankuna hawa ñoqapaq phiñakurqan, chaymi jurarqan Jordanta mana chimpanaypaq manataq hap'ikapunaykichispaq qosqasuykichis hallp'amanpas haykunaypaq.

²²Chhaynaqa, kay suyupin ñoqaqa wañupusaq, manan Jordán mayuta chimpasaqchu, qankunan ichaqa chimpankichis, hinaspa chay sumaq hallp'ata hap'ikapunkichis.

²³Qankuna kikiykichista allinta qhawakuychis, paqtataq qankunawan Apu Señor Diosniykichispa rimanakusqanta qonqawaqchis. Aman ima rikch'aykunatapas ruwakunkichischu, Apu Señor Diosninchismi chaykuna ruwanaykichistaqa hark'asunkichis.

²⁴Apu Señor Diosninchisqa ruphaspa tukuq nina hinan, sienteq Diostaqmi.

²⁵Churikunayoq nietokunayoq kaspaykichis, chay hallp'api yuyaqña kaspa mana chaninman urmaspa ima rikch'aytapas llaqllankichis chayqa, Apu Señor Diosninchispa ñawpaqenpin mana allinta ruwankichis, chaywanqa paytan phiñachinkichis.

²⁶Kunanmi kay pachata hanaq pachatawan contraykichispi testigota churani, manataq kasukunkichischu chayqa, usqhayllan ch'usaqyankichis Jordán mayu chimpapi hap'ikapusqaykichis hallp'amanta. Manan unaytachu chay hallp'api kawsankichis, aswanpas hukpaqkama ch'usaqyachisqan kankichis.

²⁷Señor Diosmi tukuy suyukunaman ch'eqechisunkichis, iskay kinsallan chay suyukunapiqa qhepankichis.

²⁸Chaypin runaq ruwasqan dioskunata servinkichis, k'ullumanta rumimanta llaqllasqa rikch'aykunata, chaykunaqa manan rikunchu, manan uyarinchu, manan mikhunchu, manataq muskhinpaschu.

²⁹Chaypi Apu Señor Diosninchista maskhankichis tukuy sonqo tukuy alma chayqa, Señor Diostaqa tarinkichismi.

³⁰Qhepallataña tukuy kay muchuykunapas llakikuykunapas taripasuqtiykichis, Apu Señor Diosninchisman kutirikuspa payta kasunkichis chayqa,

³¹manan saqerparisunkichischu, manataq ch'usaqyachisunkichispaschu, manallataq machulaykichiswan juramentowan hunt'ananpaq rimanakusqantapas qonqanqachu, payqa khuyapayakuqmi.

³²Manaraq kasqaykichis ñawpa tiempokunata t'aqwiychis, kay pachapi runata Diospa kamasqan p'unchaymantapacha tapupakuychis, hinallataq hanaq pachantintapas t'aqwiychis. ¿Chay hina musphay ruwayqa hayk'aqpas karqanchu? Icha, ¿uyarikurqanchu chay hina hatun ruwaymanta?

³³¿Mayqen llaqtataq qankuna hina Diospa kunkanta nina ukhumanta uyarispa kawsan?

³⁴¿Karqanchu mayqen diospas huk llaqtaman rispa chay ukhumanta paypaq llaqtata horqomuq imaynan Apu Señor Diosninchis qankunapaq ruwapurqasunkichis hinaqa? Señor Diosmi ñawpaqeykichispi hatun atiyninta kallpanta rikuchirqan, paymi muchuchiykunawan maqanakuywan pusamurqasunkichis, hinallataq milagrokunatapas, señalkunatapas, manchay musphaykunatapas ruwarqan.

³⁵Chaytan rikuchirqasunkichis sapallan Señor Diosqa cheqaq Dios kasqanta yachanaykichispaq, manataq paymanta wak Diosqa kasqantapas.

³⁶Paymi hanaq pachamanta uyarichirqasunkichis kunanasuykichispaq, hatun nina rawraynintan kay pachapi rikuchirqasunkichis, nina ukhumantan siminkunatapas uyarichirqasunkichis.

³⁷Machulaykichista munakusqanraykun qankunataqa akllarqasunkichis, hatun atiyninwanmi pay kikin Egipto suyumanta pusamurqasunkichis.

³⁸Qankunamanta aswan atiyniyoq hatun suyukunatan ñawpaqeykichismanta wikch'urqan, hallp'ankuta hap'ichinasuykichispaq, ahinapi qankunaq chay hallp'a kananpaq, kunanmi chay hina kashan.

³⁹Chay hinaqa, kunan reqsikuychis, hinallataq sonqoykichispi yuyaymanaychis Señor sapallan hanaq pachapipas kay pachapipas Dios kasqanta. Manan wak Diosqa kanchu.

⁴⁰Kunan p'unchay qosqaykichis chay kamachikuyninkunatapas chaninchayninkunatapas hunt'aychis, qankunapas mirayniykichispas allillan kanaykichispaq, Apu Señor Diosninchispa wiñaypaq qonasuykichis hallp'api unayta kawsanaykichispaq, nispa.

⁴¹Jordán mayu inti lloqsimuy ladopin Moisesqa kinsa llaqtakunata t'aqarqan.

⁴²Chay llaqtakunan karqan runamasinta qonqay wañuchiqkunaq pakakunanpaq, ñawpaqmanta mana cheqnikuspa wañuchiq runan chaymanqa ayqekuyta atirqan qespisqa kananpaq.

⁴³Kaykunan karqan chay llaqtakuna: ch'inneq pata pampapi Beser llaqta Rubén ayllupaq, Galaadpi Ramot llaqta Gad ayllupaq, Basanpitaq Golán llaqta Manasés kuskan ayllupaq.

⁴⁴Moisesmi Israel runakunaman qorqan yachachikuykunata, kamachikuykunata, chaninchaykunata, willakuykunatawan.

⁴⁵

⁴⁶Paykunaqa Egiptomanta lloqsimuspankun Jordán mayu inti lloqsimuy ladollapiraq kasharqanku, Amor runakunaq reynin Sehonpa suyunpi Bet-peor qhaway wayq'opi. Sehonqa Hesbonpin tiyarqan, paytan Moisesqa Israel runakunapiwan atiparqanku Egiptomanta hamushaspanku.

⁴⁷Chaymi Israel runakunaqa hallp'ankuta hap'ikapurqanku, hinallataq Basán suyu rey Ogpa hallp'antapas. Amor runakunaq chay iskaynin reyninkuna Jordán inti lloqsimuy ladopi tiyarqanku.

⁴⁸Hallp'ankutaq karqan Arnón mayu patapi Aroer llaqtamanta Hermón nisqa Sirión orqokaman,

⁴⁹Jordán mayu inti lloqsimuy ladopitaq llapan qheshwa wayq'o, Kachi Qocha qaylla Pisga orqo k'uchukama.