Read Quechua Cuzco Bible 1988 DEUTERONOMIO 7 Bible Online

DEUTERONOMIO 7 - Quechua Cuzco Bible 1988 bible

DEUTERONOMIO 7

¹Apu Señor Diosninchisqa hap'ikapunaykichis hallp'amanmi pusaykusunkichis, hinaspa qankunamanta aswan askha aswan kallpasapa qanchis suyu runakunata ñawpaqeykichismanta wikch'unqa: Het runakunata, Gerges runakunata, Amor runakunata, Canaán runakunata, Fares runakunata, Hiv runakunata, Jebus runakunatawan.

²Apu Señor Diosniykichis chay suyu runakunata qankunaman hap'ichiqtinmi, atipaspaykichis mana ch'ullayoqta ch'usaqyachinkichis. Amataq paykunawan rimanakunkichischu, amallataq khuyapayankichispaschu.

³Aman ususiykichista paykunaq churinwan casarachinkichischu, amallataq churiykichistapas ususinkuwan casarachinkichischu, paykunawan ama aylluntin kanaykichispaq.

⁴Mana chayqa wawaykichistan Señor Dios servinankuta waqllichinqa, hinaspa wawaykichis wak dioskunata servinqaku. Hinan Señor Diosqa qankuna contra sinchita phiñakuspa ñawi ch'ipiq-niypi ch'usaqyachisunkichis.

⁵Ahinaqa kay hinata ruwaychis: altarninkunata thuniychis yupaychana saywa rumikunata p'akiychis, Asera nisqa diosankutapas ñut'uychis, idolonkutapas ruphachillaychistaq.

⁶Qankunaqa Señor Diospaq t'aqasqa llaqtan kankichis, paymi akllarqasunkichis kay pachapi llapan llaqtakuna ukhumanta munanan llaqta kanaykichispaq.

⁷Señor Diosqa manan wakin suyukunamanta aswan askha kaqtiykichischu munarqasunkichispas akllarqasunkichispas, qankunaqa llapan llaqtakunamanta aswan huch'uyllan kankichis.

⁸Aswanpas Señor Diosqa munakuspanmi, machulaykichisman juramentowan prometesqanta hunt'ayta munaspa, Egipto suyu reypa kamachin kashaqtiykichis atiyninwan horqomuspa qespichirqasunkichis.

⁹Chay hinaqa, yachaychis Apu Señor Diosniykichisqa cheqaq Dios, hunt'aq Dios kasqanta. Payqa munakuqninkunawan kamachikuyninta hunt'aqkunawan rimanakusqantan hunt'an, paykunatataq mana p'itiyta munakun waranqa miraykama.

¹⁰Payta sut'ita cheqnikuqkunatataq ichaqa mana suyaykuspa usqhaylla muchuchispa ch'usaqyachin.

¹¹Chayrayku kasuychis hunt'anaykichispaq kamachisqay unanchaykunata, kamachikuykunata, chaninchaykunatapas.

¹²Kay unanchay simikunata uyarispaykichis kasukuspa hunt'ankichis chayqa, Apu Señor Diosniykichismi machulaykichisman prometesqanman hina rimanakuynintapas munakuynintapas qankunawan hunt'anqa.

¹³Hinaspa machulaykichisman prometesqan hallp'api munakusunkichis, saminchasunkichis, mirachisunkichis. Wawaykichistapas saminchanqa, hinallataq vino, trigo, aceite cosechaykichistapas, chay hinallataq wakaykichispa ovejaykichispa uñankunatapas askhayachinqa.

¹⁴Manataq qharipas warmipas qankuna ukhupi mana wawayoqqa kanqachu, manallataq uywaykichispas mana uñayoqqa kanqachu. Qankunaqa llapa llaqtakunamanta Señor Diospa aswan saminchasqanmi kankichis.

¹⁵Señor Diosqa tukuy onqoykunatan qankunamanta karunchanqa, Egiptopi rikusqaykichis llapan millay onqoykunataqa manan qayllachimusunkichischu, aswanpas llapan qankuna cheqnikuqkunata chay millay onqoykunawan muchuchinqa.

¹⁶Chayrayku Apu Señor Diosniykichispa hap'ichisqasuykichis llapan llaqtakunanta mana khuyapayaspa ch'usaqyachinkichis. Amataq diosninkuta yupaychankichischu, mana chayqa misk'anan kasunkichisman.

¹⁷Ichapas sonqoykichispi niwaqchis: Ñoqaykumanta aswan askhamá chay suyukunaqa, ¿imaynataq hallp'ankumanta wikch'uyta atiykuman? nispa.

¹⁸Chaywanpas ama paykunata manchakuychischu. Allinta yuyariychis Apu Señor Diosniykichis Egipto reyta llapan runankunatapas ruwasqanta.

¹⁹Qankunan rikurqankichis Egipto runakunaq sinchi muchusqankutapas, señalkunatapas, milagrokunatapas, hinallataq hatun atiyninwan Señor Diospa Egipto suyumanta horqomusqasuykichistapas. Chay hinatan Apu Señor Diosniykichisqa manchakusqaykichis llapan llaqtakunata ruwanqa.

²⁰Hinallataq Apu Señor Diosniykichisqa paykunata q'aqchanqa, wañuchinqataq qankunamanta pakakuspa kawsayniyoq qhepaqkunatapas.

²¹Ama paykunata manchakuychischu, Apu Señor Diosniykichisqa qankunawanmi kashan, payqa hatunmi manchanataq.

²²Paymi chay suyukunata pisimanta-pisi qayllaykichismanta wikch'unqa, hukpaqkama wikch'uwaqchis chayqa, manan allinchu kasunkichisman, phiña salqa animalkunachá qankuna contra askhayanman.

²³Apu Señor Diosniykichisqa qankunamanmi chay suyu runakunataqa hap'ichisunkichis, paykunatataq q'aqchanqa llapanta tukunankama.

²⁴Chhaynallataq reyninkutapas hap'ichisunkichis munasqaykichista ruwanaykichispaq, qonqasqa alma kanankupaq paykunata tukupunkichis. Manan pipas qankuna contra qhalichakunqachu llapanta wañuchispa tukunaykichiskama.

²⁵Diosninkuq rikch'ayninkunata kanaykunkichis, amataq diosninku sumaqchasqa qoritapas qolqetapas munapayaspa hap'ikunkichischu, paqtan misk'ana kasunkichisman, Apu Señor Diosniykichispas chaytaqa cheqnikunmi.

²⁶Aman wasiykichisman chay rikch'aykunata apankichischu ama chaykunawan kuska ñakasqa kanaykichispaq. Chaykunaqa ñakasqan, chayraykun qankunaqa sinchita cheqnikunaykichis.