Read Quechua Cuzco Bible 1988 HECHOS 27 Bible Online

HECHOS 27 - Quechua Cuzco Bible 1988 bible

HECHOS 27

¹Italia suyuman barcopi apawanankupaq rimanakuqtinkutaq Pablota entregarqanku wakin presokunatawan Augusto nisqa soldado tropapi Julio sutiyoq capitanman.

²Adramitio llaqtamanta barcoman haykuspataq puririrqayku Asia provincia puertokunaman rinaykupaq. Macedonia provinciapi Tesalónica llaqtayoq Aristarcopas puriysiwarqankun.

³Qhepantin p'unchaytaq Sidón llaqtaman chayarqayku, hinan capitán Julioqa sumaq runa kaspa Pablota mana hark'arqanchu amigonkunaman rinanta, chay hinapi payta yanapaykunankupaq.

⁴Chaymanta lloqsispaykutaq ñawpaqeykumanta wayramuqtin Chipre islaq pisi wayrana ladonta rirqayku.

⁵Cilicia provinciaq Panfilia provinciaq qayllanta mama qochanta rispaykutaq, Licia provinciapi Mira llaqtaman chayarqayku.

⁶Chaypin capitanqa tarirqan Alejandría llaqtamanta hamuspa Italiaman riq barcota. Hinaspan chayman pusaykuwarqanku Italiaman apawanankupaq.

⁷Allillamanta askha p'unchaykunaña barcopi rispaykutaq, Gnido llaqta chimpaman ñak'ayta chayarqayku, ñawpaqeykumanta wayramusqanraykutaq mana cheqanta riyta atirqaykuchu, chaymi Salmón chupata pasaspa Creta islaq pisi wayrana ladonta muyuykurqayku.

⁸Hallp'a qayllanta ñak'ayta rispaykutaq Pisi Wayrana nisqa k'uchuman chayarqayku. Chay qayllapin Lasea llaqta karqan.

⁹Mana usqhayta puririqtiykutaq paray tiempo[5] chayamurqanña, hinan mama qochanta puriyqa sinchi sasaña karqan. Chaymi Pabloqa paykunata nirqan:

¹⁰—Wiraqochaykuna, allintan reparashani barcopi puriyninchisqa sinchi sasallaña kananta, manan cargallatachu barcollatapaschu chinkachisun, ñoqanchispas sinchi sasapin rikukusun, nispa.

¹¹Ichaqa capitanmi Pabloq nisqanta mana kasurqanchu, aswanmi kasurqan barco purichiqta barcoyoqtawan.

¹²Paray tiempota barco chaypi samananpaq mana allin kaqtintaq, yaqa llapallanku yuyaykurqanku chaymanta lloqsispa Fenice puertoman imaynallamantapas chayayta. Chay Fenice llaqtan Greta islapi kashan, inti haykuy lado qhawashaq, chaypin paray tiempo samayta munarqanku.

¹³Uraymanta llamp'ullata wayrarimuqtinmi rinankupaq yuyaykusqanku allinña rikch'akurqan. Chaymi barco sayachina fierro anclata qochamanta aysarqospa Creta isla qayllanta rirqanku.

¹⁴Manaraq karuta rishaqtiykutaq Creta ladomanta tutuka wayra wayramurqan.

¹⁵Barcoman wayra waqtakuqtintaq mana imaynamantapas barcota cheqanchayta atispa hinallataña wayrawan apachikurqayku.

¹⁶Kauda nisqa huch'uy islaq pisi wayrana ladonta pasarqayku, chaypin barcoq aysasqan boteta ñak'ayta watarqayku.

¹⁷Hinan barcopi llank'aqkuna barco pataman boteta aysaspa, barcota uranmanta waskhakunawan mat'irqanku. Libia suyu qayllapi Sirte nisqa kuyuq aqoman winaykachiyta manchakuspataq, barcoq purinanpaq wayraq tanqanan telakunata paskaspa hinallaña apachikurqayku.

¹⁸Qhepantin p'unchaytaq wayra manapuni thaniqtin cargakunata qochaman wikch'uykuyta qallarirqanku.

¹⁹Kinsakaq p'unchaypitaq barcoq imaymanankunata makinkuwanpuni wikch'uykapurqanku.

²⁰Askha p'unchayña intipas qoyllurkunapas manaña rikhuriqtinmi mama qochapas sinchitaña phoqchiqeqtinmi, qespikuytaqa manaña yuyarqaykuñachu.

²¹Unayña paykuna mana mikhusqa kaqtinkutaq Pabloqa chawpinkupi sayaykuspa nirqan: —Wiraqochaykuna, kasullawankichisman karqan Cretapi qhepakunanchispaq chayqa, manan kay hinata ñak'arisunmanchu karqan, manataq tukuy imanchistapas wikch'usunmanchu karqan.

²²Chaywanpas kunanqa ama pisi kallpayaychischu, manan mayqenniykichispas wañunkichischu, aswanpas barcollan p'akikapunqa.

²³Yupaychasqay Diosniypa angelninmi ch'isi tuta rikhuriwaspa

²⁴niwarqan: Pablo, ama manchakuychu, hatun rey Cesarpa ñawpaqenmanqa chayankipunin. Barcopi puriq-masiykikunatapas llapantan qanrayku Dios khuyapayaspa qespichinqa, nispa.

²⁵Chay hinaqa, wiraqochaykuna, kallpachakuychis, ñoqaqa Diospin confiakuni niwasqanman hina hunt'akunanta.

²⁶Chaywanpas huk islamanpunin wayraqa chayachiwasunchis, nispa.

²⁷Adriático nisqa mama qochapi apaykachasqa kasqayku chunka tawayoq tutaña kaqtintaq, kuska tutata barcopi llank'aqkunaqa repararqanku hallp'aman qayllaykushasqaykuta.

²⁸Hinaspan titiyoq tupuna waskhata unuman kachaykuspa kinsa chunka soqtayoq metrota tarirqanku. Astawan ñawpaqman rispankutaq huk kutitawan kachaykuspanku iskay chunka qanchisniyoq metrollataña tarirqanku.

²⁹Qaqa-qaqaman haykuyta manchakuspataq, barcoq qhepanmanta tawa fierro anclakunata kachaykurqanku, hinaspan illarimunallantaña munaspa Diosmanta mañakurqanku.

³⁰Barcopi llank'aqkunataq rimanakurqanku barcomanta ayqekuyta munaspa, barcoq ñawpaqenmanta fierro anclakunata kachaykuq tumpalla boteta uraykachisharqanku.

³¹Ichaqa Pablon capitán Juliota soldadonkunatawan nirqan: —Barcopi llank'aqkunachus barcopi mana qhepanqaku chayqa, manan qankunaqa qespikuyta atinkichischu, nispa.

³²Hinan soldadokunaqa boteq waskhankunata kuchurqarispa boteta unuman wikch'uykurqanku.

³³Illarimushanankamataq Pabloqa llapankuta kamachirqan mikhunankupaq: —Kunanwanmi chunka tawayoq p'unchayña mana mikhusqa mana puñusqa kasqaykichis.

³⁴Chaymi valekuykichis kallpachakunaykichispaq imallatapas mikhunaykichispaq, manan mayqenniykichispapas chukchallaykichispas chinkanqachu, nispa.

³⁵Chayta nispataq t'antata hap'iykuspa llapankuq qayllanpi Diosman graciasta qorqan, hinaspan phasmispa mikhurqan.

³⁶Chaymi paykunapas llapanku kallpachakuspa mikhullarqankutaq.

³⁷Barcopiqa llapayku karqayku iskay pachak qanchis chunka soqtayoq runakunan.

³⁸Saksaykuspataqmi mama qochaman trigota wikch'uykurqanku barcota mana llasananpaq.

³⁹P'unchayamuqtintaq barco purichiqkunaqa chay hallp'a maychus kasqanta mana yacharqankuchu, ichaqa rikurqankun aqo pampayoq hatun qocha patata, hinaspan rimanakurqanku atispankuqa chayman barcota chayachinankupaq.

⁴⁰Barcoq fierro anclankunaq waskhankunata kuchurparispataq mama qochapi wikch'upurqanku, hinallataq timón watanakunatapas paskarqospa, wayraq tanqanan ñawpaqkaq telata wayraman hoqarispa aqo pampaman qayllaykurqanku.

⁴¹Ichaqa iskay ladomanta unuq tupanakusqanman chayaqtinkun barcoqa umanpamanta aqoman winakurqan, chaymi manaña kuyuriqtin barcoq qhepanqa unuq sinchi phoqchiqesqanwan p'akikurqan.

⁴²Hinaqtinmi soldadokunaqa yachachinakurqanku presokunata wañuchinankupaq, ama mayqenpas nadaspa ayqekunankupaq.

⁴³Capitantaq ichaqa Pablota qespichiyta munaspa wañuchiy munasqankuta hark'akurqan, hinaspan kamachikurqan naday atiqkunaqa ñawpaqta unuman wikch'uykukuspa hallp'a pataman lloqsinankupaq.

⁴⁴Wakintataq kamachirqan tablakunapi otaq barcoq imankunallapipas hap'ipakuspa lloqsinankupaq. Chay hinatan llapanku hallp'a pataman allillan lloqsirqanku.