Read Quechua Cuzco Bible 1988 JUAN 3 Bible Online

JUAN 3 - Quechua Cuzco Bible 1988 bible

JUAN 3

¹Huk runan karqan fariseokunamanta*f** Nicodemo sutiyoq, Judío runakunaq umallin.

²Paymi Jesusman tutalla rispa nirqan: —Yachachikuq, yachaykun yachachinaykipaq Diospa kachamusqasuykita. Manan pipas ruwasqayki milagrokunataqa ruwayta atinmanchu manachus Dios paywan kanman chayqa, nispa.

³Jesustaq payta nirqan: —Cheqaqtapunin niyki, pipas Diospa kamachikushasqanpi kananpaqqa wakmantan nacenan, nispa.

⁴Nicodemotaq payta nirqan: —¿Imaynataq runari yuyaqña kashaspa naceyta atinman? Icha, ¿mamanpa wiksanman kutiykuspachu wakmanta nacemunman? nispa.

⁵Jesustaq nirqan: —Cheqaqtapunin niyki, pipas Diospa kamachikushasqanpi kananpaqqa unumantawan Diospa Espiritunmantawanmi nacenan.

⁶Runamanta naceqqa runallan, Espiritumanta naceqpas espiritun.

⁷Ama musphaychu: “Wakmantan nacenaykichispuni” nisqaywanqa.

⁸Wayraqa may munasqanmantan wayramun, suenasqallantan uyarinki, manataqmi yachankichu maymanta hamusqantapas, maymanchus risqantapas, chay hinallataqmi Espiritumanta pipas naceqqa, nispa.

⁹Nicodemotaq payta tapurqan: —¿Imaynataq kayri kanman? nispa.

¹⁰Chaymi Jesusqa nillarqantaq: —¿Israel runakunata yachachiq kashaspachu qanqa chayta mana yachanki?

¹¹Cheqaqtapunin niyki, ima yachasqaykutan rimayku, ima rikusqaykutataqmi willaykupas, willasqaykutataqmi mana chaskinkichischu.

¹²Kay pacha kaqkunamanta qankunaman nishaqtiy mana iñinkichischu chayqa, ¿imaynatataq iñiwaqchis hanaq pacha kaqkunamanta niykichisman chayqa?

¹³Manan pipas hanaq pachamanqa wicharqanchu, aswanpas hanaq pachamanta uraykamuqllan, paymi Diospa Kachamusqan Runa.

¹⁴Imaynan Moisesqa ch'inneqpi broncemanta mach'aqwayta warkurqan, chay hinallataqmi Diospa Kachamusqan Runapas warkusqa kanqa,

¹⁵pipas paypi iñiqqa wiñay kawsayniyoq kananpaq.

¹⁶Diosqa anchatapunin runakunata munakurqan, chaymi sapan Churinta qomurqan, pipas paypi iñiqqa ama wiñaypaq wañunanpaq, aswanpas wiñaypaq kawsananpaq.

¹⁷Diosqa kay pachaman Churinta kachamurqan manan runakunata huchachananpaqchu, aswanmi runakunata qespichinanpaq.

¹⁸Diospa Churinpi iñiqqa manan huchachasqachu, paypi mana iñiqmi ichaqa huchachasqaña, Diospa sapan Churinpi mana iñisqanrayku.

¹⁹Kaymi huchachayqa: K'anchaymi kay pachaman hamurqan, runakunataq laqhayaqta aswanta munakurqanku, ruwasqanku mana allin kasqanrayku. Chaymi Diosqa paykunata huchachan.

²⁰Pipas mana allinkaqta ruwaqqa k'anchaytan cheqnikun, manataq k'anchayman hamunchu, ruwasqankuna mana sut'inchasqa kananpaq.

²¹Cheqaqkaqta ruwaqmi ichaqa k'anchayman hamun, chhaynaqa k'anchaymi rikuchin ruwasqankunaqa Diospa yanapasqan kasqanta, nispa.

²²Chay qhepatan Jesusqa yachachisqankunapiwan Judea ladoman rirqan, chaypi paykunawan qhepakuspataq runakunata bautizarqan.

²³Juanpas bautizallarqantaqmi Salim qaylla Enonpi, askha unu chaypi kasqanrayku. Runakunan rispa bautizachikurqanku.

²⁴Juanqa manaraqmi carcelman wisq'asqachu karqan.

²⁵Juanpa wakin yachachisqankunataq ch'uyanchakuymanta Judío-masin runawan tapunakurqan.

²⁶Juanman rispataq nirqanku: —Yachachikuq, Jordán mayu inti lloqsimuy ladopin huk runa qanwan karqan, paymantan qanqa willawarqankiku, kunanqa paymi bautizashan, llapallataqmi payman rishanku, nispa.

²⁷Hinan Juanqa nirqan: —Manan runaqa imatapas chaskiyta atinmanchu Dios payman mana qoqtinqa.

²⁸Qankuna kikiykichismi uyariwarqankichis: Manan ñoqachu Diospa Akllasqan Cristoqa kani, aswanpas paypa ñawpaqenta Diospa kachamusqallanmi kani, nispa nisqayta.

²⁹Casarakuypiqa noviollan noviayoqqa, novioq amigontaq paypa rimasqanta uyarispa sinchitapuni q'ochukun, chay hinan ñoqapas sinchitapuni q'ochukushani.

³⁰Payqa aswan-aswan reqsisqan kanan, ñoqataqmi manaña ancha resisqachu kanay, nispa.

³¹Hanaq pachamanta hamuqqa lliwpa qollananmi, kay pachamanta kaqqa kay pachallamantan, kay pacha kaqkunallamantataq rimanpas. Hanaq pachamanta hamuqmi ichaqa lliwpa qollanan.

³²Payqa imachus rikusqantan uyarisqantan willakun, manataq pipas willakusqantaqa chaskinchu.

³³Willakusqanta chaskiqmi ichaqa, Diospa nisqanta cheqaqpaq hap'in.

³⁴Diospa kachamusqanqa Diospa siminkunatan riman, Diosqa Espiritunta mana mich'akuspan payman qon.

³⁵Yayaqa Churintan munakun, chaymi lliwta qorqan pay kamachikunanpaq.

³⁶Churipi iñiqqa wiñay kawsayniyoqmi, Churipi mana iñiyta munaqmi ichaqa chay kawsayman mana haykunqachu, aswanmi Diospa phiñakuynin paypaqqa kaqlla kashan, nispa.