Read Quechua Cuzco Bible 1988 JUAN 16 Bible Online

JUAN 16 - Quechua Cuzco Bible 1988 bible

JUAN 16

¹Chaykunatan niykichis, ñoqapi iñiyniykichis ama chiriyananpaq.

²Diosmanta yachachina wasikunamantan qarqomusunkichis, tiempopas chayamunqan pipas qankunata wañuchiqqa Diosta servishasqanta yuyanan.

³Chaykunatan ruwasunkichis Yayatapas ñoqatapas mana reqsiwasqankurayku.

⁴Chaykunatan niykichis, chay tiempo chayamuqtin ñoqaq nisqaykunata yuyarinaykichispaq. Chaytaqa manan qallariymantapachachu nirqaykichis qankunawan kashasqayrayku.

⁵Kunanmi ichaqa kachamuwaqniyman ripushani, manataqmi mayqenniykichispas tapuwankichischu: ¿Maytan rishanki? nispaqa.

⁶Aswanpas, chaykunata qankunaman rimaykusqayraykun sonqoykichispi mayta llakikunkichis.

⁷Ichaqa cheqaqkaqtan willaykichis: Ñoqa riqtiymi qankunapaq allin kanqa, mana riqtiyqa kallpachaqmi mana hamusunkichismanchu, rispaymi ichaqa payta kachamusqaykichis.

⁸Pay hamuspanmi kay pacha runakunata reparachinqa huchayoq kasqankuta, pichus chanin kasqanta, Diosqa runakunata huchachanantawan.

⁹Paymi huchayoq kasqankuta reparachinqa ñoqapi mana iñisqankurayku.

¹⁰Ñoqaqa Yayaman ripuqtiymi pichus chanin kasqanta reparachinqa. Qankunaqa manañan rikuwankichischu.

¹¹Kay pachapi kamachikuq supayqa huchachasqañan kapun, chaymi Santo Espirituqa Diospa runakunata huchachananta reparachinqa.

¹²Askharaqmi qankunaman ninay kashan, ichaqa kunanqa sasa entiendeyraqmi kasunkichisman.

¹³Diospa cheqaq-kayninta reqsichiq Santo Espíritu hamuspanmi ichaqa, tukuy cheqaqkaqta yachachisunkichis. Manan pay kikillanmantachu rimanqa, aswanpas Yayamanta tukuy ima uyarisqantan rimanqa, hinaspan qhepaman imachus kanankunata willasunkichis.

¹⁴Paymi hatunchawanqa, hinaspan ñoqaq nisqayta uyarispa qankunaman willasunkichis.

¹⁵Tukuy imapas Yayaq kaqninqa ñoqaqmi, chaymi nirqaykichis: Ñoqaq nisqayta uyarispa qankunaman willasunkichis, nispa.

¹⁶Asneqmanqa manañan rikuwankichischu, chaymanta qhepamanmi ichaqa rikuwankichis, nispa.

¹⁷Chaymi wakin yachachisqankunaqa paykuna pura ninakurqanku: —¿Ima ninantataq nin: Asneqmanqa manañan rikuwankichischu, chaymanta qhepamanmi ichaqa rikuwankichis, nispaqa? ¿Ima ninantataq nillantaq: Yayaman rishasqayrayku, nispapas?

¹⁸Nirqanku: —¿Imataq kay “Asneqmanqa” nisqanri? Manan entiendenchischu imatachá rimakunpas, nispa.

¹⁹Jesusmi repararqan payta tapuykuyta munasqankuta, chaymi nirqan: —¿“Asneqmanqa manañan rikuwankichischu, chaymanta qhepamanmi ichaqa rikuwankichis”, nispa nisqaymantachu tapunakushankichis?

²⁰Cheqaqtapunin niykichis, qankunaqa waqankichismi llakikunkichismi, kay pacha runakunataq kusikunqaku. Llakisqan kankichis, ichaqa llakikuyniykichismi kusikuyman tukupunqa.

²¹Onqoq warmiqa wachakunan hora chayamuqtinmi llakikun, wawata onqokuspañan ichaqa nanayninta mana yuyarinñachu, kay pachapi wawa paqarisqanmanta q'ochukusqanrayku.

²²Chay hinallataqmi qankunapas llakisqa kunan kashankichis, ichaqa huktawanmi ñoqa rikusqaykichis, chaymi sonqoykichispi kusikunkichis, manataqmi pipas kusikuyniykichistaqa qechusunkichischu.

²³Chay p'unchaypiqa manan imatapas tapuwankichischu. Cheqaqtapunin niykichis, imatapas Yayamanta sutiypi mañakuqtiykichisqa, paymi qosunkichis.

²⁴Manan imatapas sutiypi kunankama mañakurqankichisraqchu. Mañakuychis, chaskinkichismi, anchatapuni kusikunaykichispaq.

²⁵Chaykunatan rikch'anachiy simikunapi niykichis, ichaqa tiempon chayamushan manaña rikch'anachiy simikunapi qankunaman ninaypaq, aswanpas Yayamantan sut'itapuni willasqaykichis.

²⁶Chay p'unchaypin sutiypi mañakunkichis, manañan ñoqachu Yayamanta mañapusqaykichis.

²⁷Kikin Yayan munakusunkichis qankuna munakuwasqaykichisrayku, Diosmanta hamusqayta creesqaykichisraykupiwan.

²⁸Yayamantan lloqsimurqani, hinaspan kay pachaman hamurqani, kunantaq kay pachata saqespa Yayaman ripushani, nispa.

²⁹Yachachisqankunataq payta nirqanku: —Kunanqa sut'itapunin rimashanki, manañan rikch'anachiy simipiñachu.

³⁰Kunanqa entiendeykun lliw imaymana yachasqaykita, manaña pipas ima tapunasuykipas kasqantawan, chaymi creeyku Diosmanta lloqsimusqaykita, nispa.

³¹Jesustaq paykunata nirqan: —¿Kunanqa creenkichischu?

³²Ñan hora chayarqamunña sapankaykichis tukuyneqman ch'eqechisqa kanaykichis, sapallayta saqewanaykichispas. Ichaqa manan sapallaychu kashani, Yayaqa ñoqawanmi kashan.

³³Chaykunatan niykichis ñoqawan huklla kaspa thak-kayniyoq kanaykichispaq. Kay pachapiqa muchunkichismi, ichaqa kallpachakuychis, ñoqan kay pachapi mana allin kaqkunata atipaniña, nispa.