Read Quechua Cuzco Bible 1988 JUAN 18 Bible Online

JUAN 18 - Quechua Cuzco Bible 1988 bible

JUAN 18

¹Chaykunata nisqan qhepatan Jesusqa Kidrón wayq'onta chimpaman yachachisqankunapiwan rirqan. Chaypin huk huerta karqan, chaymanmi Jesusqa haykurqan yachachisqankunapiwan.

²Payta hap'ichiq Judaspas chay cheqastaqa rikurqanmi. Chaypin Jesusqa yachachisqankunapiwan sapa kuti huñukullaqpuni.

³Chaymi Judasqa sacerdote umallikunaq fariseokunaq*f** kachasqan Dios yupaychana wasi qhawaqkunatawan Roma llaqta soldadokunatawan huertaman pusarqan. Paykunan rirqanku lamparakunantin, nina k'anchakunantin, armakunantin ima.

⁴Chaymi Jesusqa tukuy imaymana payta sucedenanta yachaspa ñawpaqman lloqsimurqan, hinaspan paykunata tapurqan: —¿Pitan maskhashankichis? nispa.

⁵Hinan payta nirqanku: —Nazaret llaqtayoq Jesustan, nispa. Jesustaq paykunata nirqan: —Ñoqan kani, nispa. Payta hap'ichiq Judaspas paykunawanmi kasharqan.

⁶“Ñoqan kani” niqtintaq qhepanpamanta kutispa pampaman kumpakurqanku.

⁷Wakmantan Jesusqa tapullarqantaq: —¿Pitan maskhashankichis? nispa. Paykunataq nirqanku: —Nazaret llaqtayoq Jesustan, nispa.

⁸Chaymi Jesusqa nirqan: —“Ñoqan kani” niykichisñatáq. Ñoqata maskhawankichis chayqa, paykunaqa ripullachunku, nispa.

⁹[Chay hinapin hunt'akurqan: Qowasqaykikunamantaqa manan mayqellantapas chinkachirqanichu, nispa Jesuspa nisqan.]

¹⁰Hinaqtinmi Simón Pedroqa espadayoq kaspa, chaywan uma sacerdoteq kamachinta waqtaspa, paña ninrinta qhorurqorqan. Chay kamachiqa Malko sutiyoqmi karqan.

¹¹Chaymi Jesusqa Pedrota nirqan: —Espadaykita waqaychananman churapuy. Yayaypa qowasqan ñak'arinaytaqa, ¿manachu chaskiyman? nispa.

¹²Hinaqtinmi soldadokunaqa, umallinkupiwan, Dios yupaychana wasi qhawaqkunapiwan Jesusta hap'ispa watarqanku,

¹³hinaspan Caifaspa suegron Anaspamanraq aparqanku, Caifasmi chay wataqa uma sacerdote kashaspa,

¹⁴Judío umallikunata yuyaychasqa: Aswan allinmi huk runalla suyunchispa rantinpi wañunan, nispa.

¹⁵Simón Pedron huknin yachachisqa-masinpiwan Jesuspa qhepanta rirqan. Chay yachachisqaqa uma sacerdoteq reqsisqanmi karqan, chaymi Jesuswan uma sacerdoteq pationman haykurqan.

¹⁶Pedrotaq ichaqa hawallapi sayasharqan, punku qayllapi. Hinan uma sacerdoteq reqsisqan kaq yachachisqaqa lloqsimuspa punku qhawaq warmita valekuspa Pedrota pusaykurqan.

¹⁷Hinaqtinmi punku qhawaq warmi kamachiqa Pedrota nirqan: —¿Qanpas manachu chay runaq huknin yachachisqan kanki? nispa. Paytaq nirqan: —Manan ñoqachu kani, nispa.

¹⁸Kamachikunataq Dios yupaychana wasi qhawaqkunapiwan chirimusqanrayku ninata hap'ichikuspa sayaykuspa q'oñikusharqanku. Pedropas paykunawanmi sayaykuspa q'oñikushallarqantaq.

¹⁹Uma sacerdoten Jesusta tapurqan yachachisqankunamanta yachachikuyninmantawan.

²⁰Jesustaq payta nirqan: —Ñoqaqa sut'ipin lliw runaman rimarqani, ñoqaqa yachachirqanipunin Diosmanta yachachina wasikunapipas Dios yupaychana wasipipas, chaykunapin llapa runakuna huñukun, manan imatapas pakapiqa rimarqanichu.

²¹¿Imaraykutaq ñoqata tapuwanki? Tapuy uyariwaqniy runakunata, imatachus paykunaman nisqayta. Paykunan yachanku ñoqaq nisqaytaqa, nispa.

²²Chayta pay niqtintaq, Dios yupaychana wasi qhawaqmanta huknin chaypi kashaq Jesusta uyapi ch'aqlarqan: —¿Chay hinatachu uma sacerdoteman kutichinki? nispa.

²³Jesustaq payta nirqan: —Mana allinta rimani chayqa, willay mana allin rimasqayta, allintachus rimani chayqa, ¿imanaqtinmi ch'aqlawanki? nispa.

²⁴Anastaq watasqata Jesusta uma sacerdote Caifasman apachirqan.

²⁵Simón Pedroqa kaqllan sayaykuspa q'oñikusharqan. Hinan payta nirqanku: —¿Manachu qanpas chay runaq huknin yachachisqan kanki? nispa. Paytaq mananchakuspa: —Manan ñoqachu kani, nirqan.

²⁶Chaymantataq uma sacerdoteq hukkaq kamachin payta nirqan: —¿Manachu Jesustawan huertapi rikurqayki? nispa. Chay kamachiqa Pedroq ninrita qhorusqan runaq ayllunmi karqan.

²⁷Chaymi Pedroqa wakmanta mananchakurqan. Chayllamanmi galloqa waqarqan.

²⁸Caifaspa wasinmantan Jesusta kamachikuq Pilatoq wasinman aparqanku. Tutallamanta kaqtinmi Judío umallikunaqa wasiman mana haykurqankuchu, Diospa Alqaspa Pasarparisqan Yuyarina mikhunata mikhunankupaq mana qhellichakunankurayku.

²⁹Chaymi Pilatoqa paykunaman lloqsispa tapurqan: —¿Imamantan kay runata huchachankichis? nispa.

³⁰Paykunataq Pilatota nirqanku: —Allin ruwaq runa kaqtinqa, manachá entregaykikumanchu karqan, nispa.

³¹Hinan Pilatoqa paykunata nirqan: —Qankuna payta apaspa kamachikuy simiykichisman hina juzgamuychis, nispa. Judío umallikunataq payta nirqanku: —Ñoqaykuqa manan pitapas wañunanpaq huchachanaykupaq atiyniyoqchu kayku, nispa.

³²Chaymi karqan imaynatachus wañunanta entiendechispa Jesuspa nisqan simi hunt'akunanpaq.

³³Pilatotaq wakmanta wasinman haykurqan, hinaspan Jesusta waqyaspa tapurqan: —¿Qanchu Judío runakunaq Reynin kanki? nispa.

³⁴Jesustaq payta nirqan: —¿Qanchu chaytaqa nishawanki? Icha, ¿hukkunachu ñoqamanta nirqasunki? nispa.

³⁵Chaymi Pilatoqa nirqan: —¿Ñoqari Judío runachu kani? Llaqta-masiykikunan sacerdote umallikunapiwan ñoqamanqa qanta entregawan. ¿Imatataq ruwarqankiri? nispa.

³⁶Jesustaq nirqan: —Kamachikuyniyqa manan kay pachamantachu, kay pachamanta kanman chayqa, serviqniykunachari maqanakunkuman, Judío runakunaman mana entregasqa kanaypaq, aswanpas kamachikuyniyqa manan kay pachamantachu, nispa.

³⁷Chaymi Pilatoqa payta nirqan: —Chay hinaqa, ¿reypunichu qan kanki? nispa. Hinan Jesusqa nirqan: —Arí, ninkiñan rey kasqaytaqa. Cheqaq-kayta willanaypaqmi ñoqaqa nacerqani, chaypaqmi kay pachamanpas hamurqani. Pipas cheqaq-kaymanta kaqqa kunkaytan uyarin, nispa.

³⁸Chaymi Pilatoqa payta nirqan: —¿Imataq cheqaq-kayri? nispa. Hinaspan huktawan Judío runakunaman lloqsispa nirqan: —Manan ima huchatapas paypiqa tarinichu.

³⁹Costumbreykichismi ichaqa Diospa Alqaspa Pasarparisqan Yuyarina Fiestapi huk presota kacharinay. ¿Munankichischu Judío runakunaq Reyninta kacharinayta? nispa.

⁴⁰Hinan wakmanta llapanku qaparirqanku: —Ama chay runataqa kachariychu, aswanpas Barrabasta kachariy, nispa. Barrabasqa suwan karqan.