Read Quechua Cuzco Bible 1988 HECHOS 12 Bible Online

HECHOS 12 - Quechua Cuzco Bible 1988 bible

HECHOS 12

¹Chay tiempopin rey Herodesqa wakin iñiqkunata hap'ichirqan ñak'arichinanpaq.

²Juanpa wawqen Jacobotataq espadawan sipichirqan.

³Mana Qonchuyoq T'anta Fiesta p'unchaykunataq karqan. Hinan Herodesqa Judío runakuna chay ruwasqanwan kusikuqta reparaspa Pedrotapas hap'ichillarqantaq.

⁴Hinaspan carcelman Pedrota churachispa tawa t'aqa soldadokunaman entregarqan, tawa-tawamanta cuidanankupaq. Diospa Alqaspa Pasarparisqan Yuyarina Fiesta qhepatataq Herodesqa runakunaq qayllanman horqomuspa juzgayta yuyaykurqan.

⁵Chaymi Pedroqa carcelpi allin waqaychasqa kasharqan. Iñiqkunataq tukuy sonqowan paypaq Diosmanta mañakusharqan.

⁶Herodes payta horqomunan kashaqtintaq chay tuta Pedroqa iskay soldadokunaq chawpinpi puñusharqan, sapankaman cadenawan watasqa, guardiakunapas punku qayllapi carcelta cuidasharqanku.

⁷Chayllamanmi Señor Diospa angelninqa rikhurirqan, hinan huk k'anchay carcelpi k'ancharirqan. Angeltaq Pedrota waqtanninmanta kuyuchispa rikch'achirqan: —Usqhaylla hatariy, nispan. Chay raton cadenakunaqa makinmanta urmarqan.

⁸Angeltaq nirqan: —P'achakuy, usut'aykiwanpas churakuy, nispa. Chayta ruwaqtintaq angelqa nirqan: —Capaykiwan churakuspa qhepayta hamuy, nispa.

⁹Chaymi Pedroqa lloqsispa angelpa qhepanta rirqan. Manataq yacharqanchu angelpa ruwasqanqa cheqaq kasqanta, aswanmi yuyarqan rikhuriyta rikushasqallanta.

¹⁰Ñawpaqkaq guardiatapas qhepakaq guardiatapas pasarqospañataq, llaqtaman lloqsina fierro punkuman chayarqanku, chay punkun kikillanmanta paykunapaq kicharikurqan, lloqsispankutaq calleta purirqanku, hinaspanmi angelqa qayllanmanta chinkarqapurqan.

¹¹Chayraqmi Pedroqa yuyayninta hap'ikuspan nirqan: —Kunanqa cheqaqtapunin yachani Señor Diosqa angelninta kachamuwasqanta, hinaspa Herodespa makinmanta lliw Judío runakunaq mana allin ruwawananmantawan librawasqanta, nispa.

¹²Chayta reparaspanmi Pedroqa Marcos sutiyoq Juanpa maman Mariaq wasinman rirqan, chaypin askha huñunasqa mañakusharqanku.

¹³Calle punkuta takaqtintaq, huk warmi kamachi Rode sutiyoq uyariq lloqsimurqan.

¹⁴Paytaq Pedroq kunkanta reqsirqospa punkutapas manaraq kichaspa, kusisqa ukhuman phawaykuspa willamurqan: —Pedron punkupi kashan, nispa.

¹⁵Chaymi paykunaqa nirqanku: —Waq'ayarqonkichá, nispanku. Rodetaq ichaqa nirqan: —Pedropunin, nispa. Chaymi paykunaqa: —Angelninchá, nirqanku.

¹⁶Chaykamataq Pedroqa takapayasharqan. Kichaspankutaq payta rikuspa muspharqanku.

¹⁷Paytaq ichaqa makinwan ch'inyachispa, paykunaman willarqan imaynatachus Señorqa payta carcelmanta horqomusqanta. Nirqantaq: —Kayta willamuychis Jacoboman iñiq-masinchiskunamanwan, nispa. Chaymanta lloqsispataq wak ladoman ripurqan.

¹⁸P'unchayamuqtintaq soldadokunaqa sinchita ch'aqwasharqanku: ¿Maymi Pedro? ¡Manan kapunchu! nispa.

¹⁹Herodesmi Pedrota maskhachimurqan, mana tarimuqtinkutaq guardiakunata allin-allinta tapurqan, hinaspanmi kamachikurqan guardiakunata apaspa wañuchimunankupaq. Hinaspataq Judea ladomanta Cesarea llaqtaman uraykuspa, chaypi huk tiempo tiyarqan.

²⁰Herodesmi Tiro llaqtapi Sidón llaqtapi tiyaqkunaq contranpi phiñasqa kasharqan. Chay llaqtayoqkunataq ichaqa reypa suyunmanta mikhunata rantikuqku, chaymi reypa mayordomon Blastowan allinta reqsinakuspanku Herodesman huk nisqalla rirqanku paywan allipunayta mañakunankupaq.

²¹Waqyachisqan p'unchaytaq Herodesqa rey p'achawan p'achaykukuspa kamachikunan tiyanapi tiyaykurqan, hinaspan paykunaman rimaykurqan.

²²Hinaqtinmi runakunaqa qaparirqanku: —¡Kayqa manan runachu rimashan, aswanpas diosmi! nispanku.

²³Hinan kaq rato Señor Diospa angelninqa payta onqochirqan Diosta mana hatunchasqanrayku, chaymi kuruq tukusqan wañurqan.

²⁴Diospa simintaq hinantinman mast'arikuspa willasqa karqan.

²⁵Bernabewan Saulowanmi ruwanankuta tukuspa Jerusalén llaqtamanta Antioquía llaqtaman kutirqanku Marcos sutiyoq Juantawan pusarikuspanku.