Read Quechua Cuzco Bible 1988 JUAN 4 Bible Online

JUAN 4 - Quechua Cuzco Bible 1988 bible

JUAN 4

¹Fariseokunan*f** uyarisqaku: Juanpa yachachisqankunaqa pisillan, Jesusmi yachachisqakunata askhayachishan bautizashanpas, nispa, nisqata.

²Kikin Jesusqa manan bautizarqanchu, aswanpas yachachisqankunallan.

³Fariseokunaq*f** rimasqanta yachaspan Jesusqa Judeamanta lloqsispa Galileaman kutipurqan.

⁴Samaria provinciantapunin pasanan karqan.

⁵Hinaspan Samariapi Sikar nisqa llaqtaman chayarqan, Jacobpa José churinman chakrata qosqan qayllaman.

⁶Chaypin Jacobpa p'uytun nisqa karqan. Jesusmi purimusqanpi sayk'usqa kaspa p'uytu patapi tiyaykurqan. Chawpi p'unchay hinan karqan.

⁷Yachachisqankunaqa llaqtatan rirqanku mikhunata rantimuq. Chayllamanmi Samaria llaqtayoq warmi unu aysakuq hamurqan, paytan Jesusqa nirqan: —Unuta ukyaykachiway, nispa.

⁸

⁹Chaymi Samaria warmiqa payta nirqan: —¿Imaynan qanqa Judío runa kashaspa ñoqamanta unuta mañakuwanki, Samaria warmi kashaqtiy? nispa. (Judío runakunaqa Samaria runakunaq ukyasqanpiqa manan ukyaqkuchu).

¹⁰Hinan Jesusqa payta nirqan: —Diospa qonasuykitachus yachawaq, “ukyaykachiway” niqniykitapas reqsiwaq chayqa, qanchari ñoqamanta mañakuwankiman, ñoqataq kawsachiq unuta qoykiman, nispa.

¹¹Warmitaq nirqan: —Wiraqocháy, manamá imawan aysanaykipas kanchu, p'uytupas ukhutaq. ¿Maymantataq chay kawsachiq unuta qowankiman?

¹²¿Kurakchu kanki Jacob machulaykumanta? Paymi kay p'uytuta saqewarqanku, kaymantan paypas wawankunapas uywankunapas ukyarqan, nispa.

¹³Jesustaq payta nirqan: —Pipas kay unuta ukyaqqa wakmantan ch'akichikunqa.

¹⁴Ñoqa qosaq chay unuta ukyaqmi ichaqa manaña hayk'aqpas ch'akichikunqachu, aswanmi ñoqa qosaq chay unuqa phullpumuq unu pukyu hina paypi kanqa, hinaspa wiñay kawsayta qonqa, nispa.

¹⁵Chaymi warmiqa nirqan: —Wiraqocháy, chay unuta qoykuway, amaña ch'akichikunaypaq, amañataq kaykama aysakuq hamunaypaqpas, nispa.

¹⁶Hinan Jesusqa payta nirqan: —Phaway, qosaykita waqyarqamuy, nispa.

¹⁷Warmitaq nirqan: —Manan qosayqa kanchu, nispa. Hinan Jesusqa nirqan: —Allintan ninki: Manan qosayqa kanchu, nispayki.

¹⁸Phisqa qosayoqmi karqanki riki, kunan qanwan tiyaqqa manan qosaykichu, chaytaqa cheqaqtan ninki, nispa.

¹⁹Chaymi warmiqa nirqan: —Wiraqocháy, profetamá*f** qanqa kasqanki.

²⁰Kay orqopin machulaykuqa Diosta yupaycharqanku, qankunataq “Jerusalén llaqtapin yupaychananchisqa” ninkichis, nispa.

²¹Jesustaq payta nirqan: —Warmi, creeway, tiempon chayamushan, manan kay orqopichu, manallataq Jerusalén llaqtapipaschu Yayata adoranaykichis.

²²Qankunaqa mana entiendesqaykichistan yupaychankichis, ñoqaykun ichaqa pitachus reqsisqaykuta yupaychayku. Judío runakunamantan Diospa kachamusqan qespichiqqa hamun.

²³Ichaqa tiempon chayamushan, chayarqamunñan, chay pachan cheqaq yupaychaqkunaqa Yayata yupaychanqaku Diospa Espiritunpa yanapasqan Diospa kayninman hinapuni, Yayaqa chay hina yupaychaqkunatan munan payta yupaychanankupaq.

²⁴Diosqa Espiritun, payta yupaychaqkunaqa Diospa Espiritunpa yanapasqan Diospa kayninman hinapunin yupaychananku, nispa.

²⁵Warmitaq nirqan: —Yachanin Diospa Akllasqan Cristo nisqa Mesiaspa hamunanta, paymi hamuspan lliw imaymanata sut'inchawanqaku, nispa.

²⁶Hinan Jesusqa nirqan: —Ñoqa rimapayaqniykin chay Mesiasqa kani, nispa.

²⁷Chay raton yachachisqankunaqa hamurqanku, hinaspan warmiwan rimasqanmanta muspharqanku, ichaqa manan mayqenpas warmita nirqanchu: ¿Imatan munanki? nispa. Manallataq Jesustapas nirqanchu: —¿Imatan paywan rimashanki? nispapas.

²⁸Hinaqtinmi warmiqa p'uyñunta saqerparispa llaqtata rirqan, hinaspan runakunaman willamurqan:

²⁹—Hamuychis, lliw ruwasqaykunata niwaqniy runata rikumuychis. ¿Paychu icha Diospa Akllasqan Cristoqa kanman? nispa.

³⁰Chaymi llaqtamanta lloqsispa Jesuspa kasqanman hamurqanku.

³¹Chaykamataq yachachisqankunaqa Jesusta rogarqanku: —Yachachikuq, mikhuykuy, nispanku.

³²Jesustaq ichaqa yachachisqankunata nirqan: —Ñoqaq mikhunayqa qankunaq mana reqsisqaykichis mikhunan kashan, nispa.

³³Chaymi yachachisqankunaqa ninakurqanku: —¿Pipaschá mikhunata payman apamurqan? nispa.

³⁴Jesustaq paykunata nirqan: —Mikhunayqa kachamuwaqniy Yayaq munayninta ruwaspa paypa ruwananta hunt'anaymi.

³⁵Qankunan ninkichis: Tawa killaraqmi ichhunapaqqa kashan, nispa. Ñoqataq niykichis: Chakrakunata allinta qhawariychis, ichhunapaqmi poqosqaña kashan.

³⁶Ichhuqqa Diosmantan pagota chaskin, hinaspan ruruta hina wiñay kawsaypaq huñun, ahinatan t'akaqpas ichhuqpas kuska kusikunqaku.

³⁷Chay hinapin: Hukmi t'akan, huktaq ichhun, nispa nisqaqa cheqaqpuni.

³⁸Mana llank'asqaykichismanmi ichhumunaykichispaq kacharqaykichis, hukkunan llank'arqanku, qankunataq llank'asqankuman haykurqankichis, nispa.

³⁹Chay llaqtapi Samaria runakunataq Jesuspi askha iñirqanku: Lliw ruwasqaykunatan niwan, nispa warmiq nisqanrayku.

⁴⁰Chaymi Samaria runakunaqa Jesusman hamuspa paykunawan qhepakunanpaq rogakurqanku. Hinan chaypi payqa iskay p'unchayta qhepakurqan.

⁴¹Jesuspa siminta uyarispataq aswan askha iñirqanku.

⁴²Chaymi warmita nirqanku: —Manañan qanpa nisqallaykiwanchu Jesuspi iñiyku, kikiykun uyarimuyku, hinaspan yachayku payqa cheqaqtapuni lliw runakunata Qespichiq Cristo kasqanta, nispa.

⁴³Iskay p'unchay qhepatataq chaymanta lloqsispa Jesusqa Galilea provinciaman rirqan.

⁴⁴Kikin Jesusmi rimarisqa: Profetaqa*f** llaqtanpin pisichasqa kashan, nispa.

⁴⁵Galileaman chayaqtintaq chaypi kaqkunaqa payta chaskirqanku, Jerusalén llaqtaman rispa fiestapi paypa imaymana ruwasqanta rikusqankurayku.

⁴⁶Jesusqa wakmantan Galileapi kaq Caná llaqtaman rirqan, unuta vinoman tukuchisqan llaqtaman. Chaykamataq Capernaum llaqtapi reypa huknin oficialninpa churin onqosharqan.

⁴⁷Chay oficialmi Judeamanta Galileaman Jesuspa chayasqanta yachaspa Jesusman rirqan, hinaspan rogakurqan Canamanta Capernaumman uraykuspa wañunayashaq churinta qhaliyachimunanpaq.

⁴⁸Chaymi Jesusqa payta nirqan: —Manachus musphana milagrokunatapas rikunkichis chayqa, manan ñoqapi iñiwaqchischu, nispa.

⁴⁹Reypa oficialnintaq payta nirqan: —Ama hinachu kay, uraykuypuni, manaraq churiy wañurqoshaqtin, nispa.

⁵⁰Hinan Jesusqa nirqan: —Ripuy, churiykiqa kawsashanmi, nispa. Chaymi runaqa Jesuspa nisqanta creerqan, hinaspan ripurqan.

⁵¹Oficial Capernaum llaqtaman uraykushaspataq kamachinkunawan tuparqan, chaymi willarqanku: —Churiykiqa kawsashanmi, nispa.

⁵²Hinan paykunata tapurqan ima horastachus qhaliyasqanta. Paykunataq nirqanku: —Qayna p'unchay doce wasapayta hinan fiebre onqoyqa thanirqapurqan, nispa.

⁵³Chaymi taytaqa repararqan chay horasta: Churiykiqa kawsashanmi, nispa, Jesuspa nisqanta, hinaspan payqa llapa familiantin Jesuspi iñirqan.

⁵⁴Chay iskaykaq milagrotan Jesusqa ruwarqan Judeamanta Galileaman kutispa.