Read Quechua Cuzco Bible 1988 JUAN 12 Bible Online

JUAN 12 - Quechua Cuzco Bible 1988 bible

JUAN 12

¹Diospa Alqaspa Pasarparisqan Yuyarina Fiestapaq soqta p'unchayraq kashaqtinmi, Jesusqa kawsarichisqan Lazaroq llaqtan Betaniata rirqan.

²Chaypin cenayta Jesuspaq wayk'urqanku. Martan servirqan, Lazarotaq Jesuswan mikhunanpaq tiyaqkunamanta huknin karqan.

³Mariataqmi ancha chaniyoq huk botella nardo q'apaq hawina aceitewan Jesuspa chakinta hawiykurqan, hinaspan chukchanwan ch'akichirqan. Wasimantaqmi hawinaq q'apaynin hunt'aykurqan.

⁴Hinan Jesusta hap'ichinanpaq kaq, yachachisqanmanta huknin, Judas Iscarioteqa nirqan: —Kay q'apaq hawinaqa kinsa pachak jornal qolqemanmi vendekunman karqan, hinaspan wakchakunaman qosqa kanman karqan, nispa. Judasqa yachachisqankunaq hukninmi karqan, paymi Jesusta hap'ichiqqa karqan.

⁵

⁶Chaytaqa nirqan manan wakchakunata khuyapayaspachu, aswanpas suwa kaspanmi. Paymi qolqe hap'iq karqan, hinaspan chay qolqemanta suwakullaqpuni.

⁷Chaymi Jesusqa nirqan: —Ama kay warmita hark'aychu, p'ampasqa kanay p'unchaypaqmi kaytaqa waqaychasharqan.

⁸Wakchakunaqa qankunawanmi kashallanqapuni, ñoqan ichaqa mana tukuy tiempochu qankunawan kasaq, nispa.

⁹Askha runakunan yacharqanku Jesuspa Betaniapi kashasqanta, hinaspan rirqanku Jesusta qhawaq, wañusqanmanta kawsarichisqan Lazarotawan qhawaq.

¹⁰Chaymi sacerdote umallikunaqa Lazarotapas wañuchinankupaq rimanakurqanku,

¹¹Lázaro hawa askha runakuna paykunamanta t'aqakuspa Jesuspi iñiqtinku.

¹²Qhepantin p'unchaymi fiestaman riq askha runakuna Jerusalén llaqtaman Jesuspa rishasqanta yachaspa,

¹³palma k'allma hap'intinkama payta chaskiq lloqsirqanku, hinaspan kunkayoqta nirqanku: ¡Yupaychasqa kachun! ¡Saminchasqa kachun Señor Diospa sutinpi hamuqqa! ¡Saminchasqa kachun Israelpa reyninqa! nispa.

¹⁴Jesusmi malta asnota tarispa chaypi sillaykukurqan. Diospa Simin Qelqan nin:

¹⁵Ama manchakuychu, Sión llaqta, qhawariy, Reyniykin hamushan huk malta asnopi sillaykusqa, nispa.

¹⁶Chaykunatan yachachisqankunaqa chaypacha mana entienderqankuchu, ichaqa Jesús hanaq pachaman wichapuqtinñan yuyarirqanku chaykunaqa paymanta qelqasqa kasqanta, chaykunata Jesuspaq ruwasqankutawan.

¹⁷Jesuswan kashaq runakunan willakurqanku imaynatachus Jesusqa Lazarota aya p'ampana t'oqomanta waqyaspa wañusqanmanta kawsarichisqanta.

¹⁸Chaymi askha runakuna Jesusman taripaq lloqsirqanku, chay milagro ruwasqanta yachasqankurayku.

¹⁹Hinan fariseokunaqa*f** ninakurqanku: —Rikushanchismi, manan ima ruwaytapas atinchischu. Qhawariychis, llapallanmi paypa qhepanta ripushanku, nispa.

²⁰Fiestapi yupaychanankupaq Jerusalenman wichariqkunataq wakin karqan Greciamanta kaq runakuna.

²¹Paykunan, Galileapi Betsaida llaqtayoq Felipeman asuykuspa valekurqanku: —Wiraqocháy, Jesús rikuytan munashayku, nispa.

²²Hinan Felipeqa rispa Andresman willamurqan, Andrestaq Felipewan rispa chayta Jesusman willamurqanku.

²³Chaymi Jesusqa paykunata nirqan: —Ñan tiempoña Diospa Kachamusqan Runa hatunchasqa kanaypaq.

²⁴Cheqaqtapunin niykichis, trigo ruruchus yapusqaman mana chayanchu, manataq wañunpaschu chayqa, sapallanmi qhepan, wañuspanmi ichaqa askhata rurun.

²⁵Kawsayninta munakuqqa chinkachinqan, kay pachapi kawsayninta cheqnikuqtaqmi wiñay kawsaypaq waqaychanqa.

²⁶Pipas serviwaqqa qhepayta hamuchun, serviqniyqa maypichus kasqaypin kallanqataq. Pipas serviwaqniytaqa Yayaymi hatunchanqa.

²⁷Kunanmi almayqa sinchi llakisqa kashan. ¿Ima nisaqtaq? Icha, ¿Yayáy, kay llakikuymanta qespichiway, nisaqchu? Manan, aswanpas ñak'ariqpunin hamurqani.

²⁸Yayáy, sutiykita hatunchay, nispa. Hinan hanaq pachamanta huk kunka nimurqan: —Hatuncharqaniñan, wakmantataq hatunchasaq, nispa.

²⁹Chaypi kashaq runakunataq kunkata uyarispa nirqanku: —Q'aqyaqeqpa kunununuyninmi, nispa. Wakintaq nirqanku: —Angelmi payta rimaykamun, nispa.

³⁰Hinan Jesusqa nirqan: —Manan ñoqaraykuchu kay kunkaqa uyarikun, aswanpas qankunaraykun.

³¹Kunanmi kay pachapi kaqkunaqa juzgasqa kanqa, kunanmi kay pachapi kamachikuq supaypas qarqosqa kanqa.

³²Chakatawaqtinkun ichaqa llapa runata ñoqa kikiyman asuykachikamusaq, nispa.

³³Chaytaqa nirqan imaynatachus wañunanta entiendechispanmi.

³⁴Chaymi runakunaqa payta nirqanku: —Ñoqaykuqa kamachikuy simipin yacharqayku Diospa Akllasqan Cristoqa wiñaypaq kawsananta. ¿Imaynataq qanri ninki: Diospa Kachamusqan Runaqa chakatasqapunin kanan, nispayki? ¿Pitaq chay Runaqa? nispa.

³⁵Hinan Jesusqa paykunata nirqan: —Pisi tiempollatañan k'anchayqa qankunawan kanqa, k'anchay qankunawan kashaqtinraq puriychis ama laqhayaq hap'inasuykichispaq. Laqhayaqpi puriqqa manan yachanchu maytachus risqantapas.

³⁶K'anchay qankunawan kashaqtinqa k'anchaypi iñiychis, k'anchaypi kashaq runakuna kanaykichispaq, nispa. Chaykunatan Jesusqa rimarqan, hinaspan ripuspa paykunamanta pakakurqan.

³⁷Jesuspiqa manan runakunaqa iñirqankuchu askha milagrokunataña ñawpaqenkupi ruwashaqtinpas.

³⁸Chaykunan karqan profeta*f** Isaiaspa qelqasqan hunt'akunanpaq. Paymi nirqan: Señor, ¿pitaq creerqan willasqaykuta? ¿Pimantaq Señor Diosqa atiyninta rikuchirqan? nispa.

³⁹Isaiasmi nillarqantaq: Diosmi nin: Ñawinkutan ñawsayachirqani, sonqonkutan rumiyachirqani, ñawinkuwan ama rikunankupaq, sonqonkuwan ama entiendenankupaq, ahinapi ama kutirikamuwanankupaq, ama qhaliyachinaypaqwan, nispa. Chaymi mana iñiyta atirqankuchu.

⁴⁰

⁴¹Chaykunatan Isaiasqa nirqan Jesuspa ancha musphana kasqanta rikuspa, chaymi paymanta rimarqan.

⁴²Chaywanpas, Judío umallikunamantaqa askhan Jesuspi iñirqanku, ichaqa fariseokunata*f** manchakuspankun mana rimarirqankuchu, Diosmanta yachachina wasimanta ama qarqosqa kanankupaq.

⁴³Paykunaqa runakunaq hatunchanantan astawanqa munarqanku Diospa hatunchananmantaqa, nispa.

⁴⁴Jesusmi kunkayoqta nirqan: —Pipas ñoqapi iñiqqa manan ñoqallapichu iñin, aswanpas kachamuwaqniypiwanmi.

⁴⁵Pipas ñoqata rikuqqa kachamuwaqniytapas rikunmi.

⁴⁶Ñoqa k'anchaymi kay pachaman hamuni, pipas ñoqapi iñiqqa mana laqhayaqpi kananpaq.

⁴⁷Pipas simiykunata uyarishaspa chaykunata mana hunt'aqtaqa manan ñoqachu huchachasaq. Manan runakunata huchachanaypaqchu hamuni, aswanpas runakunata qespichinaypaqmi.

⁴⁸Pipas pisichawaspa simiykunata mana kasukunqachu chayqa, kanmi payta huchachaq. Rimasqay simin p'uchukay p'unchaypi paytaqa huchachanqa.

⁴⁹Manan ñoqaqa kikillaymantachu rimani, aswanpas kachamuwaqniy Yayan kamachiwarqan imatachus rimanaytapas yachachinaytapas.

⁵⁰Yachanitaqmi kamachikuyninqa wiñaypaq kawsachiq kasqanta. Chaymi rimaspayqa Yayaq kamachiwasqanman hina rimani, nispa.