Read Quechua Cuzco Bible 1988 HECHOS 17 Bible Online

HECHOS 17 - Quechua Cuzco Bible 1988 bible

HECHOS 17

¹Pablowan Silaswanmi Anfípolis llaqtanta Apolonia llaqtantawan rispa, Tesalónica llaqtaman chayarqanku, chaypin Judío runakunaq Diosmanta yachachina wasin karqan.

²Chaymi Pabloqa imaynan haykullaqpuni hina, chaymanpas haykullarqantaq, kinsa samana p'unchaypitaq Diospa Simin Qelqakunamanta paykunawan tapunakuspa rimarqanku.

³Hinan Pabloqa entiendechirqan Diospa Akllasqan Cristoqa ñak'arispapuni wañusqanmanta kawsarimpunanta sut'inchaspa. Paymi nirqan: —Ñoqaq qankunaman willasqay Jesuspunin Diospa Akllasqan Cristoqa, nispa.

⁴Chaymi wakin Judío runakunaqa iñispa Pablowan Silaswan huñukurqanku, Diosta yupaychaq Grecia suyu runakunapas allichachaq warmikunapas askhapuni iñirqanku.

⁵Mana iñiq Judío runakunataq ichaqa envidiakuspa, wakin qella tumaqaya runakunata pusarqanku, hinaspan askhata huñuspa llaqtata ch'aqwachirqanku. Jasonpa wasinman phawaykuspataq runakunaman Pablota Silastawan horqomuytapuni munarqanku.

⁶Paykunata mana tarispataq, Jasonta wakin iñiqkunatawan llaqtapi kamachikuqkunaman aysarqanku qaparkachaspa: —¡Kay pachantinpi tiyaqkunata ch'aqwachiqkunan kaymanpas chayamullantaq,

⁷chay runakunatan Jasonqa chaskisqa! Paykunaqa llapanmi hatun rey Cesarpa kamachikuyninkunaq contranta ruwanku. Jesús nisqa wak reymi kan, nispa, rimaspanku.

⁸Chaykunata uyarispan runakunapas llaqtapi kamachikuqkunapas ch'aqwarqanku.

⁹Jasonmanta wakin iñiqkunamantawan garantía qolqeta chaskispataq kacharipurqanku.

¹⁰Hinaqtinmi iñiqkunaqa tutayaykuqtin hina Pablota Silastawan Berea llaqtaman kacharparirqanku. Paykunataq chayaspa Judío runakunaq Diosmanta yachachina wasinman rirqanku.

¹¹Chay Berea llaqtapi kaqkunan Tesalónica llaqtapi kaqkunamantaqa aswan sumaq sonqo runakuna karqanku. Paykunan Diospa siminta tukuy sonqo chaskikurqanku, chaykunari hinapunichus kasqantataq Diospa Simin Qelqakunapi sapa p'unchay t'aqwirqanku.

¹²Chaymi paykunamanta askha iñirqanku, Grecia suyu allichachaq warmikunapas, askha qharikunapas.

¹³Ichaqa Tesalónica llaqta Judío runakunan Berea llaqtapipas Diospa siminta Pablo willashasqanta yachaspa hamurqanku, hinaspan chaypipas runakunata umacharqospa ch'aqwachirqanku.

¹⁴Hinaqtinmi iñiqkunaqa Pablota kaq rato mama qochakama kacharparirqanku. Silaswan Timoteowantaq ichaqa Berea llaqtapi qhepakurqanku.

¹⁵Pablota pusaq qharikunataq Atenas llaqtakama chayarqanku, hinan Pabloqa pusaqnin qharikunata kutichirqan: —Silaswan Timoteowan usqhaylla hamuchunku, nispa nimunankupaq.

¹⁶Pablon Silasta Timoteotawan Atenas llaqtapi suyasharqan, hinaspan idolokunawan hunt'a llaqtata rikuspa sonqon mana tiyaykurqanchu.

¹⁷Chaymi Diosmanta yachachina wasipi Judío runakunawan Diosta yupaychaqkunawan tapunakuspa rimarqan, hinallataqmi sapa p'unchay plazapi paywan tupaqkunawanpas tapunakurqan.

¹⁸Epicurio*f** t'aqamanta Estoico*f** t'aqamantawan wakin yachayniyoqkunan Pablowan churanakurqanku. Wakinmi nirqanku: —¿Imatataq riman kay thawtiqri? nispa. Wakintaq nirqanku: —Wak dioskunamanta willakuqmanmi rikch'akun, nispanku. Chaytaqa nirqanku Jesusmanta allin willakuykunata kawsarimpuytawan willakuqtinmi.

¹⁹Chaymi payta moqo patapi Areópago nisqa huñukuyman pusarqanku: —¿Willawankikumanchu kay mosoq yachachikuyniyki imachus kasqanta?

²⁰Mana hayk'aq yachasqaykutan uyarichiwankiku, chaymi imachus kay kasqanta yachayta munayku, nispanku.

²¹Atenas llaqtayoq runakunapas chaypi tiyaq wak llaqtayoq runakunapas mosoq willakuykunata uyarispa tapunakuspallapunin kaqku.

²²Chaymi Pabloqa Areópago chawpipi sayaykuspa nirqan: —Atenas llaqta runakuna, lliw imaymanapin reparani dioskunata tukuy sonqo yupaychaq kasqaykichista.

²³Purishaspaymi yupaychanaykichiskunata qhawaspay, huk altarta tarimurqani: Mana Reqsisqa Diospa Altarnin, nispa niq qelqasqayoqta. Qankuna mana reqsispalla yupaychashankichis, chay Diosmantan ñoqaqa willashaykichis.

²⁴Chay mana reqsisqaykichis Diosmi kay pachata chaypi tukuy imaymana kaqtapas kamaqqa, paymi hanaq pachaqpas kay pachaqpas dueñonqa. Chaymi payqa mana runakunaq ruwasqan wasikunapichu tiyan.

²⁵Manallataqmi Diosqa imapipas runaq yanapayninta suyanchu, aswanmi payqa llapanchista kawsachiwanchis, samaytapas, tukuy imatapas qowanchis.

²⁶Ch'ulla runallamantan lliw runakunatapas mirachirqan kay pachantinpi tiyanankupaq, hinaspan paykunapaq tiempokunatapas, tiyanankuq qorpankunatapas churapurqan.

²⁷Chaytan Diosqa ruwarqan runakuna payta maskhanankupaq, ichapas imaynallamantapas reparaspa payta tarinkuman. Chaywanpas Diosqa manan sapankanchismantaqa karupichu kashan.

²⁸Imaynan ninku hina: Paypin kawsanchispas, purinchispas, kashanchispas, nispa. Wakin harawi qelqaqniykichispas nillantaqmi: Paypa mirayninmi ñoqanchispas kanchis, nispa.

²⁹Diospa miraynin kashaspanchisqa manan yuyananchischu Diosqa qoriman, qolqeman, rumiman rikch'akuq kasqantaqa, manallataqmi runaq yuyasqanman hina llut'asqa kasqantapas yuyananchischu.

³⁰Diosqa ñawpa tiempopi runakunaq mana yachaspa huchallikusqankutan hinallata qhawarqan, kunanmi ichaqa hinantinpi llapallan runakunata kamachin huchata saqepuspa Diosman kutirikunankupaq.

³¹Diosqa huk p'unchaytan churanña, chay p'unchaypin akllasqan Jesuswan kay pachapi tiyaqkunata chaninninpi juzganqa. Chay hina kasqantaqa lliw runamanmi reqsichin, wañusqanmanta Jesusta kawsarichimpuspan, nispa.

³²Wañusqakunaq kawsarimpunanta uyarispankutaq wakin asikurqanku, wakintaq nirqanku: —Kaymantaqa hukpiñan uyarisqaykiku, nispa.

³³Chaymi Pabloqa paykuna ukhumanta lloqsipurqan.

³⁴Wakintaq ichaqa Pablowan huñukuspa iñirqanku. Hukninkun karqan Areópago huñukuypi kaq Dionicio, hinallataq Dámaris sutiyoq warmipas, hukkunapas iñillarqankutaqmi.