Read Quechua Cuzco Bible 1988 JUAN 6 Bible Online

JUAN 6 - Quechua Cuzco Bible 1988 bible

JUAN 6

¹Chaykuna qhepatataq Jesusqa ripurqan Galilea qocha chimpaman (Chay qochatan Tiberias nillaqkutaq).

²Askha runakunataq paypa qhepanta rirqanku, onqosqakunata qhaliyachisqanta rikusqankurayku.

³Jesusmi orqoman wichaspa, yachachisqankunawan chaypi tiyaykurqan.

⁴Judío runakunaq Diospa Alqaspa Pasarparisqan Yuyarina Fiestantaq sispaykamusharqanña.

⁵Jesustaq askha runakuna payman hamusqanta rikuspa Felipeta nirqan: —¿Maymantan t'antata rantimusun kaykunaq mikhunanpaq? nispa.

⁶Chaytaqa nirqan ima nillanqas nispan. Jesusqa yacharqanmi ima ruwaytapas.

⁷Felipen nirqan: —Iskay pachak jornal qolqe t'antapas manan aypanmanchu, sapanka huk chhikallantapas mikhunanpaq, nispa.

⁸Simón Pedroq wawqen Andresmi huknin yachachisqan karqan, paymi nirqan:

⁹—Kaypin kashan huk waynacha phisqa cebada t'antayoq, iskay challwayoq ima, chaypas manan kay askha runamanqa aypanmanchu, nispa.

¹⁰Chaymi Jesusqa nirqan: —Runakunata tiyaykachiychis, nispa. Chay cheqastaq q'achu-q'achu pampa karqan, chaypin phisqa waranqa hina qharikuna tiyaykurqanku.

¹¹Jesustaq chay t'antakunata hap'ispa, Diosman graciasta qospaña chay tiyaqkunaman rakirqan. Kaqllataq challwakunatapas may chhikatachus munasqankuman hina rakirqan.

¹²Saksaqtinkuñataq yachachisqankunata nirqan: —Hoqarimpuychis puchuq p'akisqakunata ama imapas usunanpaq, nispa.

¹³Mikhusqanku phisqa cebada t'antamanta puchuq p'akisqakunatan hoqarirqanku chunka iskayniyoq canasta hunt'ataraq.

¹⁴Hinan chay runakunaqa Jesuspa milagro ruwasqanta rikuspa nirqanku: —Kayqa cheqaqtapunin kay pachaman hamunan karqan chay profeta*f**, nispa.

¹⁵Jesustaq payta reyta churanankupaq hap'irqonankuta reparaspa, wakmanta sapallan orqoman kutirqan.

¹⁶Ch'isiña kaqtintaq Jesuspa yachachisqankunaqa orqomanta qochaman uraykurqanku.

¹⁷Hinaspan boteman haykuspa, Capernaum llaqtaman qochanta chimpasharqanku. Tutayapurqanñan, Jesustaq manaraq paykunaman tariparqanchu.

¹⁸Chayllamanmi qochaqa phoqchiqerqan sinchi wayraq wayrasqanwan.

¹⁹Huk legua kurakta hinaña botepi purishaspankutaq, Jesusta unu patanta purispa boteman sispaykamushaqta rikurqanku, chaymi mancharikurqanku.

²⁰Paytaq ichaqa nirqan: —Ñoqan kani, ama mancharikuychischu, nispa.

²¹Hinaqtinmi paykunaqa botepi kusisqa payta chaskiyta munashaqtinku boteqa chayarqanpacha risqanku hallp'aman.

²²Qhepantin p'unchaytaq qocha chimpapi qhepaq askha runakunaqa repararqanku chaypiqa ch'ullalla bote kashasqanta, chaymanqa Jesuspas yachachisqankunawan mana haykusqanta, aswanpas yachachisqankunalla ripusqanta.

²³Chayllamanmi Tiberias llaqtamanta botekuna chayarqan, Señor Jesuspa graciasta qospa t'antata mikhuchisqan qayllaman.

²⁴Jesusta yachachisqankunatawan chaypi mana rikuspankutaq runakunaqa botekunaman haykurqanku, hinaspan Capernaum llaqtaman chimparqanku Jesusta maskhaspa.

²⁵Runakunaqa qocha chimpapi Jesusta tarispan nirqanku: —Yachachikuq, ¿hayk'aqtaq kayman chayamurqanki? nispa.

²⁶Jesustaq paykunata nirqan: —Cheqaqtapunin niykichis, maskhawankichisqa manan milagrokunata rikusqaykichisraykuchu, aswanpas t'antata mikhuspa saksasqaykichisraykun.

²⁷Ama tukukuq mikhunallapaqchu llank'aychis, aswanpas wiñay kawsayta qoq mana tukukuq mikhunapaq llank'aychis, chaytan Diospa Kachamusqan Runaqa qosqaykichis, ñoqatan Dios Yayaqa: Allinpuni, niwarqan.

²⁸Hinan payta nirqanku: —¿Imatataq ruwasaqku Diospa munayninta ruwanaykupaqri? nispa.

²⁹Jesustaq paykunata nirqan: —Diospaq ruwanaykichisqa ñoqapi iñinaykichismi, paymi ñoqata kachamuwarqan, nispa.

³⁰Chaymi payta nirqanku: —¿Ima milagrotataq qanqa ruwanki rikuspayku qanpi iñinaykupaq? ¿Imatataq ruwankiri?

³¹Machulaykuqa ch'inneqpin manna nisqa mikhunata mikhurqanku: Hanaq pacha t'antatan paykunaman mikhuchirqan, nispa, Diospa Simin Qelqaq nisqanman hina, nispa.

³²Chaymi Jesusqa paykunata nirqan: —Cheqaqtapunin niykichis, Moisesqa manan hanaq pacha t'antatachu qorqasunkichis, Yayaymi ichaqa hanaq pacha cheqaq t'antata qosunkichis.

³³Diospa qosqan t'antaqa hanaq pachamanta uraykamuspa runakunaman kawsayta qoqmi, nispa.

³⁴Hinan nirqanku: —Chay t'antataqa qoshallawaykupuni, nispa.

³⁵Chaymi Jesusqa paykunata nirqan: —Ñoqan kawsachiq t'antaqa kani, pipas ñoqaman hamuqqa manan hayk'aqpas yarqachikunqachu, pipas ñoqapi iñiqqa manan hayk'aqpas ch'akichikunqachu.

³⁶Ichaqa nirqaykichismi, rikuwashaspaykichispas manan iñinkichischu.

³⁷Yayaq lliw qowasqanqa ñoqamanmi hamunqa, pipas ñoqaman hamuqtaqa manapunin qarqosaqchu.

³⁸Hanaq pachamantaqa uraykamuni, manan munayniyta ruwanaypaqchu, aswanpas kachamuwaqniypa munayninta ruwanaypaqmi.

³⁹Kachamuwaqniy Yayayqa manan munanchu lliw qowasqanmanta mayqellantapas chinkachinayta, aswanpas p'uchukay p'unchaypi paykunata kawsarichimpunaytan munan.

⁴⁰Yayayqa munan pipas ñoqa Churita rikuwaspa iñiwanantan, hinaspa wiñay kawsayniyoq kananpaq. Ñoqataq p'uchukay p'unchaypi payta kawsarichimpusaq, nispa.

⁴¹Chaymi Judío runakunaqa Jesús contra chhuchupakurqanku “ñoqan hanaq pachamanta uraykamuq t'anta kani” nisqanmanta.

⁴²Hinaspan nirqanku: —¿Payqa manachu Josepa churin Jesús? Taytantapas mamantapas reqsinchismi riki. ¿Imaynataq kayri nin: Hanaq pachamantan uraykamuni, nispa? nispanku.

⁴³Jesustaq paykunata nirqan: —Ama chhuchupakuychischu.

⁴⁴Manan pipas ñoqaman hamuyta atinmanchu, kachamuwaqniy Yaya payta mana pusamuwaqtinqa, ñoqataq p'uchukay p'unchaypi kawsarichimpusaq.

⁴⁵Profetakunaq*f** qelqasqanpin nin: Llapallanmi Diospa yachachisqan kanqaku, nispa. Ahinaqa pipas Yayamanta uyarispa yachaqaqqa ñoqamanmi hamun.

⁴⁶Manan pipas Yayataqa rikurqanchu, aswanpas ñoqallan paytaqa rikurqani, paymanta hamusqayrayku.

⁴⁷Cheqaqtapunin niykichis: Ñoqapi iñiqqa wiñay kawsayniyoqmi.

⁴⁸Ñoqan kawsachiq t'antaqa kani.

⁴⁹Ch'inneqpin machulaykichisqa manna nisqa mikhunata mikhurqanku, chaywanpas wañukapurqankun.

⁵⁰Kaymi hanaq pachamanta uraykamuq t'antaqa, pipas chay t'antamanta mikhuqqa manan wañunqachu.

⁵¹Ñoqan hanaq pachamanta uraykamuq kawsachiq t'antaqa kani. Pipas chay t'antamanta mikhuqqa wiñaypaqmi kawsanqa, ñoqa qosaq chay t'antaqa cuerpoymi, chaytan qosaq runakuna kawsananpaq, nispa.

⁵²Hinaqtinmi Judío runakunaqa paykuna pura churanakurqanku: —¿Imaynatan kayqa cuerponta mikhuchiwasunman? nispa.

⁵³Hinan Jesusqa paykunata nirqan: —Cheqaqtapunin niykichis: Diospa Kachamusqan Runaq cuerpoyta mana mikhuspaykichisqa, yawarniytapas mana ukyaspaykichisqa manan kawsayniyoqchu kankichis.

⁵⁴Pipas cuerpoyta mikhun, yawarniytapas ukyan chaymi wiñay kawsayniyoqqa, p'uchukay p'unchaypitaqmi ñoqa payta kawsarichimpusaq.

⁵⁵Cuerpoyqa cheqaq mikhunan, yawarniypas cheqaq ukyanan.

⁵⁶Pipas cuerpoyta mikhun, yawarniytapas ukyan chayqa ñoqawanmi kashan, ñoqataq paywan kashani.

⁵⁷Kawsachiq Yayan kachamuwarqan, ñoqatapas paymi kawsachiwan, chay hinatan mikhuwaqniytapas kawsachisaq.

⁵⁸Chay hinan hanaq pachamanta uraykamuq t'antaqa, pipas chay t'antata mikhuqqa wiñaypaqmi kawsanqa. Chay t'antaqa manan machulaykichispa mikhusqan manna nisqa t'anta hinachu, paykunaqa mikhurqankun chaymantataq wañukapurqanku, nispa.

⁵⁹Chaykunatan Diosmanta yachachina wasipi nirqan, Capernaum llaqtapi yachachishaspa.

⁶⁰Chaymi Jesusta askha qatikuqkunaqa chaykunata uyarispa nirqanku: —Sinchi sasan kay simiqa, ¿piñataq atinman chay simi kasuyta? nispa.

⁶¹Jesustaq chay nisqanmanta chhuchupakusqankuta yachaspa paykunata nirqan: —¿Kay nisqaykunachu ñoqamanta iskayrayachisunkichis?

⁶²Diospa Kachamusqan Runata ñawpaq kasqayman wichashaqta rikuwaspaykichisqa, ¿ima niwaqchistaq?

⁶³Diospa Espiritunmi kawsachiqqa, runaqa manan imatapas atinchu, qankunaman nisqay simikunaqa Diospa Espiritunmantan, kawsaytataqmi qonpas.

⁶⁴Ichaqa wakinniykichismi mana iñiy munaqkuna kashankichis, nispa. (Jesusqa qallariymantapachan yacharqan pikunachus mana iñiqkuna kasqanta, pitaqchus hap'ichiqnin kasqantapas).

⁶⁵Jesusqa nillarqantaqmi: —Chayraykun nirqaykichis: Manan pipas ñoqaman hamuyta atinmanchu, manachus Yaya payta pusamuwanman chayqa, nispay, nispa.

⁶⁶Chaymantapachan Jesusta askha qatikuqkunaqa qhepaman kutipurqanku, manañataqmi paywan purirqankuñachu.

⁶⁷Hinan Jesusqa chunka iskayniyoq yachachisqankunata nirqan: —¿Qankunapas ripuyta munankichischu? nispa.

⁶⁸Chaymi Simón Pedroqa nirqan: —Señor, ¿pimantaq risaqku? Qanpa rimasqayki simikunaqa wiñaypaq kawsachiqmi.

⁶⁹Chaymi ñoqaykuqa iñiyku hinaspan yachayku qanqa Diospa kachamusqan mana huchayoq kasqaykita, nispa.

⁷⁰Jesustaq payta nirqan: —¿Manachu akllarqaykichisqa chunka iskayniyoqta? Chaywanpas hukniykichismi supay, nispa.

⁷¹Chaytaqa nirqan Simonpa churin Judas Iscariotemantan, paymi chunka iskayniyoqmanta huknin kashaspapas Jesusta hap'ichinanpaq karqan.