Read Quechua Cuzco Bible 1988 JUAN 11 Bible Online

JUAN 11 - Quechua Cuzco Bible 1988 bible

JUAN 11

¹Lázaro sutiyoq runan onqosharqan, paymi tiyarqan Betania llaqtapi panan Mariawan Martawan kuska.

²Chay Marian Señor Jesusta q'apaq hawinawan hawirqan, hinaspan chukchanwan chakinta ch'akichirqan.

³Lazaroq panankunan Jesusman willaqta kacharqanku: —Señor, munasqa amigoykin onqoshan, nispa.

⁴Jesustaq chayta uyarispa nirqan: —Chay onqoyqa manan wañuchinallanpaqchu, aswanpas Diosta hatunchanapaqmi, chay onqoywanqa Diospa Churinmi hatunchasqa kanqa, nispa.

⁵Jesusqa munakurqanmi Lazarota, Martata, ñañantawan.

⁶Chaytukuywanpas onqosqa kashasqanta uyarispanmi iskay p'unchaytawanraq kasqanpi qhepakurqan.

⁷Chaymantañan yachachisqankunata nirqan: —Haku Judea provinciata, nispa.

⁸Yachachisqakunataq payta nirqanku: —Yachachikuq, manaraqmi unaychu Judeapi tiyaq runakunaq ch'aqeyta munasqasuykiqa, ¿chaychu Judeaman kutiwaq? nispa.

⁹Jesusmi nirqan: —P'unchayqa chunka iskayniyoq horayoqmi. Pipas p'unchaypi purispaqa manan misk'anchu, kay pachata k'anchaq k'anchasqanrayku.

¹⁰Pipas tutayaqpi purispan ichaqa misk'akun, laqhayaqpi kasqanrayku.

¹¹Chayta nispataq paykunata nirqan: —Amigonchis Lazaron puñushan, haku, payta rikch'arichimuqmi risaq, nispa.

¹²Chaymi yachachisqankunaqa nirqanku: —Señor, puñushan chayqa, qhaliyanqan, nispa.

¹³Aswanpas Jesusqa Lazaroq wañusqanmantan rimarqan, paykunataq yuyaykurqanku puñuyllamanta rimasqanta.

¹⁴Chaymi Jesusqa paykunata sut'ita nirqan: —Lazaroqa wañupunmi,

¹⁵chaypi mana kasqaymantataqmi kusikuni, chhaynapi qankunapas ñoqapi iñinaykichispaq, ichaqa haku payman risunchis, nispa.

¹⁶Chaymi Mellizo nisqa Tomasqa nirqan yachachisqa-masinkunata: —Haku ñoqanchispas paywan kuska wañunanchispaq, nispa.

¹⁷Jesuspa chayamunanpaqmi Lazaroqa tawa p'unchayña p'ampasqa karqan.

¹⁸Betania llaqtaqa Jerusalén llaqtamanta sispallan karqan, kuskan legua hina.

¹⁹Askha Judío runakunataq hamusqaku, Martatawan Mariatawan turankumanta sonqochaq.

²⁰Martaqa Jesuspa hamushasqanta uyarispa hinan Jesuswan tupaq lloqsirqan, Mariataq ichaqa wasipi kasharqan.

²¹Hinan Martaqa Jesusta nirqan: —Señor, kaypi kashawaq karqan chayqa, turayqa manan wañunmanchu karqan.

²²Chaywanpas yachanin tukuy imatapas Diosmanta mañakuqtiykiqa Diospa qonasuykita, nispa.

²³Jesustaq payta nirqan: —Turaykiqa kawsarimpunqan, nispa.

²⁴Chaymi Martaqa payta nirqan: —P'uchukay p'unchay kawsarimpuypi kawsarimpunantaqa yachanin, nispa.

²⁵Hinan Jesusqa payta nirqan: —Ñoqan kawsachiqpas kawsarichimpuqpas kani. Ñoqapi iñiqqa, wañusqaña kashaspapas kawsanqan.

²⁶Pipas kawsashaspa ñoqapi iñiqqa, manan hayk'aqpas wañunqachu. ¿Iñinkichu chayta? nispa.

²⁷Martataq nirqan: —Arí, Señorníy. Ñoqaqa iñinin, qanqa Diospa Churin Criston kanki, kay pachaman hamunan karqan chaypunin kanki, nispa.

²⁸Chayta nispanmi wasiman kutispa ñañan Mariata ch'inlla waqyamurqan: —Yachachikuqmi kaypi kashan, waqyashasunkin, nispa.

²⁹Hinan Mariaqa chayta uyarispa usqhaylla sayarispa Jesusman phawamurqan.

³⁰(Jesusqa manaraqmi llaqtaman haykurqanchu, aswanpas Martawan tupasqan cheqasllapiraqmi kasharqan).

³¹Mariata sonqochaspa wasipi kaq runakunataq, Mariaq usqhaylla lloqsisqanta rikuspa, qhepanta rirqanku: —Aya p'ampanamanchá rishan chaypi waqaq, nispanku.

³²Mariataq Jesuspa kasqanman chayaspa, ñawpaqenpi qonqoriykukurqan: —Señorníy, kaypi kashawaq karqan chayqa, turaykuqa manan wañunmanchu karqan, nispa.

³³Hinan Jesusqa Mariata waqashaqta, runakunapas paywan kuska waqaspallataq hamushaqta rikuspa sonqon “ch'allaq” nirqan, hinaspan sinchita llakikurqan.

³⁴Hinaspanmi nirqan: —¿Maymanmi p'amparqankichis? nispa. Hinan payta nirqanku: —Señor, hamuy rikumunki, nispa.

³⁵Jesustaq waqarqan.

³⁶Chaymi runakunaqa ninakurqanku: — Qhawariychis, anchatapunin Lazarota munakusqa, nispa.

³⁷Wakinninkutaq nirqanku: —Kay runaqa ñawsatapas qhawarichirqanmi, ¿chaychu mana ima ruwaytapas atinman karqan Lazaroq mana wañunanpaq? nispa.

³⁸Jesustaq huktawan sonqonta “ch'allaq” nichikuspa aya p'ampana t'oqoman rirqan. Chayqa rumiwan wisq'aykusqa qaqa t'oqon karqan.

³⁹Hinaspan Jesusqa nirqan: —Rumita tanqaqaychis, nispa. Wañuqpa panan Martataq nirqan: —Señorníy, asnashanñachá, tawa p'unchayñan karqon, nispa.

⁴⁰Jesustaq payta nirqan: —Manachu nirqayki: Iñinki chayqa Diospa atiynintan rikunki, nispay? nispa.

⁴¹Chaymi rumita tanqaqarqanku aya churasqanku t'oqomanta. Jesustaq hanaq pachata qhawarispa nirqan: —Yayáy, graciastan qoyki uyariwasqaykimanta.

⁴²Ñoqaqa yachanin uyariwaqpuni kasqaykita, ichaqa kayta nini ñoqawan kashaq runakuna kachamuwasqaykita iñinankupaqmi, nispa.

⁴³Chaykunata nispanmi kunkayoqta waqyarqan: —¡Lázaro, lloqsimuy! nispa.

⁴⁴Chaymi wañuq Lazaroqa lloqsimurqan, telawan chakin makin k'uyusqa, uyanpas pañowan p'istusqa. Hinan Jesusqa paykunata nirqan: —Paskaychis, paylla purichun, nispa.

⁴⁵Chaymi María watukuq riq askha Judío runakunaqa Jesuspa ruwasqanta rikuspa paypi iñirqanku.

⁴⁶Wakinninkutaq ichaqa fariseokunaman*f** rispa Jesuspa ruwasqanta willamurqanku.

⁴⁷Hinaqtinmi sacerdote umallikunaqa fariseokunapiwan*f** hatun huñukuyman waqyarqanku, hinaspan nirqanku: —¿Imanasunmi? Kay runaqa askha milagrokunatan ruwashan.

⁴⁸Hinallata qhawasun chayqa, llapa runan paypi iñinqaku. Roma llaqta soldadokuna hamuspataq, Dios yupaychana wasinchista thuninqaku, suyunchistapas ch'usaqyachinqaku, nispa.

⁴⁹Chaymi paykuna ukhupi kaq Caifasqa chay watapi uma sacerdote kashaspan paykunata nirqan: —Qankunaqa manan imatapas yachankichischu,

⁵⁰manataqmi reparankichispaschu. Aswan allinmi huk runalla wañunan suyunchispa rantinpi, suyuntin runakuna tukukunanmantaqa, nispa.

⁵¹Chaytaqa manan pay kikinmantachu nirqan, aswanpas chay watapi uma sacerdote kaspanmi profetizarqan suyuntinpa rantinpi Jesuspa wañunanmanta,

⁵²manataq chay suyullapaqchu, aswanpas Diospa ch'eqesqa wawankunata hukllaman huñunanpaqwanmi.

⁵³Ahinaqa chay p'unchaymantapachan Judío umallikunaqa rimanakurqanku Jesusta wañuchinankupaq.

⁵⁴Chaymi Jesusqa manaña sut'itachu purirqan Judeapi tiyaq runakuna ukhupi, aswanmi chaymanta ripurqan ch'inneq qaylla Efraín nisqa llaqtaman, chaypin yachachisqankunawan tiyarqan.

⁵⁵Judío runakunaq Diospa Alqaspa Pasarparisqan Yuyarina Fiestantaq qayllaykamusharqanña, hinan askha runakuna Jerusalén llaqtaman wicharqanku, fiesta ñawpaqta ch'uyanchakunankupaq.

⁵⁶Jesustan maskharqanku, hinaspan Dios yupaychana wasiman chayaspa ninakurqanku: —¿Ima ninkichistaq? ¿Hamunqachu fiestaman? Icha, ¿manachu? nispanku.

⁵⁷Sacerdote umallikunan fariseokunapiwan*f** kamachirqankuña, maypichus Jesuspa kashasqanta pipas yachanman chayqa, willakamunankupaq, ahinapi payta hap'inankupaq.