Read Quechua Cuzco Bible 1988 JUAN 13 Bible Online

JUAN 13 - Quechua Cuzco Bible 1988 bible

JUAN 13

¹Diospa Alqaspa Pasarparisqan Yuyarina Fiesta ñawpaqtaraqmi Jesusqa kay pachamanta Yayanman kutipunanpaq tiempo chayamusqanta yacharqan. Imaynatachus kay pachapi paypa kaqkunata munakuqpuni, ahinatan paykunataqa tukukuykama munakurqan.

²Jesusqa yachachisqankunawan manaraq cenashaqtinkun, supayqa Simonpa churin Judas Iscarioteta sonqonpi yuyaykachirqanña Jesusta hap'ichinanpaq.

³Jesusqa yacharqanmi lliw atiyta Yayaq payman qosqanta, Diosmanta hamusqantapas, Diosman kutipunantapas.

⁴Cenasqanmanta hatarispataqmi pata p'achanta ch'utikuspa toallawan cinturanta wataykukurqan.

⁵Hinaspan puruñaman unuta hich'aykuspa yachachisqakunaq chakin maylliyta qallarirqan, watakusqan toallawantaq ch'akichirqan.

⁶Simón Pedroman qayllaykuqtintaq Pedroqa nirqan: —Señorníy, ¿qanchu chakiyta maylliwankiman? nispa.

⁷Jesustaq nirqan: —Kunanqa manan entiendenkichu kay ruwasqayta, qhepamanñan entiendenki, nispa.

⁸Chaymi Pedroqa nirqan: —Manapunin chakiytaqa maylliwankimanchu, nispa. Jesustaq payta nirqan: —Mana maylliqtiyqa manan ñoqawanñachu kanki, nispa.

⁹Hinan Simón Pedroqa nirqan: —Señorníy, ama chakillaytachu maylliway, aswanpas makiytawan umaytawan, nispa.

¹⁰Jesustaq payta nirqan: —Bañasqa kaqqa limpioñan, chakillantañan mayllikunan. Qankunaqa limpioñan kashankichis, ichaqa manan llapaykichischu, nispa.

¹¹(Jesusqa yacharqanmi pichus payta hap'ichinanta, chaymi nirqan: —Manan llapaykichischu limpioqa kashankichis, nispa).

¹²Chakinkuta maylliyta tukuspataq pata p'achanwan churaykukuspa wakmanta tiyaykurqan, hinaspan paykunata nirqan: —¿Entiendenkichischu imatachus ruwarqaykichis chayta?

¹³Qankunan niwankichis: Yachachikuq, Señor, nispa, chaytaqa allintan ninkichis, chaypunin kani.

¹⁴Ñoqa Señorpas Yachachikuqpas kashaspay chakiykichista maylliqtiyqa, qankunapas chakiykichista mayllinakunaykichismi.

¹⁵Yachaqakunaykichispaqmi rikuchiykichis, imaynan ñoqa ruwani ahinata qankunapas ruwanaykichispaq.

¹⁶Cheqaqtapunin niykichis, kamachiqa manan patronninmanta kurakchu, manallataq kachasqapas kachaqninmanta kurakchu.

¹⁷Kaykunata yachaspachus ruwankichis chayqa, kusisamiyoqmi kankichis.

¹⁸Manan llapaykichismantachu rimani, ñoqan yachani pikunatachus akllasqayta, ichaqa kayta nini “T'anta mikhuqmasiymi ñoqa contra sayarirqan” niq Qelqa hunt'akunanpaq.

¹⁹Kunanmantapachan kayta nishaykichis, manaraq chaykuna sucedeshaqtin, chaykuna sucedeqtinñataqmi pichus ñoqa kasqayta creenkichis.

²⁰Cheqaqtapunin niykichis, pipas ñoqaq kachasqayta chaskiqqa, ñoqatan chaskiwan, ñoqata chaskiwaqtaq kachamuwaqniyta chaskin, nispa.

²¹Jesusqa chayta nispanmi sonqonpi llakikurqan, hinaspan sut'inta nirqan: —Cheqaqtapunin niykichis, hukniykichismi hap'ichiwanqa, nispa.

²²Chaymi yachachisqakunaqa qhawanakurqanku pimantachus nisqanta mana yachaspa.

²³Jesuspa munakusqan huknin yachachisqantaq Jesusman k'iraykurisqa kasharqan.

²⁴Paytan Simón Pedroqa ch'illmipayarqan, pimantachus chayta Jesuspa nisqanta tapunanpaq.

²⁵Chaymi payqa Jesusman k'iraykurisqa kaspa tapuykurqan: —Señorníy, ¿pitaq chayri? nispa.

²⁶Hinan Jesusqa nirqan: —Chay runaqa pimanchus t'antata challpuykuspa qosaq chaymi, nispa. T'antata challpuykuspataq Simonpa churin Judas Iscarioteman qorqan.

²⁷Chaymi t'antata mikhuykuqtin hina Satanasqa payman haykurqan, hinan Jesusqa Judasta nirqan: —Imachus ruwanaykita usqhaylla ruway, nispa.

²⁸Ichaqa manan mayqenninkupas entienderqankuchu, imanaqtinchus chayta nisqanta.

²⁹Wakintaq yuyarqanku Judasqa qolqeta hap'isqanrayku Jesusqa: Fiestapaq munasqanchista rantimuy, otaq wakchakunaman qomuy, nispa payta nisqanta.

³⁰Judasqa t'antata mikhuykuspan lloqsirqanpacha. Tutañataq karqan.

³¹Judas lloqsiqtin hinan Jesusqa nirqan: —Kunanmi Diospa Kachamusqan Runaqa hatunchasqa kani, ñoqawantaq Diospas hatunchasqa kashan.

³²Dioschus ñoqawan hatunchasqa kashan chayqa, kikin Diosmi ñoqata hatunchawanqa, kunanmantapachataqmi hatunchawanqa.

³³Wawallaykuna, pisillatañan qankunawan kasaq. Maskhawankichismi, ichaqa, imaynan Judío umallikunamanpas nirqani: Ñoqaq risqaymanqa manan hamuyta atiwaqchischu, nispa, ahinatan qankunatapas kunan niykichis.

³⁴Mosoq kamachikuytan churapuykichis: Qankuna pura munanakuychis. Imaynan ñoqapas munakuykichis, ahinata qankunapas munanakuychis.

³⁵Chhaynapin ñoqaq yachachisqaykuna kasqaykichista llapa yachanqaku qankuna munanakuqtiykichis, nispa.

³⁶Simón Pedron Jesusta nirqan: —Señorníy, ¿maytataq rinkiri? nispa. Jesustaq payta nirqan: —Ñoqaq risqaymanqa manaraqmi kunan hamuyta atiwaqchischu, qhepatañan ichaqa hamuyta atinkichis, nispa.

³⁷Pedrotaq nirqan: —Señorníy, ¿imaraykun kunanqa qhepayki hamuyta mana atiymanchu? Qanraykun wañusaqpas, nispa.

³⁸Chaymi Jesusqa payta nirqan: —¿Ñoqaraykuchu wañunki? Cheqaqtapunin niyki: Manaraq gallo waqashaqtinmi reqsiwasqaykita kinsa kutita mananchakunki, nispa.