Read Quechua Cuzco Bible 1988 HECHOS 23 Bible Online

HECHOS 23 - Quechua Cuzco Bible 1988 bible

HECHOS 23

¹Hinaqtinmi Pabloqa uma runakunata allinta qhawaykuspa nirqan: —Wawqeykuna, ñoqaqa ch'uya sonqoywanmi Diospa qayllanpi kay p'unchaykama kawsani, nispa.

²Chaymi uma sacerdote Ananiasqa Pabloq ladonpi kaqkunata kamachirqan siminpi ch'aqlanankupaq.

³Hinan Pabloqa payta nirqan: —¡Yaw iskay uya, qantaqa Diosñataqmi ch'aqlasunki! ¿Kamachikuy simiman hina juzgawanaykipaq tiyashaspaykichu kamachikuy simi contra kamachinki ch'aqlawanankupaq? nispa.

⁴Qayllanpi sayashaqkunataq nirqanku: —¿Chay hinatachu Diospa uma sacerdotenta k'aminki? nispa.

⁵Pablotaq nirqan: —Wawqeykuna, manan yacharqanichu uma sacerdote kasqantaqa. Diospa Simin Qelqan nin: Llaqtaykipi kamachikuqmantaqa aman mana allintaqa rimankichu, nispa.

⁶Pabloqa wakin saduceokuna*f** wakintaq fariseokuna*f** kasqanta reparaspanmi uma runakunaq huñunakuyninpi kunkayoqta nirqan: —Wawqeykuna, ñoqaqa fariseon*f** kani, fariseoq*f** churin. Wañusqakunaq kawsarimpunanta suyakusqay hawan ñoqaqa juzgasqa kashani, nispa.

⁷Chay hinata niqtinmi, fariseokunaqa*f** saduceokunawan*f** churanakuyta qallarirqanku, hinan huñunakuyqa t'aqanasqa karqan.

⁸Saduceokunaqa*f** ninkun: Manan kawsarimpuypas, angelpas, espiritupas kanchu, nispa. Fariseokunan*f** ichaqa: Chaykunaqa kanmi, ninku.

⁹Sinchi qapariy kaqtinmi fariseokuna*f** t'aqamanta kamachikuy simita wakin yachachiqkuna sayarispa churapakurqanku: —Kay runapiqa manan ima mana allintapas tariykuchu. Espiritupaschá angelpaschá paytaqa rimaykun, nispa.

¹⁰Sinchi churanakuy kaqtintaq, Pablota paykuna llik'irqarinankuta manchakuspan comandanteqa soldadokuna uraykamunanpaq kamachikurqan, hinaspa chawpinkumanta Pablota qechurqospa cuartelman apaykunankupaq.

¹¹Qhepantin tutataq Señorqa Pabloman rikhurispa nirqan: —Kallpachakuy, Pablo. Imaynan Jerusalén llaqtapi ñoqamanta willakurqanki, ahinallatataqmi Roma llaqtapipas willakunaykipuni, nispa.

¹²Qhepantin paqartaq wakin Judío runakunaqa huñunakuspa jurarqanku: —Pablota wañuchinanchiskama ama mikhusunpaschu ukyasunpaschu, nispa.

¹³Chay juramento ruwaqkunan karqan tawa chunka kurak.

¹⁴Paykunan sacerdote umallikunaman kurak runakunamanwan rispa nirqanku: —Ñoqaykuqa juramuykun Pablota wañuchinaykukama ama imatapas mallinaykupaq.

¹⁵Kunanqa, qankuna uma runakunapiwan comandantemanta mañachimuychis paqarin qankunaman Pablota pusachimunanpaq, paymanta aswan sut'ita imatapas yachayta munaq tukuspallaykichis, ñoqaykutaq manaraq pay chayamushaqtin wañuchinaykupaq makillaña kashasaqku, nispa.

¹⁶Ichaqa Pabloq pananpa churinmi rimanakusqankuta uyarirqan, hinaspan cuartelman haykuspa Pabloman willamurqan.

¹⁷Chaymi Pabloqa capitankunamanta hukninta waqyarispa nirqan: —Kay waynachata comandanteman pusaripuway, huk willakuymi willamunan kashan, nispa.

¹⁸Hinan payqa waynachata comandanteman pusaykuspa nirqan: —Presonchis Pablon waqyariwaspa valekamuwan kay waynachata qanman pusamunaypaq, huk willakuyta willanasuykipaq, nispa.

¹⁹Comandantetaq makinmanta hap'iykuspa wakllaman pusarispa waynachata tapurqan: —¿Imatan willawanki? nispa.

²⁰Chaymi waynachaqa nirqan: —Judío runakunan rimanakushanku: Paqarin comandanteta valekusun Pablota uma runakunaq huñunakuyninman pusananpaq paymanta aswan sut'itapuni imatapas yachaq tukuspalla, nispanku.

²¹Ichaqa aman paykunata creenkichu, paykunamantaqa tawa chunka kurak hina qharikunan Pablota suyapashanku. Chay runakunan juran payta wañuchinankukama mana mikhunankupaq mana ukyanankupaq. Chaymi kunan listollaña kashanku, chay hinatapuni kamachinaykita suyaspanku, nispa.

²²Hinaqtinmi comandanteqa waynachata kachapuspa kamachirqan: —Kay willawasqaykitaqa aman pimanpas rimarinkichu, nispa.

²³Hinan comandanteqa iskay capitanninta waqyaspa kamachirqan: Iskay pachak chakillapi soldadokunata, qanchis chunka caballeriata, iskay pachaktataq lanzakunayoqta alistamuychis, las nueve horas tutata Cesarea llaqtaman rinaykichispaq.

²⁴Hinallataq caballokunatapas alistamuychis, Pablota sillaykachispa kamachikuq Felixman segurasqata apanaykichispaq, nispa.

²⁵Hinaspan kay hina cartata paykunawan apachirqan:

²⁶Ñoqa Claudio Lisiasmi, qan ancha respetasqa kamachikuq Felixta napaykamuyki.

²⁷Kay qharitan Judío runakuna hap'irqanku, hinaspan wañuchinankupaqña kashaqtinku, soldadoykunawan qechuchirqani Roma suyu runa kasqanta yachaspay.

²⁸Imamantachus payta huchachasqankuta yachayta munaspaymi Judío uma runakunaq huñunakuyninman pusarqani,

²⁹hinaspan yachamurqani paykunaq kamachikuy siminku contra ruwasqanmanta payta huchachasqankuta, ichaqa manan ima huchatapas paypiqa tarirqanichu wañunanpaq hinapas carcelpi kananpaq hinapas.

³⁰Chaywanpas Pablota wañuchinankupaq Judío runakunaq rimanakusqankuta yacharqospaymi qanman payta apachimushayki. Payta huchachaqkunatapas kamachillanitaq imapas contranpi kaqtinqa qayllaykipiña uyanpi ninankupaq, nispa.

³¹Hinan soldadokunaqa kamachisqaman hina tutalla Antípatris llaqtaman Pablota pusarqanku.

³²Qhepantin p'unchaytaq chakipi soldadokunaqa cuartelman kutipurqanku, caballería soldadokunallaña Pablowan rirqanku.

³³Cesarea llaqtaman chayaspankutaq kamachikuq Felixman carta apasqankuta qospa Pablotapas qayllanman pusaykurqanku.

³⁴Kamachikuq Felixtaq cartata leespa Pablota tapurqan may provinciamantachus kasqanta, Cilicia provinciamanta kasqanta yachaspataq,

³⁵nirqan: —Huchachaqniykikuna chayamuqtinña uyarisqayki, nispa. Hinaspan rey Herodespa palacionpi wisq'amunankupaq kamachikurqan.