Read Quechua Cuzco Bible 1988 HECHOS 20 Bible Online

HECHOS 20 - Quechua Cuzco Bible 1988 bible

HECHOS 20

¹Ch'aqway tukukuqtintaq Pabloqa iñiqkunata waqyachimuspa paykunata kallpacharqan. Hinaspan paykunamanta despedikuspa puriripurqan Macedonia provinciaman rinanpaq.

²Chayninta purispanmi iñiqkunata allinta kallpachaykuspaña Grecia suyuman chayarqan.

³Chaypi kinsa killa kasqanmantañataq Siria provinciaman barcopi rinan kasharqan, hinaspan Judío runakunaq pay contra mana allin yuyaykusqankuta yacharqorqan, chaymi Macedonianta kutipunanpaq yuyaykukurqan.

⁴Pablotan riysirqanku Berea llaqtayoq Pirrospa churin Sópater, Tesalónica llaqtayoq Aristarco, Segundopiwan, Derbe llaqtayoq Gayo, Timoteopiwan, hinallataq Asia provinciamanta Tíquico Trofimopiwan.

⁵Wakinmi ñawpaspa Troas llaqtapi suyamuwarqanku.

⁶Ñoqaykutaq Mana Qonchuyoq T'anta Mikhuna Fiesta qhepata Filipos llaqtaman barcopi rispa, Troas llaqtaman phisqa p'unchaypi paykunaman ayparqayku, chaypin qanchis p'unchayta paykunawan karqayku.

⁷Semana qallariy p'unchaytan iñiqkunaqa t'anta phasmiq huñunakurqayku, hinan Pabloqa paykunata yachachirqan. Qhepantin p'unchay puririnan kaqtintaq kuska tutakama unayta rimarqan.

⁸Huñunakusqayku altos wasipin askha lamparakuna k'anchasharqan.

⁹Ventanapitaq Eutico sutiyoq wayna tiyasharqan. Pablo unayta rimaqtintaq waynaqa puñuywan aysachikurqan. Misk'ita puñurqapuspan kinsa pata altosmanta pampaman urmaykurqan, chaymi wañusqata hoqarirqanku.

¹⁰Hinan Pabloqa uraykuspa waynata oqllaykurqan, marq'arikuspataq nirqan: —Ama mancharikuychischu, waynaqa kawsashanmi, nispa.

¹¹Kaqta wichaspataq Pabloqa t'antata phasmirqan, mikhuspataq sut'iyamunankama unayta parlallarqantaq, chaymantataq puriripurqan.

¹²Waynata kawsashaqta wasiman pusaspankutaq iñiqkunaqa mayta kusikurqanku.

¹³Ñoqaykutaq barcoman ñawpaspayku Asón llaqtaman barcopi rirqayku, chaypi Pablowan tupanaykupaq, payqa chakillapi rinanpaqmi yuyaykukurqan.

¹⁴Asón llaqtapi paywan tupaqtiykutaq Pabloqa barcoman wichamurqan, hinaspan Mitilene llaqtaman rirqayku.

¹⁵Chaymanta barcopi rispaykutaq, qhepantin p'unchayta Kío isla chimpaman chayarqayku. Qhepakaq p'unchaytaq Samos islaman chimparqayku, qhepantin p'unchaytaq Mileto llaqtaman chayarqayku.

¹⁶Pabloqa manan Efeso llaqtaman chayayta munarqanchu, Asia provinciapi manaña qhepananrayku, chaymi chimpallanta barcopi pasananpaq yuyaykukurqan. Payqa usqhasharqanmi, atikuqtinqa Jerusalén llaqtapi Pentecostés p'unchayta kananrayku.

¹⁷Mileto llaqtapi kashaspataq Pabloqa waqyachimurqan Efeso llaqtapi iñiq t'aqa uma runakunata.

¹⁸Chayamuqtinkutaq paykunata nirqan: —Asia provinciaman chayamusqay p'unchaymantapachan qankunaqa yachankichis imaynatachus tukuy tiempo qankuna ukhupi purisqayta.

¹⁹Tukuypi huch'uyyaykukuspa mayta waqaspa Señorta servirqani, hinaña Judío runakuna ñoqa contra imaymanata yuyaykusharqanku chaypas.

²⁰Yachallankichistaqmi runa qayllapipas wasi-wasipipas imapas qankunapaq allin kaqtaqa yachachinaypaq listollapuni kashasqayta.

²¹Judío runakunamanpas mana Judío runakunamanpas tukuy sonqon willarqani: Huchata saqepuspa Diosman kutirikuychis, Señorninchis Jesucristopipas iñiychis, nispa.

²²Kunanqa Santo Espirituq pusasqanpunin Jerusalén llaqtaman rishani, chaypi imachus sucedewananta mana yachaspa.

²³Ichaqa Santo Espiritullan sapanka llaqtapi willamuwan carcelman haykunayta ñak'arinaytawan.

²⁴Manataqmi imaraykupas kawsayniytaqa ñoqa kikiypaq ancha chaniyoqpaqchu qhawarikuni, aswanpas kayllatan munani: Señor Jesusmanta chaskisqay llank'anata kusikuywan tukuyllatapuni. Kay llank'anaqa Diospa khuyapayakuyninmanta allin willakuykunata willanaymi.

²⁵Diospa kamachikushasqanmanta qankunaman willaspaymi purirqani, kunanqa yachanin, manan mayqenniykichispas uyayta rikuwankichisñachu.

²⁶Chaymi kunan sut'inchaykichis: Ñoqaqa manañan huchayoqchu kani pillapas wiñaypaq huchachasqa kananmantaqa.

²⁷Diospa lliw yuyaykusqantaqa mana pakaykuspan willarqaykichis.

²⁸Chayrayku cuidakuychis kikiykichista, hinallataq lliw iñiqkunatapas cuidaychis, paykunata cuidaqpaqmi Santo Espíritu churarqasunkichis. Diospa iñiq t'aqanta michiychis, chay iñiq t'aqantan Jesucristoq yawarninwan rantikurqan.

²⁹Yachanin ripusqaymantaña q'otuqkuna yarqasqa lobokuna hina qankunaman haykumunanta, paykunaqa iñiqkunatan tukurqoyta munanqaku.

³⁰Qankunallamantataqmi waqllisqa kaqkunata rimaq runakuna hatarinqa, iñiqkunata q'otuspa aysaqanankupaq.

³¹Chayrayku rikch'ashallaychispuni, kinsa watantin tuta p'unchay sapankata waqayniywan mana samaspa anyasqayta yuyarispaykichis.

³²Kunanqa, wawqeykuna, Diosmanmi hap'iykachiykichis, paypa khuyapayakuyninmanta simitataq sonqoykichispi hap'iychis, chayqa atiyniyoqmi kallpachanasuykichispaq, chay hinapi Diospa lliw akllakusqankunawan kuska herenciata Diosmanta chaskinaykichispaq.

³³Manan piqpa qolqentapas qorintapas p'achantapas munapayarqanichu.

³⁴Qankunaqa yachankichisñan kay makiykunawan llank'aqtiy ñoqapaqpas ñoqawan kaqkunapaqpas mana imapas pisiwasqankuta.

³⁵Tukuy ruwasqaypin rikuchirqaykichis chay hinata llank'aspa pisichikuqkunata yanapanapuni kasqanta. Señor Jesuspa siminkunata yuyariychis, pay kikinmi nirqan: Aswan kusisamiyoqqa qoqmi chaskiqmantaqa, nispa.

³⁶Chaykunata nispañan llapankuwan qonqoriykukuspa mañakurqan.

³⁷Chaymi llapallanku khuyayta waqarqanku, hinaspan Pablota abrazaykuspa much'aykurqanku:

³⁸Manañan uyaytaqa rikunkichisñachu, nisqanmanta khuyaytapuni llakikuspanku. Hinaspan barcoman riysirqanku.