Read Quechua Cuzco Bible 1988 DEUTERONOMIO 8 Bible Online

DEUTERONOMIO 8 - Quechua Cuzco Bible 1988 bible

DEUTERONOMIO 8

¹Kunanmi Diospa kamachikuy siminta kamachiykichis, chay hinaqa makilla llapanta hunt'aychis, hinan kawsankichis, askhata mirankichis, hap'ikapunkichistaq machulaykichisman Señor Diospa juraspa prometesqan hallp'atapas.

²Yuyariychis ch'inneqpi Apu Señor Diosniykichispa tawa chunka watantin purisqaykichispi pusasqasuykichista, payqa munarqanmi huch'uyyaykukunaykichista, chaymi probarqasunkichis kamachikuyninta hunt'awaqchischus icha manachus chayta yachananpaq.

³Señor Diosqa huch'uyyachirqasunkichismi, yarqaywanpas muchuchirqasunkichismi, chaymantataq manná nisqa mikhunata mikhuchirqasunkichis. Chay mikhunataqa manan taytaykichis reqsisqachu, manallataq qankunapas reqsirqankichischu. Payqa munarqanmi yachanaykichista runaqa mana t'antallawanchu kawsasqanta, aswanpas Diospa nisqan simikunawanmi.

⁴Chay tawa chunka watantin ukhupi manan p'achaykichispas thantakurqanchu, manallataq chakiykichispas punkirqasunkichischu.

⁵Imaynan huk tayta churinta wanachin ahinatan payqa wanachisunkichis, chayrayku reqsikuychis Apu Señor Diosniykichispa wanachisqasuykichista.

⁶Chay hinaqa, paypa kamachikuyninta hunt'aychis, payta kasuspaykichis manchakuspaykichis ima.

⁷Apu Señor Diosniykichismi allin hallp'aman pusaykusunkichis. Chay hallp'aqa mayukunayoqmi pukyukunayoqmi, hinallataq wayq'onkunapipas orqonkunapipas unu phullpushan.

⁸Kashallantaq trigo, cebada, uvas, higos, granada, olivos, miel misk'ipas.

⁹Chay hallp'apiqa manan mikhunaykichismanta llakikunkichisñachu, manallataq imapas pisisunkichisñachu. Qaqankunapas fierroyoqmi, orqonkunapas cobreyoqmi, chaytan horqonkichis.

¹⁰Qankunaqa mikhuykuspaykichismi sonqopas-sonqo kankichis, Apu Señor Diosniykichistataq saminchankichis allin hallp'a qosqasuykichismanta.

¹¹Paqtataq Apu Señor Diosniykichista qonqawaqchis, hunt'allaychispuni kunan kamachisqay unanchayninta, kamachikuyninta, chaninchaynintapas.

¹²Mikhuykuspa sonqopas-sonqo kaspaykichisqa, sumaq wasikunata sayarichispa tiyaspaykichisqa,

¹³wakaykichispas ovejaykichispas mirariqtinqa, qolqeykichispas qoriykichispas askha kaqtinqa, hinallataq tukuy kaqniykichiskunapas askhayaqtinqa,

¹⁴aman hatunchakunkichischu, paqtan Apu Señor Diosniykichista qonqawaqchis, paymi kamachi kashaqtiykichis Egipto suyumanta horqomurqasunkichis.

¹⁵Payqa chay hatun manchana ch'inneqnintan pusamurqasunkichis, chay cheqaspiqa askha picaq mach'aqwaykuna alacrán kurukuna karqan, manataq chhikan unullapas karqanchu. Chaywanpas ch'ila qaqamanta unuta phawachispan ukyachirqasunkichis.

¹⁶Hinallataq manná nisqa mikhunata mikhuchirqasunkichis, chaytan machulaykichispas mana reqsisqachu. Chaykunatan ruwarqan huch'uyyaykukunaykichispaq, probanasuykichispaq, tukuymanta astawanqa allinniykichispaq kananpaq.

¹⁷Paqtan yuyaykuwaqchis: Tukuy kay qhapaq-kayninchistaqa ñoqanchispa atiyninchiswanmi tarinchis, nispa.

¹⁸Aswanpas yuyariychis Apu Señor Diosniykichista, paymi kallpacharqasunkichis qhapaq-kaykunata tarinaykichispaq, ahinapin machulaykichiswan juraspa rimanakusqanta qankunawan hunt'an.

¹⁹Ichaqa Apu Señor Diosniykichista qonqaspaykichis, wak dioskunata yupaychankichis chayqa, cheqaqtan niykichis wañuchisqapunin kankichis.

²⁰Imaynan Apu Señor Diosniykichisqa purisqaykichispi suyukunata wañuchirqan, ahinatan qankunatapas wañuchisunkichis kamachikusqanta mana kasuqtiykichisqa.