Read Quechua Cuzco Bible 1988 HECHOS 15 Bible Online

HECHOS 15 - Quechua Cuzco Bible 1988 bible

HECHOS 15

¹Chay p'unchaykunan Judea provinciamanta Antioquía llaqtaman wakin runakuna uraykamurqanku, hinaspan iñiqkunata yachachirqanku: —Manachus Moisespa kamachikuy siminman hina qhari-kayniykichis qarachata kuchuqakunkichis chayqa, manan Diosqa qespichisunkichischu, nispanku.

²Chaymi Pabloqa Bernabepiwan paykunawan sinchita churanakurqanku, hinan iñiqkunaqa Pablota Bernabeta wakinninkutawan akllarqanku, chay churanakuymanta Jerusalén llaqtapi apostolkunawan*f** uma runakunawan ima rimanakamunankupaq.

³Hinaspan iñiqkunaqa paykunata kacharparirqan, chaymi rirqanku Fenicia hap'iyninta Samaria provinciantawan mana Judío runakunaq Diosman kutirikusqankuta iñiqkunaman willaspa. Chaymi llapan iñiqkunaqa anchata kusikurqanku.

⁴Jerusalén llaqtaman chayaqtinkun iñiqkuna, apostolkuna*f**, uma runakunapiwan paykunata sumaqta chaskirqanku. Hinan kachasqakunaqa willarqanku lliw imaymanata paykunawan Diospa ruwasqanta.

⁵Ichaqa fariseokunaq*f** t'aqanmanta iñiqkunan sayarispa nirqanku: —Mana Judío kaq iñiqkunataqa qhari-kayninku qarachata señalanapunin, hinaspan Moisespa kamachikuy siminta hunt'anankupaq kamachina, nispanku.

⁶Chaymi apostolkunaqa*f** uma runakunapiwan huñunakurqanku chay churanakuymanta rimanankupaq.

⁷Unaytaña churanakuqtinkutaq Pedroqa sayarispa paykunata nirqan: —Wawqeykuna, yachankichismi riki unay tiempotaña qankuna ukhumanta Diospa akllakuwasqanta, ñoqa willaqtiy Jesucristomanta allin willakuykunata mana Judío runakuna uyarinankupaq, hinaspa iñinankupaq.

⁸Runakunaq sonqon reqsiq Diosmi paykunamanpas Santo Espirituta qorqan, ahinapin ñoqanchista hina paykunata chaskisqanta sut'incharqan.

⁹Diosqa ñoqanchismanpas paykunamanpas manan sayakunchu, aswanmi paypi iñiqtinku sonqonkuta ch'uyanchaykun.

¹⁰Kunanri, ¿imaraykutaq Diosta wateqankichis, machulanchiskunaqpas ñoqanchispapas mana hunt'ay atisqanchis kamachikuyta iñiqkunaman hunt'anankupaq kamachispa?

¹¹Ñoqanchisqa yachanchispunin Señor Jesuspa khuyapayakuynillanwan Diospa qespichisqan kasqanchista, chay hinallataqmi paykunapas qespichisqa kanku, nispa.

¹²Chaymantataq Bernabewan Pablowan willakurqanku may hatun milagrokunata señalkunatawan mana Judío runakuna ukhupi Diospa paykunawan ruwasqanmanta, hinan llapanku ch'inlla uyarirqanku.

¹³Paykuna rimayta tukuqtinkutaq Jacoboqa nirqan: —Wawqeykuna, uyariwaychis:

¹⁴Simonmi willakunña imaynatachus Diosqa mana Judío runakunamanta paypaq runakunata akllakuspa chayllaraq paykunata yuyarikusqanta.

¹⁵Chaywantaqmi profetakunaq*f** nisqanpas tupan. Diospa Simin Qelqan nin:

¹⁶Señor Diosmi nin: Chay qhepatañan kutimusaq, wakmantan Davidpa mirayninta sayarichisaq, wasi thunikuqtin perqaq hinan wakmanta hatarichisaq

¹⁷wakin runakunapas maskhawanankupaq, sutiywan sutichasqa llapan wak suyu runakunapas maskhawanankupaq. Tukuy chaykunata ruwaq ñoqa Señor Diosmi chay hinata nini,

¹⁸tukuy chaykunataqa ñawpamantañan reqsichirqani, nispan, nispa.

¹⁹Chayraykun ñoqaqa yuyaykuni Diosman kutirikuq mana Judío runakunataqa amaña musphachisunchischu.

²⁰Aswanpas paykunaman qelqasunchis idolokunaman haywasqa mikhunata ama mikhunankupaq, qhelli kawsaypi ama purinankupaq, seq'osqa aychatapas yawartapas ama mikhunankupaq.

²¹Moisespa kamachikuy simintaqa ñawpa tiempomantañan sapanka llaqtapi yachachinku, Diosmanta yachachina wasikunapi sapa samana p'unchaypi leespanku, nispa.

²²Chaymi apostolkunaqa*f**, uma runakunapiwan, llapa iñiqkunapiwan yuyaykurqanku paykuna ukhumanta qharikunata akllaspa Pablotawan Bernabetawan kuskata Antioquía llaqtaman kachanankupaq. Hinaspan akllarqanku uma qharikuna Barsabás sutiyoq Judasta Silastawan.

²³Chay qhepatan apanankupaq kay hinata qelqarqanku: Ñoqayku iñiq-masiykichis apostolkunan*f**, uma runakunan, Antioquía llaqtapi, Siria provinciapi, Cilicia provinciapi kaq mana Judío wawqe-panakunata napaykamuykiku:

²⁴Yachaykun wakinniyku mana kamachishaqtiyku qankunaman hamusqanta. Paykunan yachachikuyninkuwan pantachispa iskayrayachirqasunkichis[2].

²⁵Chaymi huk nisqalla huñukuspayku allinta yuyaykurqayku, wakin qharikunata akllaspa, munasqanchis Bernabetawan Pablotawan kuskata qankunaman kachamuyta.

²⁶Paykunaqa Señorninchis Jesucristotan wañuytapas mana manchaspa servinku.

²⁷Chaymi Judasta Silastawan kachamuykiku, paykunapas chay hinallatataq simipi willanasuykichispaq.

²⁸Santo Espiritumanpas ñoqaykumanpas allinmi rikch'akuwanku qankunaman ama ima sasatapas kamachinaykupaq, aswanpas kaykunallatan hunt'anaykichistaqa munayku:

²⁹Aman idolokunaman haywasqa mikhunata mikhunkichischu, aman seq'osqa aychatapas yawartapas mikhunkichischu, aman qhelli kawsaypipas purinkichischu. Chaykunamantachus cuidakunkichis chayqa allintan ruwankichis. Allillanña kakushaychis, nispa.

³⁰Hinaspan tawantin qharikunata kacharparirqanku, paykunataq Antioquía llaqtaman uraykurqanku, chaypin iñiqkunata huñuykuspa cartata haywarqanku.

³¹Chayta leespankutaq iñiqkunaqa sonqonku tiyaykuqtin kusikurqanku.

³²Judaspas Silaspas profeta*f** kaspankun, allin-allinta rimaykuspa iñiqkunata sonqochaspa kallpacharqanku.

³³Chaypi unay p'unchaykunaña kasqankumantan iñiqkunaqa: —Sumaqllaña kutipuychis, nispa kacharparipurqanku[3].

³⁵Pablotaq ichaqa Bernabepiwan Antioquía llaqtapi qhepakurqanku, chaypin paykunapas askha iñiqkunapiwan yachachispa Señor Jesucristomanta willarqanku.

³⁶Pisi p'unchaykuna qhepatataq Pabloqa Bernabeta nirqan: —Kutisunchis Señor Jesucristomanta willamusqanchis lliw llaqtakunapi wawqe-panakunata watukamuq, imaynachá kashanku, nispa.

³⁷Hinan Bernabeqa Marcos sutiyoq Juanta paykunawan pusayta munarqan.

³⁸Pablotaq ichaqa mana pusayta munarqanchu Panfilia hap'iymantapacha t'aqakuspa llank'anapi paykunata mana puriysisqanmanta.

³⁹Paykunaqa sinchita churanakuspankun t'aqanakurqanku, chaymi Bernabeqa Marcosta pusarikuspa Chipre islata barcopi ripurqan.

⁴⁰Pablotaq Silasta akllakurqan, hinan iñiqkunaqa khuyapayakuq Señorpa makinman hap'iykachirqanku, chaymi puririrqanku.

⁴¹Hinaspan iñiq t'aqakunata kallpachaspa Siria provincianta Cilicia provincianta purirqanku.