Read Quechua Cuzco Bible 1988 JUAN 5 Bible Online

JUAN 5 - Quechua Cuzco Bible 1988 bible

JUAN 5

¹Chaykuna qhepatan Judío runakunaq fiestan karqan, chaymi Jesusqa Jerusalén llaqtaman kutirqan.

²Jerusalén llaqtapin Oveja Punku nisqa qayllapi huk estanque karqan phisqa portalniyoq, Hebreo rimaypin Betesda nisqa.

³Chay portalkunapin askha onqosqakuna, ñawsakuna, such'ukuna, cuerpon ch'akisqakunapas sirisharqanku, [unuq aytirikunanta suyakuspanku.

⁴Huk angelmi may kutillanpi estanqueman uraykamuq, hinaspan unuta aytiriq, unu aytirikuqtinña estanqueman pipas ñawpaqta haykuqtaq ima onqoyniyoqña kashaspapas qhaliyaq.][1]

⁵Chaypin kasharqan kinsa chunka pusaqniyoq wataña onqosqa runa.

⁶Jesustaq chayta sirishaqta rikuspa, unayña chay hina kasqanta entiendespa payta nirqan: —¿Munankichu qhaliyayta? nispa.

⁷Onqosqataq nirqan: —Wiraqocháy, manan piniypas kanchu unu aytirikuqtin hina estanqueman apaykuwananpaq, kikiy rinaykamaqa hukmi llallirqapuwan, nispa.

⁸Jesustaq payta nirqan: —Sayariy, puñunaykita aparikuspa ripuy, nispa.

⁹Hinan chay runaqa qhaliyarqanpacha, puñunanta aparikuspataq ripurqan. Chay p'unchayqa samana p'unchaymi karqan.

¹⁰Chaymi Judío umallikunaqa chay qhaliyachisqa runata nirqanku: —Kunanqa samana p'unchaymi, kamachikuy simiman hinaqa manan puñunaykita apawaqchu, nispa.

¹¹Hinan paykunata nirqan: —Kikin qhaliyachiwaqniymi nimuwan: Puñunaykita aparikuspa ripuy, nispan, nispa.

¹²Chaymi paykunaqa tapurqanku: —¿Pin nimurqasunki: Puñunaykita aparikuspa ripuy, nispa? nispanku.

¹³Qhaliyachisqa runataq mana yacharqanchu pichus kasqanta, askha runa ukhupi Jesuspa chinkarqosqanrayku.

¹⁴Chaymantañan Jesusqa payta Dios yupaychana wasipi tarispa nirqan: —¿Qhaliyachisqañan kashanki, ama astawan huchallikuychu, ama imapas aswan mana allin kanasuykipaq, nispa.

¹⁵Paytaq rispa Judío umallikunaman willamurqan qhaliyachiqninqa Jesús kasqanta.

¹⁶Chay hawan Judío umallikunaqa Jesusta qatiykacharqanku, samana p'unchaypi chaykunata ruwaqtin.

¹⁷Jesustaq paykunata nirqan: —Yayayqa llank'ashallanpunin, ñoqapas llank'ashallanitaqmi, nispa.

¹⁸Chayraykutaqmi Judío umallikunaqa astawan payta wañuchiytapuni munarqanku, manan samana p'unchaymanta kamachikuy simita p'akisqanraykullachu, aswanmi “Diosqa Taytaymi” nispa Dioswan kuskachakusqanrayku.

¹⁹Jesusmi paykunata nirqan: —Cheqaqtapunin niykichis, ñoqa Churiqa kikiymanta manan imatapas ruwayta atiymanchu, aswanmi Yayaq ruwasqan rikusqallayta, Yayaq lliw ruwasqallantataqmi ñoqa Churipas ruwani.

²⁰Yayaqa ñoqata munakuwaspanmi lliw imaymana ruwasqanta rikuchiwan, aswan hatun ruwaykunataraqmi ruwanaypaq rikuchiwanqa, chay hinapi qankuna musphanaykichispaq.

²¹Imaynan Yayaqa wañusqakunata sayarichin, hinaspa kawsachin, chay hinallataqmi ñoqa Churipas pikunatachá kawsachiyta munani chaykunata kawsachini.

²²Yayaqa manan pitapas juzganchu, aswanmi lliwta juzgaqpaq ñoqa Churita churawarqan,

²³llapa runa yupaychawanankupaq, imaynan Yayata yupaychanku hinata. Pipas ñoqa Churita mana yupaychaspaqa kachamuwaqniy Yayatapas manan yupaychashallantaqchu.

²⁴Cheqaqtapunin niykichis: Pipas simiyta uyariq, hinaspa kachamuwaqniy Yayapi iñiqqa wiñay kawsayniyoqmi, manan huchachasqañachu kanqa, aswanmi wañuymanta kawsayman pasanña.

²⁵Cheqaqtapunin niykichis: Tiempon chayamushan, chayarqamunñan, ñoqa Churinpa kunkayta wañusqakunaq uyarinanku, kasukuqkunataqmi kawsanqaku.

²⁶Imaynan Yayapas runakunaman kawsayta qon, chay hinallataqmi ñoqa Churimanpas atiyta qowarqan runakunaman kawsayta qonaypaq,

²⁷paypa kachamusqan Runa kasqayraykun juzganaypaqpas atiyta qowarqan.

²⁸Ama kay nisqaywanqa musphaychischu, aya p'ampanakunapi lliw kaqkunaq kunkayta uyarinanku tiempon chayamunqa.

²⁹Allinkaqta ruwaqkunaqa kawsanankupaqmi kawsarimpunqaku, mana allinkaqta ruwaqkunataq ichaqa Diospa huchachasqan kanankupaq kawsarimpunqaku, nispa.

³⁰Ñoqaqa manan ima ruwaytapas kikillaymantaqa atinichu. Yayaypa niwasqanman hinan juzgani, chaymi jusgasqayqa chaninpuni. Manan munayniytachu ruwayta munani, aswanmi kachamuwaqniy Yayaq munayninta.

³¹Ñoqa kikiymantachus willakuni chayqa, willakusqayqa manan cheqaqpaq hap'isqachu kanman.

³²Hukmi ñoqamanta willaqqa, payqa Yayaymi, yachanitaqmi ñoqamanta willasqanqa cheqaq kasqanta.

³³Qankunan Juanman tapuqta kacharqankichis, paytaq ñoqamanta cheqaqkaqta willarqan.

³⁴Ñoqaqa manan runaq willakunantaqa necesitanichu, aswanmi Juanmanta rimani qankuna qespichisqa kanaykichispaq.

³⁵Juanmi k'anchashaq lámpara hina karqan, qankunataq pisi tiempollata k'anchayninpi kusikuyta munasharqankichis.

³⁶Ñoqaq ruwasqaymi ichaqa Juanpa willasqanmantapas aswantaraq ñoqamanta willakun. Yayaq qomuwasqan ruwaykunatan hunt'ashani, chay ruwasqaykunan willakun Yayaq kachamuwasqan kasqayta.

³⁷Kachamuwaqniy kikin Yayallataqmi ñoqamanta willakun. Manan hayk'aqpas kunkanta uyarirqankichischu, manataq rikch'aynintapas rikurqankichischu.

³⁸Paymi ñoqata kachamuwarqan, ichaqa siminta manan hap'inkichischu, ñoqapi mana iñisqaykichisrayku.

³⁹Diospa Simin Qelqatan allinta t'aqwishankichis chaypi wiñay kawsay qankunapaq kasqanta yuyaspa, chay Qelqaqa ñoqamantan willakun.

⁴⁰Chaywanpas manan ñoqaman hamuyta munankichischu wiñay kawsayniyoq kanaykichispaq.

⁴¹Runakunaq hatunchawanantaqa manan munanichu.

⁴²Ichaqa ñoqan reqsiykichis qankunaqa Diosta mana munakuq kasqaykichista.

⁴³Yayaypa sutinpin ñoqa hamuni, manataq chaskiwankichischu, wak runataqchus cuentanman hamunman chayqa, chaytaqa chaskiwaqchismi.

⁴⁴Qankunaqa qankuna puran hatunchanakuyta munankichis, ichaqa manan Diospa hatunchanantachu munankichis, chay hinari, ¿imaynatataq ñoqapi iñiwaqchis?

⁴⁵Ama yuyaychischu Yayaq qayllanpi ñoqa qankunata huchachanaytaqa, kanmi huchachaqniykichis, chayqa Moisesmi, paypin qankunaqa suyakushankichis.

⁴⁶Moisesta qankuna creewaqchis chayqa, ñoqatapas creewankichismanmi, payqa ñoqamantan qelqarqan.

⁴⁷Moisespa qelqasqankunata mana creeshaspaykichisqa, ¿imaynatan simiykunata creewaqchis? nispa.