Read Quechua Cuzco Bible 1988 JUAN 7 Bible Online

JUAN 7 - Quechua Cuzco Bible 1988 bible

JUAN 7

¹Chaykuna qhepatan Jesusqa Galileapi purirqan, Judeapiqa manan puriyta munarqanchu, Judío umallikuna payta wañuchiytapuni munaqtinku.

²Judío runakunaq Ch'uklla Ruway Fiestanmi sispamusharqanña.

³Wawqenkunan Jesusta nirqanku: —Ama kaypichu qhepay, aswanpas Judeaman ripuy, chaypi yachachisqaykikunapas ruwasqaykikunata rikunankupaq.

⁴Pipas reqsichikuyta munaspaqa, manan pakapiqa imatapas ruwanchu. Milagrokunata ruwashaspaykiqa llapa runaq rikusqanyá ruway, nispa.

⁵Wawqenkunapas manan paypiqa iñirqankuchu.

⁶Jesustaq paykunata nirqan: —Ñoqaq tiempoyqa manaraqmi chayamunchu, qankunapaqmi ichaqa ima tiempopas allillan.

⁷Qankunataqa manan runakunaqa cheqnikusunkichismanchu, ñoqatan ichaqa cheqnikuwan ruwasqanku mana allin kasqanta sut'inchashasqayrayku.

⁸Qankunayá fiestamanqa wichaychis, ñoqaqa manaraqmi chay fiestamanqa wichasaqchu, tiempoyqa manaraq hunt'akusqanrayku, nispa.

⁹Chayta paykunaman nispataq Galileapi qhepakurqan.

¹⁰Wawqenkuna wichaqtinkutaq ichaqa, Jesuspas fiestamanqa wichallarqantaq, manan sut'itachu, aswanpas pakapi hinallan.

¹¹Judío umallikunataq payta maskharqanku: —¿Maypitaq chay runaqa? nispa.

¹²Jesusmantan runakuna anchata chhiwchinakurqanku. Wakinmi nirqanku: —Allin runan, nispa. Wakintaq nirqanku: —Manan, aswanpas runakunatan q'otun, nispa.

¹³Ichaqa manan pipas sut'ita paymanta rimaqchu Judío umallikunata manchakuspa.

¹⁴Kuskan fiestaña kashaqtintaq Jesusqa Dios yupaychana wasiman wicharqan, hinaspan yachachirqan.

¹⁵Chaymi Judío umallikunaqa musphaspa nirqanku: —¿Imaynatan kay runaqa mana yachachisqa kashaspa imaymanata yachan? nispa.

¹⁶Hinan Jesusqa paykunata nirqan: —Yachachikuyniyqa manan ñoqaqchu, aswanpas kachamuwaqniy Diospan.

¹⁷Pipas Diospa munayninta ruwayta munaqqa, yachanqan Diosmantachus yachachikuyniy kasqanta, icha ñoqa kikillaymantachus rimasqaytapas.

¹⁸Pay kikinmanta rimaqqa hukkunaq hatunchanallantan maskhan, kachamuqninpaq hatunchayta maskhaqmi ichaqa cheqaq-kayta rimaq, payqa chanintaqmi kanpas.

¹⁹Moisesqa kamachikuy simitan churapurqasunkichis riki. Chaywanpas manan mayqenniykichispas kamachikuy simitaqa hunt'ankichischu. ¿Imanaqtintaq wañuchiytapuni munashawankichis? nispa.

²⁰Runakunataq nirqanku: —Supaypa hunt'aykusqanmi kanki, ¿pin qanta wañuchiyta munashasunki? nispa.

²¹Jesustaq paykunata nirqan: —Huk milagrotan ruwarqani, chaymi lliwlla musphashankichis.

²²Moisesmi qhari-kay qaracha señalayta saqerqasunkichis, chaymi samana p'unchaypipas qhari wawata señalankichis. (Manan Moisespachu, aswanpas ñawpa machulakunaqmi karqan).

²³Moisespa kamachikuy simin mana p'akisqa kananpaqmi samana p'unchaypipas qhari wawata señalankichis, ¿chaychu ñoqapaq phiñakunkichis, samana p'unchaypi huk runata qhaliy-qhalita qhaliyachisqayrayku?

²⁴Ama imayna rikch'akusqanman hinallaqa juzgaychischu, aswanpas allin chaninchaywan juzgaychis, nispa.

²⁵Jerusalén llaqta wakin runakunataq nirqanku: ¿Manachu kay runaqa wañuchinankupaq maskhasqanku?

²⁶Qhawariychis, lliwpa rikusqanmi rimashan, manataq payta ima ninkupaschu. ¿Cheqaqtachu icha kamachikuqkunaqa yachanku paypuni Diospa Akllasqan Cristoqa kasqanta?

²⁷Chaywanpas reqsinchismi riki maymantachus kasqanta, Diospa Akllasqan Cristo hamuqtinmi ichaqa mana pipas yachanqachu maymantachus kasqanta, nispa.

²⁸Hinan Jesusqa Dios yupaychana wasipi yachachishaspa kunkayoqta nirqan: —¿Ñoqataqa reqsiwankichispunichu? ¿Yachankichischu maymantachus kasqaytapas? Manan kikiymantachu hamuni, kachamuwaqniy Yayan ichaqa cheqaq, paytan qankunaqa mana reqsinkichischu.

²⁹Ñoqaqa payta reqsinin paymanta hamusqayrayku, paytaqmi kachamuwarqan, nispa.

³⁰Chaymi Jesusta hap'iytapuni munarqanku, ichaqa manan pipas payta hap'irqanchu, manaraq hora chayamusqanrayku.

³¹Askha runakunataq paypi iñirqanku, hinaspan nirqanku: —Diospa Akllasqan Cristo hamuspaqa, ¿aswantaraqchu milagrokunata ruwanqa kay runaq ruwasqanmantaqa? nispa.

³²Fariseokunan*f** uyarirqanku Jesusmanta runakunaq chhiwchinakusqankuta, hinaspan sacerdote umallikuna fariseokunapiwan*f** Dios yupaychana wasi guardiakunata kacharqanku Jesusta hap'imunankupaq.

³³Chaymi Jesusqa nirqan: —Pisi tiempollatawanñan qankunawan kasaq, hinaspan kachamuwaqniyman kutipusaq.

³⁴Maskhawankichismi manataq tariwankichischu, maypichus ñoqa kasaq chaymanqa manan chayayta atiwaqchischu, nispa.

³⁵Chaymi Judío umallikunaqa ninakurqanku: —¿Maytataq kayri ripunqa mana tarimunanchispaq? ¿Wak llaqtakunapi ch'eqesqa Judío runakunaqtachu ripunqa? Icha, ¿mana Judío runakunata yachachiqchu rinqa?

³⁶¿Ima ninantataq kay runaqa nin: Maskhawankichismi manataq tariwankichischu, maypichus ñoqa kasaq chaymanqa manan chayayta atiwaqchischu, nispaqa? nispanku.

³⁷Fiesta tukukuy hatun p'unchaypin Jesusqa sayaykuspa kunkayoqta nirqan: —Pipas ch'akichikuqqa ñoqaman hamuchun hinaspa ukyachun.

³⁸Pipas ñoqapi iñiqmantaqa kawsachiq unu mayukunan sonqonmanta puririnqa, Diospa Simin Qelqaq nisqanman hina, nispa.

³⁹Jesusqa chayta nirqan paypi iñiqkuna Santo Espirituta chaskinankumantan, Santo Espirituqa iñiqkunaman manaraqmi hamurqanchu, Jesuspa hanaq pachaman manaraq kutisqanrayku.

⁴⁰Chayta uyarispan wakin runakunaqa nirqanku: —Cheqaqtapunin kay runaqa suyakusqanchis profeta*f**, nispa.

⁴¹Hukkunataq: —Payqa Diospa Akllasqan Cristopunin, nirqanku. Wakinñataq ichaqa nirqanku: —¿Galileamanta Cristoqa kanmanchu?

⁴²Diospa Simin Qelqan nin: Rey Davidpa mirayninmanta Davidpa kasqan Belén llaqtamantawanmi Diospa Akllasqan Cristoqa hamunqa, nispa. ¿Manachu chayqa hinapuni? nispa.

⁴³Chaymi runakunaqa pay hawa mana yuyayninkuta tupachirqankuchu.

⁴⁴Hinan wakinninku Jesusta hap'iyta munarqanku, ichaqa manan mayqenpas payta hap'irqanchu.

⁴⁵Dios yupaychana wasi guardiakunan kutirqanku sacerdote umallikunaq fariseokunaq*f** kasqanman, hinan paykunaqa tapurqanku: —¿Imaraykun chay runata mana apamunkichischu? nispa.

⁴⁶Dios yupaychana wasi guardiakunataq nirqanku: —¡Manan hayk'aqpas chay runa hinaqa pipas rimarqanchu! nispa.

⁴⁷Chaymi fariseokunaqa*f** paykunata nirqanku: —¿Qankunapas q'oturqachikullankichistaqchu?

⁴⁸Mayqellanpas kamachikuqkunamanta fariseokunamantawan*f**, ¿Jesuspi iñirqankuchu?

⁴⁹Chay runakunaqa kamachikuy simitan mana yachankuchu, chaymi paykunaqa ñakasqa kanku, nispa.

⁵⁰Nicodemoqa fariseokunaq*f** hukninmi karqan, paymi Jesusman tutalla risqa. Chay Nicodemon paykunata nirqan:

⁵¹—Kamachikuy siminchisman hinaqa, ¿runa huchachayta atisunmanchu manaraq payta uyarishaspa, manaraq ima ruwasqantapas yachashaspa? nispa.

⁵²Hinan paykunaqa nirqanku: —¿Qanpas Galileamantachu kanki? T'aqwiy Diospa Simin Qelqata, hinaspan yachanki mana hayk'aqpas Galileamanta profetaq*f** sayarimusqanta, nispa.

⁵³Hinaspan sapanka wasinkuta ripurqanku.