Read Quechua Cuzco Bible 1988 HECHOS 3 Bible Online

HECHOS 3 - Quechua Cuzco Bible 1988 bible

HECHOS 3

¹Pedropiwan Juanpiwanmi Dios yupaychana wasiman risharqanku Diosmanta mañakuna las tres horasta.

²Dios yupaychana wasimanmi such'u naceq runata runakuna apaqku, hinaspan Munaycha Punku nisqapi sapa p'unchay tiyachiqku, Dios yupaychana wasiman haykuqkunamanta limosnata mañakunanpaq.

³Such'utaq Pedrota Juantawan Dios yupaychana wasiman haykushaqta rikuspan hina limosnata mañakurqan.

⁴Chaymi Pedroqa Juanpiwan such'uta qhawaykuspa nirqanku: —Qhawarimuwayku, nispa.

⁵Hinan such'uqa paykunata qhawarayarqan imallatapas chaskiyta suyaspa.

⁶Chaymi Pedroqa nirqan: —Manan qolqeypas qoriypas kanchu, aswanpas imachus kapuwaqniytan qosqayki. Nazaret llaqtayoq Jesucristoq sutinpin kamachiyki: Sayarispa puririy, nispa.

⁷Chayta nispataq paña makinmanta aysarispa such'uta sayarichirqan, hinan chakinpas moqonpas kallpachakurqanpacha.

⁸Chaymi saltaspa sayarirqospan puririrqan, paykunawantaq Dios yupaychana wasiman haykurqan, purispa, saltaspa, Diosta hatunchaspa ima.

⁹Llapa runakunataq purishaqta, Diosta hatunchashaqta rikuspa

¹⁰chay such'uta reqsirqanku Dios yupaychana wasi Munaycha Punku nisqapi limosnata mañakuspa tiyaq kasqanta, chaymi anchata mancharikuspa muspharqanku.

¹¹Salomón portal nisqapin qhaliyachisqa such'uqa Pedrota Juantawan mana kacharispa hap'ipakurqan, chaymi sinchita musphaspa llapan runakuna paykunaman huñurqakamurqanku.

¹²Paykunata rikuspan Pedroqa nirqan: —Israel runakuna, ¿imaraykun kaymanta sinchita musphashankichis? ¿Imaraykun ñoqaykuta qhawawankiku atiyniykuwanpas otaq Dios sonqo-kayniykuwanpas kay runata puririchiykuman hinata?

¹³Aswanpas machulanchis Abrahampa, Isaacpa, Jacobpa Diosninmi kamachin Jesusta anchatapuni hatuncharqan, paytan qankunaqa wañuchinapaq hap'ichirqankichis. Pilatoña kacharipuyta munashaqtinpas qankunaqa manan munarqankichischu.

¹⁴Mana huchayoq chanin Jesusta kacharinanta mañakunaykichistaqa runa wañuchiqta kacharinantan mañakurqankichis.

¹⁵Hinaspan qankunaqa kawsay qoqta wañuchirqankichis. Ichaqa Diosmi payta wañusqanmanta kawsarichimpurqan, ñoqaykutaq chay kawsarimpusqanmanta testigokuna kayku.

¹⁶Kay runataqa rikunkichis reqsinkichismi riki, paymi Jesuspi iñispa kallpachakun. Chay iñiyninmi kay runata qhaliyarqachipun, imaynan kunan llapaykichis qhalita rikushankichis hina.

¹⁷Llaqta-masiykuna, ñoqaqa yachanin qankunapas kamachikuqniykichiskunapas Jesusqa pichus kasqanta mana yachaspa wañuchisqaykichista.

¹⁸Chay hina ruwasqaykichiswanmi Diosqa hunt'arqan Cristo ñak'arinanmanta ñawpaqmantaña llapan profetankunawan*f** willachisqanta.

¹⁹Chay hinaqa, huchaykichista saqepuspa Diosman kutirikuychis huchaykichiskuna pichasqa kananpaq, ahinapin Señor Diosqa sumaq kawsaypi samarichisunkichis,

²⁰Jesusta kachamuspasuykichis. Paytan Diosqa ñawpaqmantaña akllarqan qankunapaq Cristo kananpaq.

²¹Chaywanpas payqa hanaq pachapiraqmi qhepanan, tukuy imaymanata Dios allichanankama. Chaykunatan Diosqa paypaq t'aqasqa profetankunawan*f** unaymantaña willachirqan.

²²Moisesmi ñawpa machulaykichiskunaman nisqa: Señor Diosniykichismi wawqeykichiskuna ukhumanta ñoqa hina profetata*f** sayarichipusunkichis, paytan kasunkichis lliw imaymana nisqasuykichista.

²³Mayqen runapas chay profetata*f** mana kasuqqa, Diospa llaqtan ukhumantan wikch'usqa kanqa, nispa.

²⁴Hinallataq Samuelmantapacha qallarispa llapa profetakunapas*f** kay p'unchaykunamanta willakurqanku.

²⁵Qankunapaqmi profetakunaqa*f** rimarqan, machulaykichiskunawan Diospa rimanakusqanpas qankunallapaqtaqmi karqan. Paymi Abrahamta nirqan: —Mirayniykiwanmi llapallan kay pacha ayllukuna saminchasqa kanqaku, nispa.

²⁶Diosqa kamachinta kawsarichispan qankunamanraq ñawpaqta kachamurqan sapankata mana allin ruwasqanmanta t'aqaspa saminchanasuykichispaq, nispa.