Read Quechua Cuzco Bible 1988 JUAN 17 Bible Online

JUAN 17 - Quechua Cuzco Bible 1988 bible

JUAN 17

¹Chaykuna rimasqan qhepatan Jesusqa hanaq pachata qhawarispa nirqan: —Yayáy, horan chayamunña, ñoqa Churiykita hatunchaway, Churiykipas qanta hatunchanasuykipaq.

²Qanmi ñoqaman atiyta qowarqanki lliw runakunata kamachinaypaq, lliw qowasqayki runakunaman wiñay kawsayta qonaypaqwan.

³Chay wiñay kawsayqa kaymi: Qan sapallayki cheqaq Diosta, kachamuwasqayki ñoqa Jesucristotawan reqsiyninku.

⁴Ñoqan kay pachapi hatunchayki, ruwanaypaq kamachiwasqaykitan tukuniña.

⁵Yayáy, kunanqa, qayllaykipi hatunchaway manaraq kay pacha kashaqtin hatunchawasqayki hatunchaywan.

⁶Kay pachamanta qowasqayki runakunamanqa ñan willaniña pichus kasqaykita, qanpan karqanku, chaymi paykunata qowarqanki, simiykitataq kasukunku.

⁷Kunanqa yachankuñan tukuy ima qowasqaykipas qanpa kasqanta.

⁸Simiykikunatan paykunaman willaniña, hinan paykunaqa chaskikunku, qanmanta lloqsimusqaytapas cheqaqtapunin yachankuña, hinaspan qanpuni kachamuwasqaykita creenku.

⁹Paykunapaqmi rogakuyki. Paykunaqa qanpan kanku, chaymi mana kay pacha runakunapaqchu rogakuyki aswanpas qowasqaykikunapaqmi rogakuyki.

¹⁰Lliw runaykunapas qanpan, qanpa runaykikunapas ñoqaqmi. Paykunan sut'inchanku may musphana kasqayta.

¹¹Manan kay pachapiñachu kasaq, paykunan ichaqa kay pachapiraq kanqaku, ñoqaqa qanmanmi hampushaniña. Ch'uya Yayáy, atiyniykitan qowarqanki, qan kikiyki atiyniykiwan paykunata waqaychay, ñoqanchis hina hukllapuniña kanankupaq.

¹²Kay pachapiraq paykunawan kashaspayqa qowasqayki atiyniykiwanmi paykunata waqaycharqani, cuidarqanin, manan mayqenninkupas chinkarqanchu, aswanpas chinkananpuni kaq runallan, simiyki Qelqa hunt'akunanpaq.

¹³Kunanqa qanmanmi hampushani. Kay pachapiraq kashaspaymi kaykunata rimani, kusikuyniywan anchatapuni kusikunankupaq.

¹⁴Ñoqaqa ñan paykunaman simiykita willaniña, chaymi runakunaqa paykunata cheqnikun, mana kay pachamanta kasqankurayku, ñoqapas manallataqmi kay pachamantachu kani.

¹⁵Manan kay pachamanta paykunata horqonaykipaqchu mañakuyki, aswanpas saqramanta paykunata waqaychanaykipaqmi.

¹⁶Manan kay pachamantachu kanku, ñoqapas manallataqmi kay pachamantachu kani.

¹⁷Cheqaq-kayniykiwan paykunata t'aqay qanllata servinankupaq, simiykiqa cheqaq-kaymi.

¹⁸Imaynan kay pacha runakunaman kachamuwarqanki, chay hinatan ñoqapas paykunata kay pacha runakunaman kachashani.

¹⁹Paykunaraykutaq ñoqaqa qanllata servinaypaq t'aqakuni, paykunapas cheqaqtapuni t'aqasqa kaspa qanllata servinankupaq.

²⁰Manan paykunallapaqchu rogakuyki, aswanpas paykunaq siminta uyarispa ñoqapi iñinqaku chaykunapaqwanmi.

²¹Yayáy, llapallanku hukllapuniña kanankupaqmi mañakuyki, imaynan qanpas ñoqawan huklla kashanki, ñoqapas qanwan huklla kashani, chay hinallataq paykunapas ñoqanchiswan hukllapuniña kanankupaq, ahinapi kachamuwasqaykita runakuna creenankupaq.

²²Hatunchawasqaykiwanmi ñoqapas paykunataqa hatuncharqani, imaynan ñoqanchispas hukllapuni kanchis, chay hina paykunapas hukllapuni kanankupaq.

²³Chay hinallataq ñoqapas paykunawan huklla kasaq, qanpas ñoqawan huklla kanki, ahinapi hukllapuniña kanankupaq. Chay hina kaqtinqa runakunan kachamuwasqaykita yachanqaku, ñoqata munakuwasqaykita hina paykunata munakusqaykitapas yachanqaku.

²⁴Yayáy, qanmi paykunata qowarqanki, chaymi munani ñoqaq kasqaypi paykunapas ñoqawan kuska kashanankuta, ahinapi hatunchawasqaykita rikunankupaq. Manaraq kay pacha kamasqa kashaqtinmi munakuwaspa hatunchawarqanki.

²⁵Chanin Yayáy, runakunaqa manan reqsisunkichu, ñoqan ichaqa reqsiyki, paykunapas yachankun qanpa kachamuwasqaykitaqa.

²⁶Ñoqan paykunaman pichus kasqaykita yachachirqani, yachachisaqraqtaqmi kanpas, munakuwasqaykita hina paykunapas hukkunata munakunankupaq, ñoqapas paykunawan huklla kanaypaq, nispa.