Read Quechua Cuzco Bible 1988 HECHOS 28 Bible Online

HECHOS 28 - Quechua Cuzco Bible 1988 bible

HECHOS 28

¹Hallp'a pataman lloqsispaykuñan yacharqayku chay islaqa Malta nisqa kasqanta.

²Chaypi tiyaqkunataq khuyapayawaspanku sumaqta rikuwarqanku. Chaymi para chayaqtin chirisqanrayku ninata hap'ichispa q'oñikunaykupaq llapaykuta pusaykuwarqanku.

³Pablo llant'ata pallamuspa ninaman churaykuqtin, picaq mach'aqway nina qanqeymanta ayqespa, makinman wank'irqokurqan.

⁴Hinan chay islapi tiyaqkunaqa picakuq mach'aqwayta makinpi wank'isqata rikuspa ninakurqanku: —Kay runaqa runa wañuchiqpunin kanman, chaymi mama qochamantaña qespikun chaypas, Chanin Kay nisqa diosaqa mana munanchu kawsananta, nispanku.

⁵Ichaqa Pablon makinman wank'ikuq mach'aqwayta ninaman chhaphchiykurqan, manataq imanasqallapaschu karqan.

⁶Paykunataq Pablota qhawasharqanku: —Kunallanmi punkirinqachus wañusqachus wikch'ukunqapas, nispa. Unayta suyashaqtinku mana imapas sucedeqtintaq, huk-hinataña yuyaykuspa nirqanku: —Kay runaqa huk diosmi kanman, nispa.

⁷Maypichus kasharqayku chay qayllapi hallp'aqa islapi uma runa Publio sutiyoqpa hallp'anmi karqan, paymi wasinpi sumaqta chaskiykuwaspanku kinsa p'unchay qorpachawarqanku.

⁸Chaypachan Publioq taytanqa ruphapakuy onqoywan disenteriapiwan onqosqa puñunapi kasharqan, paymanmi Pabloqa watuykukuq haykurqan, hinaspan Diosmanta mañakuspaña onqosqaman makinta churaykuspa qhaliyachirqan.

⁹Chayta yacharqospan islapi tiyaq wakin onqoyniyoqkunapas hamurqanku. Hinan qhaliyachisqa karqanku.

¹⁰Chaymi paykunaqa askha regalokunata qoykuwarqanku, hinaspan puririshaqtiykupas tukuy imaymanata barcoman churaykapuwarqanku.

¹¹Chay islapi kinsa killa kasqaykumantañan Alejandría llaqtamanta barcopi ripurqayku. Chay barcoqa paray tiempo pasanankaman chaypi kasharqan. Barcoq ñawpaqenpitaq Mellizo nisqa diosninkuq rikch'ayninkuna llaqllasqa karqan.

¹²Siracusa llaqtaman chayaspataq, chaypi kinsa p'unchayta qheparqayku.

¹³Chaymanta qocha cantonta muyurimuspa, Regio llaqtaman chayarqayku. Qhepantin p'unchay uray wayra wayramuqtintaq iskay p'unchaymanta Puteoli llaqtaman chayarqayku.

¹⁴Chaypi wawqe-panakunawan tupaqtiykutaq valekuwarqanku qanchis p'unchayta paykunawan qhepakunaykupaq. Chaymantataq Roma llaqtaman rirqayku.

¹⁵Roma llaqtapi tiyaq iñiqkunaqa ñoqaykumanta uyarispankun Apio Foro llaqtakama aypamuwarqanku, wakintaq Kinsa Tambo nisqakama. Pablotaq paykunata rikuspa Diosman graciasta qorqan, hinaspan kallpachakurqan.

¹⁶Roma llaqtaman chayaqtiykutaq, kamachikuqkunaqa Pablota pay cuidaq soldadowan sapaqpi tiyananpaq saqellarqanku.

¹⁷Kinsa p'unchaymantataq Pabloqa Judío uma runakunata waqyachimurqan. Huñukamuqtinkutaq paykunata nirqan: —Wawqeykuna, ñoqaqa manan imatapas llaqtanchis contrapas, machulanchiskunaq costumbren contrapas ruwarqanichu. Chaywanpas Jerusalén llaqtapin llaqta-masinchiskuna Roma suyu kamachikuqkunaman presota hap'ichiwarqanku.

¹⁸Chaymi kamachikuqkunaqa allinta tapuwaspaña ñoqapi mana ima huchachaypas wañunaypaq hina kaqtin kacharipuyta munawarqanku.

¹⁹Ichaqa Judío runakuna ñoqa contra rimaqtinkun hatun rey Cesarpa juzgawanantapuni mañakurqani, chaywanpas manan imamantapas llaqta-masinchiskunata huchachanaypaqchu.

²⁰Chayraykun waqyachimurqaykichis qankunawan tupaykuspay rimanaypaq, Israel suyuq suyakuyninraykun kay cadenawan watasqa kashani, nispa.

²¹Chaymi paykunaqa nirqanku: —Ñoqaykuqa manan ima cartatapas Judea hap'iymantaqa contraykipi chaskiykuchu, manataqmi mayqen Judío-masinchis hamuqpas qanmantaqa imatapas mana allintaqa willakunchu, manan rimarillanpaschu.

²²Chaywanpas imatachus yuyaykusqaykitan uyariyta munayku. Yachaykun chay t'aqa contra hinantinpi rimasqankuta, nispa.

²³Chaymanta rimanankupaqmi huk p'unchayta akllarqanku, chaymi Pabloq chayakusqan wasiman aswan askha hamurqanku. Paykunamanmi p'unchay-ch'isiyaqta yachachirqan Diospa kamachikushasqanmanta willaspa. Chay hinatan Moisespa kamachikuy siminta profetakunaq*f** qelqasqanta sut'inchaspa, Jesuspi iñichiytapuni munarqan.

²⁴Hinaqtinmi wakinqa Pabloq nisqankunata allinpaq hap'irqanku, wakintaq ichaqa mana creerqankuchu.

²⁵Chaymi paykuna pura yuyayta mana tupachispa manaraq ripushaqtinku Pabloqa nirqan: —Allintan Santo Espirituqa profeta*f** Isaiaswan machulanchiskunaman nirqan:

²⁶Phaway kay runakunata nimuy: Anchataña uyarishaspapas manan entiendenkichischu, allintaña qhawashaspapas manan reparankichischu.

²⁷Kay runakunaq sonqonqa rumiyasqan, ninrinkupas roqt'uyasqan, ñawinkupas ñawsayasqan, ñawinkuwan mana rikunankupaq, ninrinkuwan mana uyarinankupaq, sonqonkuwanpas mana entiendenankupaq. Ahinapin ñoqaman mana kutirikamuwanqakuchu, manataq qhaliyachisqapaschu kanqaku, nispa.

²⁸Chay hinaqa, yachaychis, kunanmantaqa Diospa qespichiyninqa mana Judío runakunamanmi willakunqa. Hinan paykuna uyarinqaku, nispa. [

²⁹Chayta niqtintaq Judío runakunaqa lloqsirqanku, paykuna pura manchayta churanakuspa.]

³⁰Pabloqa arriendakusqan wasipin iskay watantin tiyarqan, chaypin chaskirqan llapan payta watukamuqkunata.

³¹Pabloqa mana manchaspan Diospa kamachikushasqanmanta willarqan, Señor Jesucristomantapas yachachirqan, manataq pipas paytaqa hark'arqanchu.