Read Quechua Cuzco Bible 1988 HECHOS 21 Bible Online

HECHOS 21 - Quechua Cuzco Bible 1988 bible

HECHOS 21

¹Paykunawan t'aqarinakuspaykun barcoman haykuspa Kos nisqa islaman cheqanta rirqayku, qhepantin p'unchaytaq Rodas islaman, chaymantataq Pátara llaqtaman rirqayku.

²Fenicia hap'iyman riq barcota tarispataq chayman haykuspayku puririrqayku.

³Rishaspataq lloq'e ladopi Chipre islata rikurqayku, hinaspan Siria provinciaman pasaspa Tiro llaqtaman chayarqayku, chaypi barcoqa cargata saqenan kaqtin.

⁴Iñiqkunata chay llaqtapi tarispaykutaq qanchis p'unchayta qheparqayku. Chaymi paykunaqa Santo Espirituq willasqan kaspa Pablota hark'arqanku: —Amaña Jerusalén llaqtaman riychu, nispa.

⁵Chaywanpas, chay p'unchaykuna qhepatan lloqsirqayku, llapallankun warmintin wawantin llaqta hawakama pusawarqanku. Hinaspan mama qocha patapi qonqoriykukuspa mañakurqayku.

⁶Abrazaykunakusqayku qhepatan barcoman haykurqayku, paykunataq wasinkuman kutipurqanku.

⁷Ñoqaykutaq Tiro llaqtamanta barcopi purimuspaña Tolemaida llaqtaman chayarqayku. Chaypi wawqe-panakunata napaykuspaykun paykunawan huk p'unchayta qhepakurqayku.

⁸Chaymantataq qhepantin p'unchay puririspayku Cesarea llaqtaman chayarqayku. Diosmanta allin willakuykunata willaq Felipeq wasinpitaq qorpachakurqayku, payqa serviqpaq akllasqa qanchismanta hukninmi karqan.

⁹Paymi tawa doncella ususiyoq karqan, paykunan profetizaqku.

¹⁰Chaypi pisi p'unchaykuna kashaqtiykutaq Agabo sutiyoq profeta*f** Judea provinciamanta uraykamurqan,

¹¹paymi asuykamuwaspanku Pabloq chumpinwan chakinta makintawan watakuspa nirqan: —Kay hinatan Santo Espirituqa nin: Ahinatan Judío runakunaqa Jerusalén llaqtapi kay chumpiyoq qharita watanqaku, hinaspan wak suyu runakunaman hap'iykachinqaku, nispa.

¹²Chayta uyarispaykun ñoqaykupas chaypi kaqkunapas Pablota valekurqayku Jerusalén llaqtaman amaña rinanpaq.

¹³Chaymi Pabloqa nirqan: —¿Imatan kay hinata waqaspa sonqoyta “phoq” nichiwankichis? Ñoqaqa manan watasqa kanallaypaqchu listoqa kashani, aswanpas Señor Jesuspa sutinrayku Jerusalén llaqtapi wañunaypaqwanmi listo kashani, nispa.

¹⁴Chaymi mana hark'achikuyta munaqtin upallakapurqayku, hinaspan nirqayku: —Señorpa munaynin ruwasqa kachun, nispa.

¹⁵Chay p'unchaykuna qhepataña q'epichakuspayku Jerusalén llaqtaman wicharqayku.

¹⁶Hinan Cesarea llaqtamantapas wakin iñiqkunaqa riysillawarqankutaq, paykunan Chipre islamanta Mnasón sutiyoq ñawpa iñiqpa wasinman pusawarqanku chaypi qorpachakunaykupaq.

¹⁷Jerusalén llaqtaman chayaqtiykun wawqe-panakunaqa kusisqa chaskiwarqanku.

¹⁸Qhepantin p'unchaytaq Pabloqa ñoqaykupiwan Jacoboqta rirqan, chaypin iñiq t'aqapi uma runakuna llapanku huñuykusqa kasharqanku.

¹⁹Paykunata napaykusqanmantañataq Pabloqa llapachallanta willarqan, imaynatachus Diosqa mana Judío runakuna ukhupi paywan ruwasqanta.

²⁰Hinan paykunaqa chayta uyarispa Diosta hatuncharqanku, hinaspataq Pablota nirqanku: —Rikushankin, wawqéy, askha waranqanpi Judío runakunaq iñisqanta, llapankutaqmi Moisespa kamachikuy siminman sinchitapuni k'askakuqkuna kanku.

²¹Qanmantataqsi rimaqta uyarinku: Mana Judío runakuna ukhupi tiyaq Judío runakunatas yachachishanki, Moisespa kamachikuy siminta mana kasunankupaq, churinkuq qhari-kaynin qarachatapas ama señalanankupaq, amallataq costumbrenchisman hinapas purinankupaqwan, nispa.

²²¡Kunanri imanaykusuntaq! Chayamusqaykitaqa yachanqakupunin.

²³Chay hinaqa, kay nisqaykuta ruway: Ñoqayku ukhupin Diosman prometekuq tawa qharikuna kashan.

²⁴Paykunata pusaspayki paykunawan kuska Dios yupaychana wasipi ch'uyanchakuy, hinaspa paykunapaq gastay, chaymantañan chukchankuta rutuchikuyta atinqaku. Ahinapin llapanku yachanqaku qanmanta willakusqankuqa mana cheqaqpunichu kasqanta, aswanpas yachanqaku qanpas Moisespa kamachikuy siminta hunt'aspa purimusqaykita.

²⁵Iñiq mana Judío runakunamanqa ñan qelqarqanchisña rimanakusqanchista: Aman mikhunkichischu idolokunaman haywasqa mikhunatapas, yawartapas, seq'osqa aychatapas, amallataq qhellipipas purinkichischu, nispan, nispa.

²⁶Hinaqtinmi Pabloqa chay runakunata pusarikuspa qhepantin p'unchayta paykunawan kuska ch'uyanchakurqan, chaymantataq Dios yupaychana wasiman haykurqan ch'uyanchakuy p'unchaykuna hayk'aqchus hunt'akunanta willanapaq, hayk'aqtaqchus sapankanku ofrendankuta haywanankutapas willanapaq.

²⁷Qanchis p'unchayña hunt'akunan kashaqtintaq, Asia provinciamanta wakin Judío runakunaqa Dios yupaychana wasipi Pablota rikuspa, llapallan runata ch'aqwachirqanku, payta hap'irqospataq qaparirqanku:

²⁸¡Israel qharikuna, yanapawayku! Kay runan hinantinpi yachachimun Israel llaqta contra, Moisespa kamachikuy simin contra, Dios yupaychana wasi contrapiwan, chaymantapas mana Judío runakunatan Dios yupaychana wasiman pusaykun, hinaspan kay ch'uya cheqasta qhellichaykun, nispanku.

²⁹Ñawpaqtan Efeso llaqtayoq Trofimota paywan kuskata llaqtapi rikurqanku, chaymi yuyarqanku Dios yupaychana wasiman Pabloq pusaykusqanta.

³⁰Hinan llaqtallantin ch'aqwaspa runakunaqa huñunarqokurqanku, hinaspan Pablota hap'ispa Dios yupaychana wasimanta hawaman aysaspa punkukunatapas wisq'arqankupacha.

³¹Pablota wañurqachiytapuni munashaqtinkun Roma soldado comandanteman willarqanku: —Jerusalenpin lliw runakuna manchanata ch'aqwashanku, nispa.

³²Chaymi comandanteqa soldadokunata capitankunatawan usqhaylla pusarikuspan paykunaman phawarirqan. Hinan comandanteta soldadokunatawan rikuspanku manaña Pablota maqarqankuchu.

³³Hinaqtinmi comandanteqa Pablota hap'ispa, kamachirqan iskay cadenawan payta watanankupaq. Hinaspan tapurqan pichus kasqanta imatachus ruwasqantawan.

³⁴Runakuna ukhumantataq qaparimurqanku, wakin hukta, wakintaq wakta, chaymi ch'aqwasqankurayku mana imatapas sut'ita yachaspan Pablota cuartelman apachirqan.

³⁵Pata-pata seqanaman chayaqtintaq soldadokunaqa Pablota wanturqanku, runakuna phawaykamusqanrayku.

³⁶Runakunaqa ancha askhan qatimurqanku: —¡Wañuchun! nispa qaparkachaspanku.

³⁷Pablota cuartelmanña apaykushaqtinkutaq, Pabloqa comandanteta nirqan: —¿Huk ratochallapas rimapayaykimanchu? nispa. Comandantetaq nirqan: —¿Yachankichu Griego rimayta?

³⁸¿Manachu qanqa kashanki chay Egipto runa? Paymi kay ñawpaq p'unchaykunallapi runakunata hatarichispa ch'aqwachirqan, hinaspa runa wañuchiqkunata tawa waranqanpi ch'inneqman pusarqan, nispa.

³⁹Chaymi Pabloqa nirqan: —Ñoqaqa Judío runapunin kani, Cilicia provinciapi ancha reqsisqa Tarso llaqtapi naceq. Kunanmi valekuyki runakunaman rimaykachiwanaykipaq, nispa.

⁴⁰Comandante: —Arí, niqtintaq, Pabloqa pata-pata seqanapi sayaykuspa, runakunata makinwan ch'inyachirqan, allinta upallaqtinkutaq Hebreo rimaypi paykunata nirqan: