Read Quechua Cuzco Bible 1988 HECHOS 18 Bible Online

HECHOS 18 - Quechua Cuzco Bible 1988 bible

HECHOS 18

¹Chaykuna qhepatan, Pabloqa Atenas llaqtamanta lloqsispa Corinto llaqtaman rirqan.

²Chaypin tuparqan Ponto suyumanta Judío runa Aquilawan. Paymi chayllaraq Italia suyumanta warmin Priscilapiwan chayamurqanku, Roma llaqtamanta llapan Judío runakunata lloqsinanpaq hatun rey Claudio kamachikusqanrayku.

³Chaymi Pabloqa kasqankama llank'anayoq kaspa paykunawan qhepaspa kuska llank'arqan. Paykunaqa toldo awaqmi karqanku.

⁴Sapa samana p'unchaytaq Diosmanta yachachina wasipi Pabloqa tapunakuspa rimaq Judío runakunawanpas mana Judío runakunawanpas, paykunata iñichiyta munaspa.

⁵Silaswan Timoteowan Macedonia provinciamanta chayamuqtinkutaq Pabloqa Diospa siminta willaspallaña purirqan, Jesusqa Diospa Akllasqan Cristopuni kasqanta Judío runakunaman willaspa.

⁶Paykuna Pablota cheqnipakuqtinku, k'amiqtinku Pabloqa p'achanta paykuna contra chhaphchispa nirqan: —Qankuna kikiykichismi wañunaykichispaq huchachakunkichis, ñoqaqa manan ima huchayoqpaschu kani, kunanmantaqa mana Judío runakunamanmi ripusaq, nispa.

⁷Diosmanta yachachina wasimanta lloqsipuspataq, Dios yupaychaq Justo sutiyoq runaq wasinman haykurqan qayllallapi kasqanrayku.

⁸Diosmanta yachachina wasipi uma runa Crispotaq Señor Jesuspi iñirqan, wasinpi lliw kaqkunapiwan. Askhataq Corinto llaqtapi kaqkunapas Diospa siminta uyarispa iñirqanku, hinaspan bautizachikurqanku.

⁹Señor Jesusmi huk tuta rikhuriypi Pablota nirqan: —Ama manchakuychu, aswanpas rimallay, amataq upallaychu,

¹⁰ñoqan qanwan kashani, manan pipas imanasunkipaschu, kay llaqtapiqa askhan ñoqapi iñiqkuna kashan, nispa.

¹¹Pabloqa Corinto llaqtapin wata soqta killayoqta tiyarqan Diospa siminta paykunaman yachachispa.

¹²Acaya provinciapi Galión kamachikuq kashaqtinmi Judío runakunaqa huk-nisqalla Pablo contra hatarirqanku, hinaspan juzganaman payta apaspa nirqanku:

¹³—Kaymi runakunata yachachishan kamachikuy simita p'akispa huk hinanmanta Diosta yupaychanankupaq, nispanku.

¹⁴Pablo rimarinanña kashaqtinmi Galionqa Judío runakunata nirqan: —Judío runakuna, ima mana allin ruwaypas, hatun huchapas kallaqtinmi qankunataqa uyariykichisman.

¹⁵Aswanpas kunanqa rimaykunamanta, sutikunamanta, kamachikuy simiykichiskunamantawan churanakuy kashan chayqa, qankunan chaytaqa yachakunkichis. Ñoqaqa manan chaykunamanta juez kaytaqa munanichu, nispan

¹⁶juzganamanta paykunata qarqorqan.

¹⁷Hinaqtinmi Judío runakunaq Diosmanta yachachina wasinpi uma runa Sostenesta llapamanta hap'ispa, Galionpa ñawpaqenpi maqarqanku. Galiontaq mana reparaqpas tukurqanchu.

¹⁸Pabloqa unaytaraqmi Corinto llaqtapi qhepakurqan. Chaymantataq iñiqkuna payta kacharparirqan, hinan Siria provinciapi Antioquía llaqtaman barcopi rirqan, paywanmi rirqan Priscilapas Aquilapas. Pabloqa manaraq barcopi puririshaspanmi Cencrea llaqtapi kashaspa Diosman prometekusqanta hunt'ananpaq chukchanta rutuchikurqan.

¹⁹Efeso llaqtaman chayaspataq Pabloqa Priscilata Aquilatawan chayman saqerqan, hinaspan Diosmanta yachachina wasiman haykuspa Judío runakunawan tapunakuspa rimarqanku.

²⁰Chaymi paykunaqa unaytaraq paykunawan qhepakunanpaq valekurqanku, Pablotaq ichaqa mana uyakurqanchu.

²¹Aswanmi pasapushaspa paykunata nirqan: —Dios munaqtinqa huktawanmi watukuq kutimusqaykichis, nispa. Hinaspanmi Efeso llaqtamanta puririrqan.

²²Cesarea llaqtaman chayaspanmi Jerusalén llaqtapi iñiq t'aqata napaykuq wicharirqan, chaymantataq Antioquía llaqtaman rirqan.

²³Huk tiempo chaypi tiyarispañataq puririrqan Galacia provinciantinpi Frigia provinciantinpi kaq iñiqkunata kallpachaspa.

²⁴Chaypachan Efeso llaqtaman chayarqan Alejandría llaqtayoq Apolos sutiyoq Judío runa, paymi karqan kusa rimaq qhari, Diospa Simin Qelqakunata allinta yachaq.

²⁵Paymi Señorpa ñanninpi yachachisqa karqan, chaymi Jesusmanta iman kaqtapuni tukuy sonqo rimaqpas yachachiqpas, hinaña Juanpa bautismollanta yachashaspapas.

²⁶Apolosmi Judío runakunaq Diosmanta yachachina wasinpi mana manchakuspa rimayta qallarirqan. Priscilawan Aquilawantaq Apolospa rimasqanta uyarispa wasinkuman payta pusarqanku, hinaspan aswan sut'itapuni Diospa ñanninta yachachirqanku.

²⁷Apolosqa Acaya provinciaman riyta munaqtinmi Efesopi kaq iñiqkuna payta kallpacharqanku, hinaspan Acayapi kaq iñiqmasikunaman qelqarqanku Apolosta allinta chaskinankupaq. Paytaq chayaspan Diospa khuyapayakuyninrayku iñiqkunata anchata yanaparqan.

²⁸Apolosqa ancha atiywan rimaspan llapa runaq qayllanpi Judío runakunata atiparqan, Jesuspuni Diospa Akllasqan Cristoqa kasqanta Diospa Simin Qelqakunawan sut'inchaspa.