Read Quechua Cuzco Bible 1988 HECHOS 22 Bible Online

HECHOS 22 - Quechua Cuzco Bible 1988 bible

HECHOS 22

¹—Wawqeykuna, taytakuna, kunan uyariykuwaychis rimarikuyniyta, nispa.

²Chaymi Hebreo rimaypi Pabloq rimasqanta uyarispa astawan upallarqanku. Hinan payqa nirqan:

³—Ñoqaqa Cilicia provinciapi kaq Tarso llaqtapi naceq Judío runapunin kani, ichaqa kay Jerusalén llaqtapin wiñarqani, yachachiqniytaqmi Gamaliel karqan, paymi allinta yachachiwarqan machulanchiskunaq kamachikuy siminta. Diosninchistan tukuy sonqoywan servirqani, imaynan kunan llapallaykichis servishankichis hina.

⁴Jesucristopi iñiqkunatan wañuchinaykama qatiykacharqani, qharikunatapas warmikunatapas wataspa carcelkunaman apaspay.

⁵Chaytaqa yachankun uma sacerdotepas lliw uma runakunapas. Paykunamantan ordenkunata mañakurqani Damasco llaqtapi Judío kamachiq-masinchiskunapaq. Hinaspan rirqani Jesuspi iñiqkunata watasqata Jerusalén llaqtaman apamuspay hasut'ichinaypaq.

⁶Ichaqa Damasco llaqtaman qayllaykushaqtiymi chawpi p'unchayta hina hanaq pachamanta qonqaylla sinchita k'anchaykamuwarqan.

⁷Chaymi pampaman wikch'ukuspay huk kunkata uyarirqani: ¡Saulo! ¡Saulo! ¿Imaraykun ñak'arichispa qatiykachawanki? nishawaqta.

⁸Ñoqataq nirqani: Wiraqocháy, ¿pitaq kanki? nispa. Hinan niwarqan: Ñoqaqa ñak'arichispa qatiykachawasqayki Nazaret llaqtayoq Jesusmi kani, nispa.

⁹Ñoqawan riqkunapas k'anchaytaqa rikurqankun, ichaqa manan uyarirqankuchu rimapayawaqniypa kunkantaqa.

¹⁰Ñoqataq nirqani: Señor, ¿imatan ruwasaq? nispa. Señortaq niwarqan: Sayarispa Damasco llaqtaman haykuy, chaypin nisunkiku imatachus ruwanaykita, nispa.

¹¹Chay sinchi k'anchaypa ñawsayachisqan manaña rikuqtiymi, puriq-masiykuna makiymanta pusaspa Damasco llaqtaman chayachiwarqanku.

¹²Chaypin tiyarqan Ananías sutiyoq runa. Paymi kamachikuy siminchista kasukuq karqan, chaymi llapa Judío runakuna allinpaq qhawarqanku.

¹³Paymi watukuq hamuwaspa niwarqan: Wawqéy Saulo, wakmanta qhawariy, nispa. Chaymi kaq ratopacha qhawarispa payta rikurqani.

¹⁴Hinan payqa niwarqan: Machulanchiskunaq Diosninmi ñawpaqmantaña akllarqasunki munayninta yachanaykipaq, chay Chanin Jesusta rikunaykipaq, paypa siminmantapuni kunkanta uyarinaykipaqwan.

¹⁵Qanmi Jesusmanta llapa runakunaman willakunki imatachus rikusqaykita uyarisqaykitawan.

¹⁶Chay hinaqa, ¿imatataq suyanki? Sayarispa bautizachikullayña, huchaykikunata Dioswan mayllichikuy, Señor Jesuspa sutinta waqyakuspa, nispa.

¹⁷Jerusalén llaqtaman kutispaymi Dios yupaychana wasipi mañakushaspay, mosqoypi hina karqani.

¹⁸Hinaspan Señor Jesusta rikurqani, paymi niwarqan: Usqhayllapuni Jerusalén llaqtamanta lloqsiy, ñoqamanta willakusqaykitaqa manan uyarinqakuchu, nispa.

¹⁹Chaymi ñoqaqa nirqani: Señor, paykunaqa yachankun Diosmanta yachachina sapanka wasipi qanpi iñiqkunata suq'aspa carcelman wisq'asqayta.

²⁰Hinallataqmi qanmanta willakuq Estebanta wañuchishaqtinkupas ñoqapas chaypi kasharqani, wañuchinankuta munaspay payta wañuchiqkunaq p'achantapas qhawaspay, nispa.

²¹Chaymi Señor Jesusqa niwarqan: Riy, karu llaqtapi mana Judío runakunamanmi kachasqayki, nispan, nispa.

²²Chaykamallan Pabloq rimasqanta uyarirqanku, chaymantataq qaparirqanku: —Chay hina runataqa wañuchiy, amapuni kawsachunchu, nispa.

²³Paykuna qaparkachaqtinku, p'achankutapas chanqaqtinku, hallp'atapas altoman hach'iqtinku,

²⁴comandanteqa cuartelman Pablota apanankupaq kamachikurqan, suq'ashaspalla tapunankupaqwan, imaraykuchus pay contra chay hinata qaparkachasqankuta yachananpaqwan.

²⁵Lazokunawan watashaqtinkutaq Pabloqa chaypi kashaq soldadokunaq capitanninta nirqan: —¿Atikullanchu Roma suyu runata mana huchachasqa kashaqtin suq'ayniykichisqa? nispa.

²⁶Chayta uyarispataq capitanqa comandanteman rispa willamurqan: —¿Kunanri imanankitaq? Chay runaqa Roma suyu runan kasqa, nispa.

²⁷Comandantetaq asuykuspa Pablota tapurqan: —Willaway, ¿Roma suyu runapunichu kanki? nispa. Pablotaq: —Arí, nirqan.

²⁸Hinan comandanteqa nirqan: —Ñoqaqa askha qolqewanmi Roma suyu runa kayta rantikurqani, nispa. Chaymi Pabloqa nirqan: —Ñoqaqa Roma suyu runapuniñan nacerqani, nispa.

²⁹Hinan Pablota suq'ashaspalla tapunankupaq kamachisqakunaqa qayllanmanta kaq rato hataripurqanku. Comandantepas watachisqanmanta mancharikurqan, Roma suyu runa kasqanta yachaspan.

³⁰Qhepantin p'unchaytaq comandanteqa imamantachus Judío runakuna Pablota huchachasqanta cheqaqtapuni yachayta munaspa, payta paskarqan, hinaspan sacerdote umallikunata llapan uma runakunaq huñunakuynintawan waqyachirqan. Pablota uraykuchispantaq paykunaq qayllanpi sayaykachirqan.