Read Quechua Cuzco Bible 1988 JUAN 2 Bible Online

JUAN 2 - Quechua Cuzco Bible 1988 bible

JUAN 2

¹Iskay p'unchay qhepatataq Galilea provinciapi kaq Caná llaqtapi casarakuq karqan. Jesuspa mamanpas chaypin kasharqan.

²Jesuspas yachachisqankunapiwanmi casarakuqpaman waqyasqa karqan.

³Vino pisiqtinmi Jesuspa mamanqa Jesusta nirqan: —Manan vinonku kapunchu, nispa.

⁴Chaymi Jesusqa payta nirqan: —Mamáy, ¿imanaqtintaq chayta niwanki? Horayqa manaraqmi chayamunchu, nispa.

⁵Mamantaq serviqkunata nirqan: —Llapan nisqasuykichistan ruwankichis, nispa.

⁶Chaypin kasharqan Judío runakunaq ch'uyanchakuyninman hina unupaq soqta rumi urpukuna, sapankamanmi chunka hatun p'uyñu unu haykuq.

⁷Jesustaq serviqkunata nirqan: —Unuta hunt'achiychis kay urpukunaman, nispa. Hinan hunt'atapuni hunt'achirqanku.

⁸Chaymantataq paykunata nirqan: —Kunanqa wisiychis, hinaspa despenseroman haywaychis, nispa. Chaymi payman haywarqanku.

⁹Despenserotaq vinoman tukuchisqa unuta malliykuspa mana yacharqanchu maymantachus kasqanta, serviqkunan ichaqa yacharqanku unumanta wisimusqankuta. Chaymi despenseroqa noviota waqyaspa

¹⁰nirqan: —Llapa runan sumaq vinota ñawpaqtaqa haywan, allintaña ukyaqtinkutaq ima kaqllataña haywan, qanmi ichaqa sumaqkaq vinota kunankama waqaychasqanki, nispa.

¹¹Chay ñawpaqkaq milagrotan Jesusqa ruwarqan Galileapi kaq Caná llaqtapi, ahinapin musphana atiyninta rikuchirqan, chaymi yachachisqankunaqa paypi iñirqanku.

¹²Chay qhepatataq Jesusqa mamantin, wawqenkunantin, yachachisqankunantin ima Capernaum llaqtaman rirqanku, hinaspan pisi p'unchaykunallata chaypi qhepakurqanku.

¹³Judío runakunaq Diospa Alqaspa Pasarparisqan Yuyarina Fiestan qayllaykamushaqtinmi Jesusqa Jerusalén llaqtaman wicharqan.

¹⁴Hinaspan Dios yupaychana wasi patiopi tarirqan torokuna, ovejakuna, urpikuna vendeqkunata, tiyaykuspa qolqe cambiaqkunatapas.

¹⁵Chaymi Jesusqa waskhamanta hasut'ita ruwarqospa qarqomurqan Dios yupaychana wasi patiomanta llapa ovejakunatapas torokunatapas, cambiaqkunaq mesankutapas tikrarparispan qolqenkuta hich'arparirqan.

¹⁶Urpi vendeqkunatapas nirqan: —¡Chaykunata kaymanta horqoychis! ¡Yayaypa wasintaqa ama qhatuna wasimanchu tukuchiychis! nispa.

¹⁷Hinaqtinmi yachachisqankunaqa Diospa Siminpi kay hina qelqasqata yuyarirqanku: Yupaychana wasiykitan wañuytapuni munakuni, niqta.

¹⁸Chaymi Judío umallikunaqa payta nirqanku: —Kaykunata ruwanaykipaq atiyniyoq kasqaykita yachanaykupaq milagrota rikuchiwayku, nispa.

¹⁹Jesustaq nirqan: —Thuniychis kay yupaychana wasita, kinsa p'unchaypitaqmi sayarirqochisaq, nispa.

²⁰Judío umallikunataq nirqanku: —Tawa chunka soqtayoq watapin kay yupaychana wasiqa sayarichisqa karqan. ¿Qantaqchu kinsa p'unchayllapi sayarichiwaq? nispa.

²¹Jesusqa chayta nispaqa pay kikinpa cuerponmantan rimarqan.

²²Chay rimasqantan yachachisqankunaqa wañusqanmanta Jesús kawsarimpuqtin yuyarirqanku, hinaspan Diospa Simin Qelqatapas Jesuspa nisqan simitapas creerqanku.

²³Diospa Alqaspa Pasarparisqan Yuyarina Fiesta Jerusalén llaqtapi kashaqtinmi Jesuspi askha iñirqanku, milagrokunata ruwasqanta rikuspa.

²⁴Ichaqa kikin Jesusmi paykunapi mana confiakurqanchu, llapankuta reqsisqanrayku.

²⁵Manataq necesitarqanchu pipas runamanta payman ima willanantapas, runapi ima kasqantapas pay yachasqanrayku.