Read Quechua Cuzco Bible 1988 HECHOS 24 Bible Online

HECHOS 24 - Quechua Cuzco Bible 1988 bible

HECHOS 24

¹Phisqa p'unchay qhepatataq uma sacerdote Ananiasqa wakin kurak runakunawan Tértulo sutiyoq abogadopiwan chayamurqan, hinaspan kamachikuq Felixman Pablo contra willarqanku.

²Pablota waqyamuqtinkutaq Tertuloqa huchachayta qallarinanpaq Felixta nirqan: —Ancha respetasqa wiraqocha Félix, qan kaqtiykin sumaq thak-kaypi kawsashayku, yuyayniyoq kasqaykiraykutaqmi kay suyupaq lliw imapas allinta ruwakushan. Tukuy tiempopipas tukuy hinantinpipas anchata agradecekuspa chaskikuyku.

⁴Ichaqa ama anchata tardachinayrayku valekuyki, llamp'u sonqo kayniykiwan huk ratolla uyariykuwanaykikupaq.

⁵Yachaykun kay runaqa millay onqoy hina kasqanta. Hinantinpin llapallan Judío runakunata ch'aqwachin, Nazaret t'aqa runakunaq umallintaqmi kanpas.

⁶Payqa Dios yupaychana wasitapas qhellichaytan munarqan, chaymi hap'ispayku [kamachikuy simiykuman hina juzgayta munarqayku.

⁷Ichaqa comandante Lisiasmi hamuspa makiykumantaña qechurqowarqanku,

⁸hinaspan niwarqanku qanpa qayllaykipiña huchachanaykupaq.] Qan kikiyki payta allintapuni tapuykuy huchachasqayku cheqaq kasqanta yachanaykipaq, nispa.

⁹Tértulo rimayta tukuqtinmi Judío runakunapas: —Hinapunin chaykunaqa, nirqanku.

¹⁰Hinaqtinmi kamachikuq Felixqa Pablota: —Rimarikuy, nirqan. Hinan Pabloqa nirqan: —Kay suyupi unay wataña juez kasqaykita yachaspan mana mancharispa tupapakusaq.

¹¹Dios yupaychanaypaq Jerusalén llaqtaman risqayqa chunka iskayniyoq p'unchay hinallaraqmi kashan, yachayta munaspaqa qan kikiyki tapuykuy hinachus manachus kasqanta.

¹²Kay huchachawaqniykunaqa manan Dios yupaychana wasipi piwanpas churanakushaqtachu tariwarqanku, manallataq Diosmanta yachachina wasikunapipas llaqtaq may cheqasninpipas runakunata ch'aqwachishaqtachu tariwarqanku.

¹³Manallataqmi kunan huchachashawanku chaykunataqa probayta atinkumanchu.

¹⁴Chaywanpas sut'itan nini, ñoqaqa machulaykunaq Diosnintan yupaychani Jesucristoq yachachikuyninman hina, chaytan paykunaqa sutichanku “wak t'aqa” nispa. Ichaqa ñoqapas iñinin Moisespa lliw kamachikuy siminpipas profetakunaq*f** qelqasqanpipas.

¹⁵Paykuna hinallataqmi ñoqapas Diospi suyakuni chaninkunatapas mana chaninkunatapas wañusqankumanta Diospa kawsarichimpunanta.

¹⁶Chayraykun ñoqapas Diospa qayllanpipas runakunaq qayllanpipas tukuy tiempo mana huchachana ch'uya sonqoyoq kawsaytapuni munani.

¹⁷Unay watamantañan Jerusalenman kutirqani llaqtamasiy wakcha runakunapaq yanapay qolqeta apaspay, chay hinallataqmi ofrendakunata Diosman haywanaypaq rirqani.

¹⁸Chayta ruwashaqtiymi Asia provinciamanta hamuq Judío runakuna Dios yupaychana wasipi tariwarqanku. Chay rato ñoqaqa ruwayniykuman hina ch'uyanchasqañan kasharqani, chaypiqa tariwarqanku manan askha runawan kashaqtachu, manallataq ch'aqwachishaqtapaschu. Chay runakunan qayllaykiman chayamunanku, hinaspan imapas contraypi paykunaq kaqtinqa uyaypi niwananku.

²⁰Mana chayqa kaypi kaqkuna niwachunku uma runakunaq huñunakuyninpa qayllanpi kashaqtiy, ima mana allin ruwasqaytachus tarisqankuta.

²¹Ichapas qayllankupi qaparispay: Wañusqakunan kawsarimpunqaku, nispa nisqallaymanta kunan paykunaqa huchachashawankuman, nispa.

²²Hinaqtinmi Felixqa Jesucristomanta yachachikuyta sut'itapuni yachaspa, chay asuntota saqespa nirqan: —Comandante Lisias hamuqtinñan asuntoykichistaqa imayna kanantapas sut'inchasqaykichis, nispa.

²³Capitantataq kamachirqan: —Pablota kacharisqallata waqaychamuy, amataq pi amigonpas hamuspa servinantaqa hark'aychu, nispa.

²⁴Pisi p'unchaykuna qhepatan Felixqa Judío warmin Drusilapiwan hamurqan, hinaspan Pablota waqyachispa Jesucristopi iñiymanta payta uyarirqan.

²⁵Chanin kawsaymanta, cuerpota kamachiymanta, hamuq juicio p'unchaymantawan Pablo rimariqtintaqmi Felixqa mancharikuspa nirqan: —Kunanqa ripullayraq, tiempoy kaqtinña waqyachimullasqaykitaq, nispa.

²⁶Chaywanpas Pabloq qolqe lluk'iykunantan suyasharqan kacharipunanpaq, chaymi sapa kuti waqyachimuspa paywan parlallaqpuni.

²⁷Iskay wata hunt'akuqtintaqmi Felixpa rantinpi Porcio Festo kamachikuq haykurqan. Felixtaq Judío runakunawan allinpi kawsayta munaspa Pablotaqa presollatapuni saqerqan.