Read Quechua Cuzco Bible 1988 HECHOS 13 Bible Online

HECHOS 13 - Quechua Cuzco Bible 1988 bible

HECHOS 13

¹Antioquía llaqtapi kaq iñiqkuna t'aqapin karqan profetakuna*f** yachachiqkuna ima: Bernabé, Yana runa nisqa Simón, Cirene llaqtayoq Lucio, kamachikuq Herodeswan kuska uywasqa Manaén, kallarqantaq Saulopas.

²Paykuna Señorta yupaychaspa ayunashaqtinkutaq, Santo Espirituqa nirqan: —Bernabeta Saulotawan t'aqapuwaychis, allin willakuykunata willanankupaqmi paykunata akllakurqani, nispa.

³Hinaqtinmi ayunasqanku mañakusqanku qhepata Bernabeman Saulomanwan makinkuta churaykurqanku, hinaspan paykunata kacharparirqanku.

⁴Bernabewan Saulowanmi Santo Espirituq kachasqan kaspa Seleucia llaqtaman uraykurqanku, chaymantataq barcopi Chipre islaman rirqanku.

⁵Salamina llaqtaman chayaspankutaq Judío runakunaq Diosmanta yachachina wasinkunapi Diospa siminta willarqanku. Marcos sutiyoq Juantan yanapakuqpaq pusarqanku.

⁶Islantinta purispankun Pafos llaqtapi tuparqanku Barjesús sutiyoq layqawan, paymi Judío runa karqan, “profetan*f** kani” nirqantaq kanpas.

⁷Chay layqan kasharqan islapi kamachikuq yuyaysapa Sergio Paulowan. Chay kamachikuqmi Diospa siminta uyariyta munaspa Bernabeta Saulotawan waqyachikurqan.

⁸Barjesús sutiqa Griego rimaypi Elimas ninmi. Paymi apostolkuna*f** contra sayarirqan kamachikuqpa Jesuspi iñinanta mana munaspa.

⁹Chaymi Pablo sutiyoq Sauloqa Santo Espirituwan hunt'a kaspa layqata allinta qhawaykuspa

¹⁰nirqan: —¡Yaw supaypa wawan! ¡Tukuy yukayllata q'otuyllatawan yachanki! ¡Lliw chanin-kaykunata cheqnikuq runan kanki! ¿Hayk'aqkamataq Señor Diospa cheqaq ñanninkunata q'ewichinki?

¹¹Kunanqa Señor Diosmi muchuchisunki, ñawsayaspaykin huk p'unchaykuna intiq k'anchayninta mana rikunkichu, nispa. Hinaqtinmi yana phuyu hina payman tutayaykamurqanpacha, chaymi thampiykachaspan maskharqan pillawanpas makinmanta aysachikunanpaq.

¹²Hinaqtinmi kamachikuqqa chay hina kasqanta rikuspa, Señormanta Pabloq yachachisqanmanta musphaspa, Jesuspi iñirqan.

¹³Pablotaq puriq-masinkunapiwan Pafos llaqtamanta barcopi rispanku, Panfilia hap'iypi Perge llaqtaman chayarqanku. Marcos sutiyoq Juanmi ichaqa paykunamanta t'aqakuspa Jerusalén llaqtaman kutirikapurqan.

¹⁴Pablowan Bernabewanmi Perge llaqtamanta rispanku, Pisidia provinciapi Antioquía llaqtaman chayarqanku. Hinaspan Judío runakunaq Diosmanta yachachina wasinman samana p'unchaypi haykuspa tiyaykurqanku.

¹⁵Diospa kamachikuynin simitapas profetakunaq*f** qelqasqankunatapas leespankuñan chay wasipi kamachikuqkunaqa paykunata nichirqanku: —Wawqeykuna, ima simillapas kallpachaykuwanaykikupaq kaqtinqa, kunan rimaykuwayku, nispa.

¹⁶Chaymi Pabloqa sayarispa makinwan ch'inyachispa nirqan: —Israel llaqtamasiykuna, Diosta yupaychaq mana Judío runakuna ima, uyariychis.

¹⁷Israel runakunaq Diosninchismi ñawpa machulanchiskunata akllarqan, hinaspan paykunata askhayachirqan Egipto suyupi mana llaqtayoq kashaqtinku. Chaymantan atiyninwan horqomurqan,

¹⁸hinaspan tawa chunka watata hina ch'inneqpi paykunaq mana kasukusqankuta Diosqa muchurqan.

¹⁹Canaán hallp'api qanchis suyukunata atipaspataq hallp'ankuta machulanchiskunaman rakirqan.

²⁰Lliw chaykunan tawa pachak phisqa chunkayoq wata hina karqan. Chaymantataq Diosqa uma qollanakunata paykunapaq churarqan profeta*f** Samuelpa tiemponkama.

²¹Reyniyoq kayta munaqtinkutaq Diosqa tawa chunka watapaq Benjamín ayllumanta Kispa churin Saulta reyninku kananpaq churarqan.

²²Diostaq Saulta wikch'uspa, Davidta reyninku kananpaq churarqan. Davidmantan Diosqa nirqan: Isaipa churin Davidtan tarini sonqoypaq hina runata, paymi lliw munasqayta ruwanqa, nispa.

²³Paypa mirayninmantan Diosqa prometesqanman hina Israel runakunapaq Qespichiq Jesusta kachamurqan.

²⁴Manaraq Jesús hamushaqtinmi Bautizaq Juanqa llapan Israel runakunaman Diosman kutirikuspa bautizachikunankuta willarqan.

²⁵Juanqa ruwananta tukushaspañan nirqan: ¿Pi kasqaytataq yuyankichis? Manan suyasqaykichis runachu ñoqaqa kani. Aswanmi ñoqaq qhepayta huk hamushan, paypa chakinmanta usut'ankunallatapas manan paskanaypaq hinachu kani, nispa.

²⁶Wawqeykuna, Abrahampa miraynin runakuna, Diosta yupaychaq mana Judío runakunapas, Diospa qespichinanmanta willakuyqa ñoqanchispaqmi.

²⁷Jerusalén llaqtapi tiyaqkunan kamachikuqninkunapiwan Jesusqa pichus kasqanta mana reqsirqankuchu, sapa samana p'unchaypi leesqa profetakunaq*f** nisqantapas manallataq entienderqankuchu. Chaymi Jesusta huchachaspa profetakunaq*f** nisqanta hunt'arqanku.

²⁸Wañuchinapaq hina mana ima huchatapas paypi tarishaspankupas, kamachikuq Pilatotan valekurqanku Jesusta wañuchinapaq.

²⁹Jesusmanta llapallan qelqasqa kaqkunata hunt'aspankutaq, cruzmanta uraykachispa aya p'ampanaman churarqanku.

³⁰Diostaq ichaqa wañusqanmanta kawsarichimpurqan.

³¹Chaymi Jesusqa askha p'unchayta rikhurirqan paywan kuska Galileamanta Jerusalén llaqtaman puriysiq-masinkunaman. Paykunan kunanqa Israel llaqta-masinchiskunaman Jesusmanta willaqkuna kanku.

³²Ñoqaykupas kay allin willakuykunata willashaykiku: Diosmi ñawpa machulanchiskunaman prometesqanta

³³ñoqanchis mirayninkunapaq hunt'anña Jesusta kawsarichimpuspa. Iskaykaq Salmopipas kay hinatan nin: Qanmi Churiy kanki, kay p'unchaymi ñoqa churiyayki, nispa.

³⁴Diosmi wañusqanmanta payta kawsarichimpurqan manapuni hayk'aqpas ismunanpaq. Chaytan kay Qelqaqa sut'inchan: Davidman prometesqay ancha allin samikunataqa qosqaykichispunin, nispa.

³⁵Chaymi huk cheqas Qelqapipas nillantaq: Manan qan sonqo kamachiykiq cuerpontaqa ismurichinkichu, nispa.

³⁶Chhaynataqmi Davidpas kawsayninpi Diospa munayninman hina servirqan, wañukapuspataq machulankunawan p'ampasqa karqan, hinan ismuripurqan.

³⁷Diospa kawsarichimpusqan Jesusmi ichaqa mana ismurqanchu.

³⁸Chay hinaqa, wawqeykuna, yachaychis, Jesusraykun huchaykichiskuna pampachasqa kananta willashaykichis.

³⁹Moisespa kamachikuynin simiman hinaqa manan huchamanta kacharichiy atikunchu, Jesuspi iñiqmi ichaqa llapa huchanmanta kacharichisqa kashan.

⁴⁰Ahinaqa cuidakuychis, paqtataq profetakunaq*f** qelqanpi nisqa simikuna qankunaman chayamunman, paykunan nirqanku:

⁴¹Qhawariychis Diosta pisichaqkuna, musphaychis hinaspa ch'usaqyapuychis. Huk ruwanatan kawsashaqtiykichis ruwani, piña chayta willasuqtiykichispas manan creewaqchischu, nispa.

⁴²Judío runakunaq Diosmanta yachachina wasinmanta lloqsishaqtinkutaq, runakunaqa Pablota Bernabetawan valekurqanku hamuq samana p'unchaypipas chaykunata aswanta willaykunankupaq.

⁴³Huñunakuq ch'eqeriqtintaq, askha Judío runakuna Judío t'aqaman t'ikrakuspa Diosta yupaychaqkunapiwan Pablota Bernabetawan qatikurqanku. Hinan paykunaqa rimapayaspa kallpacharqanku khuyapayakuq Diospi hap'ipakuspa kawsanankupaq.

⁴⁴Hamuq samana p'unchaypitaq yaqa llaqtallantin huñunakurqan Diospa siminta uyarinankupaq.

⁴⁵Judío runakunataq ichaqa askha runakunata rikuspa sinchita envidiakurqanku, hinaspan Pabloq yachachisqan contra rimaspa k'amirqanku.

⁴⁶Hinaqtinmi Pabloqa Bernabepiwan mana manchakuspa nirqanku: —Qankunamanraqmi Diospa simintaqa willanaykupuni karqan, qankunataq ichaqa mana chaskiyta munankichischu, manallataq wiñay kawsaytapas munankichischu, chaymi mana Judío runakunaman willaq ripushayku.

⁴⁷Kay hinatan Señor Diosqa kamachiwarqanku: Wak suyu runakunata k'anchaqpaqmi churayki, kay pachantin runakunaman qespikuymanta willanaykipaq churayki, nispan, nispa.

⁴⁸Chayta uyarispataq mana Judío runakunaqa kusikuspanku Señorpa simintapas “allinmi” nirqanku. Hinaspan llapallan wiñay kawsaypaq akllasqa kaqkuna iñirqanku.

⁴⁹Chay hinatan Señorpa siminqa chay provinciantinpi willakurqan.

⁵⁰Judío runakunataq ichaqa Diosta yupaychaq allichachaq warmikunata llaqtapi kamachikuq qharikunatawan umacharqanku, hinan paykunaqa Pablo contra Bernabé contra qatiykachayta hatarichirqanku, hinaspan llaqtankumanta qarqorqanku.

⁵¹Chaymi paykunaqa chakinkupi hallp'ata paykuna contra chhaphchispa Iconio llaqtaman rirqanku.

⁵²Chaywanpas Antioquía llaqtapi tiyaq iñiqkunaqa may kusisqapunin Santo Espirituwan hunt'a kasharqanku.