Read Quechua Cuzco Bible 1988 DEUTERONOMIO 6 Bible Online

DEUTERONOMIO 6 - Quechua Cuzco Bible 1988 bible

DEUTERONOMIO 6

¹Kaykunan Apu Señor Diosninchispa kamachikuyninkuna, yachachikuyninkuna, chaninchayninkuna ima, chaykunatan Señor Diosqa qankunaman yachachinaypaq kamachiwan, hap'ikapunkichis chay hallp'api hunt'anaykichispaq.

²Tukuy kawsasqaykichis p'unchaymi qankunapas, wawaykichiskunapas, nietoykichiskunapas Apu Señor Diosninchista yupaychanaykichis, tukuy kunan kamachisqay kamachikuyninta yachachikuynintapas hunt'anaykichis, ahinapin unayta kawsankichis.

³Chay hinaqa uyariychis, Israel runakuna, chaykunata hunt'aychis. Ahinapin allillan kankichis, imaymanaq hunt'asqa wiñanan hallp'api askha wawakunayoq kankichis, imaynan machulaykichispa Señor Diosnin prometerqasunkichis hina.

⁴Uyariychis, Israel runakuna, Apu Señor Diosninchisqa ch'ullallan.

⁵Apu Señor Diosninchista munakuychis tukuy sonqoykichiswan, tukuy almaykichiswan, tukuy kallpaykichispiwan.

⁶Sonqoykichispi waqaychaychis tukuy kay kamachisqaykunata,

⁷yachachillaychispuni wawaykichiskunaman, chaykunamanta rimapayallaychispuni wasipi kashaspa, purishaspapas, hinallataq puñuykushaspa, hatarishaspapas.

⁸Chay kamachikuykunata watakuychis makiykichisman mat'iykichismanwan yuyarinaykichispaq,

⁹hinallataq qelqakuychis wasiykichis punku sayaq k'aspikunapi, llaqtaykichis punkukunapipas.

¹⁰Abraham, Isaac, Jacob machulaykichiskunaman prometesqan suyumanmi Apu Señor Diosniykichis pusaykusunkichis. Chay suyupiqa mana sayarichisqaykichis sumaq hatun llaqtakunan kashan,

¹¹mana hunt'achisqaykichis hunt'a kawsayniyoq wasikuna, mana t'oqosqaykichis pukyukuna, mana tarpusqaykichis uvas chakrakuna, olivos chakrakunapiwan kashan. Chaykunata mikhuykuspa saksaykuspaqa,

¹²amapunin Señor Diosta qonqankichischu, paymi Egiptopi kamachi kashaqtiykichis horqomurqasunkichis.

¹³Apu Señor Diosniykichistan yupaychankichis, pay sapallantan servinkichis, sutillanpitaqmi jurankichispas.

¹⁴Aman wak dioskunata yupaychankichischu, amallataq qorpaykichis llaqtakunaq diosninkutapas yupaychankichischu,

¹⁵mana chayqa, qankuna contran phiñakuynin rawrarinqa, hinan chay hallp'amanta wikch'usunkichis, payqa sienteq Diosmi, qankunawantaqmi kashan.

¹⁶Aman Apu Señor Diosniykichista wateqankichischu, Masah ch'inneqpi wateqasqaykichista hinaqa.

¹⁷Makilla kasuychis Apu Señor Diosniykichispa kamachikuyninta, unanchayninta, chaninchaynintapas kamachisqasuykichisman hina.

¹⁸Señor Diospa munasqan allinkaqta chaninkaqta ruwaychis, ahinapin allillan kankichis, machulaykichisman Señor Diospa prometesqan sumaq hallp'aman haykuspapas hap'ikapunkichis,

¹⁹Señor Diostaq llapan awqaykichiskunata qayllaykichismanta wikch'unqa, prometesqasuykichisman hina.

²⁰Huk p'unchay wawaykichis tapusunkichis: ¿Imanaqtintaq Apu Señor Diosninchisqa kamachirqasunkichis kay kamachikuykunatapas, unanchaykunatapas, chaninchaykunatapas? nispa chayqa,

²¹kutichinkichis: Ñoqaykuqa Egipto suyupi rey Faraonpa kamachinmi karqayku, chaymantan Señor Diosqa hatun atiyninwan horqomuwarqanku.

²²Payqa hatun musphay señalkunantan milagrokunatan ruwarqan rey Faraón contra ayllun contrapiwan, chaykunatan rikurqayku.

²³Ahinatan chaymanta horqomuwarqanku kay suyuman pusamuwanankupaq, hinaspa machulanchisman prometesqanman hina qowanankupaq.

²⁴Señor Diostaq kamachiwarqanku llapan kay kamachikuykunata hunt'anaykupaq, hinallataq payta manchakunaykupaq. Chayta ruwaspaykuqa allillanmi kasaqku, Señor Diosqa kawsayniykutapas waqaychawanqakun imaynan kunankama waqaychashawanku hinata.

²⁵Chay hinaqa, Apu Señor Diosninchispa qayllanpi tukuy chay kamachikuykunata makilla hunt'asunchis paypa kamachikusqanman hina chayqa, Diosmi chaninpaq qhawariwasunchis, nispaykichis, nispa.