Read Quechua Cuzco Bible 1988 HECHOS 4 Bible Online

HECHOS 4 - Quechua Cuzco Bible 1988 bible

HECHOS 4

¹Pedrowan Juanwan runakunaman rimaykushaqtinkun sacerdotekuna, Dios yupaychana wasi qhawaqkunaq umallin, saduceokunapiwan*f** hamurqanku.

²Paykunaqa sinchitan phiñakurqanku Pedroq Juanpiwan: Jesusmi kawsarimpurqan, lliw wañuqkunapas kawsarimpullanqataqmi, nispa yachachisqankumanta.

³Hinaspan paykunata hap'ispa ch'isiña kaqtin carcelman qhepantin p'unchaykama churarqanku.

⁴Chaywanpas paykunaq willasqanta uyariqkunaqa askhan Jesuspi iñirqanku. Chaymi qharikunalla yupasqa phisqa waranqa hina karqanku.

⁵Qhepantin p'unchaytaq Jerusalén llaqtapi huñunakurqanku kamachikuqkuna, kurak runakuna, kamachikuy simita yachachiqkunapiwan.

⁶Hinallataq chaypi kasharqanku uma sacerdote Anaspas, Caifaspas, Juanpas, Alejandropas, uma sacerdote ayllumanta wakinkunapiwan.

⁷Hinaspan Pedrota Juantawan chawpinkupi sayaykachispa tapurqanku: —¿Ima atiywanmi, piqpa sutinpin, qankunaqa kayta ruwashankichis? nispa.

⁸Chaymi Pedroqa Santo Espirituwan hunt'a kaspa paykunata nirqan: —Llaqta kamachiqkuna, Israelpi kamachikuqkunapas,

⁹qankunan tapushawankiku huk onqosqa runapaq allinta ruwasqaykumanta imaynamantachus pay qhaliyachisqaykumantawan.

¹⁰Chhaynaqa, qankunapas llapa Israel runakunapas yachaychis, Nazaret llaqtayoq Jesucristoq sutinpin kay runaqa qhaliyarqapun, chaymi qayllaykichispi sayashan. Chay Jesucristotan qankunaqa chakatarqankichis, ichaqa Diosmi payta wañusqanmanta kawsarichimpun.

¹¹Diospa Simin Qelqan nin: Wasita perqashaspaykichis wikch'usqaykichis rumin kunanqa esquina hap'iq rumi kapun, nispa. Chaymi Jesusmanta rimarqan.

¹²Diosmi runakunapaq Jesús sutiyoqta churarqan, payllapuni runakunata qespichinanpaq. Jesusmanta wakqa manan pipas qespichiq kanchu, nispa.

¹³Chaymi kamachikuqkunaqa Pedrota Juantawan mana mancharispa rimaqta uyarispa, mana estudiaq runakunalla kasqankutawan rikuspa muspharqanku, hinan chayraq repararqanku Jesuspa puriqmasin kasqankuta.

¹⁴Qhaliyachisqa runapas paykunawanmi sayasharqan, chaymi manaña imatapas paykuna contra rimarqankuchu.

¹⁵Hinaspanmi uma runakunaq huñunakuyninmanta Pedrota Juantawan hawaman lloqsichispanku paykunalla rimanakurqanku:

¹⁶—¿Imanasuntaq kay runakunata? Jerusalén llaqta llapallan runakunan yachan kay musphana milagro ruwasqankutaqa, manataqmi chaytaqa negayta atisunmanchu.

¹⁷Aswanpas, wakin runakuna amaña yachanankupaq paykunata manchachisunchis: Kunanmantaqa amañan pi runamanpas Jesuspa sutinpiqa rimankichischu, nispa.

¹⁸Hinaspan kamachikuqkunaqa paykunata waqyaykuspa kamachirqanku: —Amañan Jesuspa sutinpiqa rimankichischu, amapunin pimanpas yachachinkichischu, nispa.

¹⁹Chaymi Pedroqa Juanpiwan nirqanku: —Qankuna kikiykichis chaninchaychis, ¿Diospaqqa allinchu kanman payta mana kasukuspa qankunata kasukuyniyku?

²⁰Rikusqaykuta uyarisqaykuta willaytaqa manapunin upallakuykumanchu, nispa.

²¹Chay qhaliyachisqamantaqa llapa runan Diosta hatuncharqanku, chaymi kamachikuqkunaqa mana imaynamantapas muchuchiyta atispa, paykunata manchachispalla kacharipurqanku.

²²Chay qhaliyachisqa runaqa tawa chunka kurak watayoqñan karqan.

²³Kacharisqa kaspankutaq Pedrowan Juanwan iñiq-masinkuqman ripurqanku, hinaspan sacerdote umallikunaq kurak runakunaq paykunaman imaynatachus nimusqankuta willakurqanku.

²⁴Chayta uyarispan paykunaqa huk sonqolla Diosmanta mañakurqanku: —Qollana Señor Diosniyku, qanmi hanaq pachata, kay pachata, mama qochata, chaykunapi lliw kaqkunatapas kamarqanki.

²⁵Qanmi Santo Espirituwan kamachiyki machulayku Davidta rimachirqanki: ¿Imaraykun hatun suyukunaqa awqa sayarinku? ¿Imaraykun llaqtakunaqa yanqanpaq yuyaychanakunku?

²⁶Kay pacha reykunan Señorpa contranpi sayarinku, Hawisqan Reypa contranpi sayarinku, nispa.

²⁷Cheqaqtapunin Herodespas Poncio Pilatopas kay llaqtapi huñunakurqanku mana Judío runakunawan Israel runakunapiwan mana huchayoq kamachiyki Jesuspa contranpi, paytan akllakurqanki Cristo*f** kananpaq.

²⁸Chaytan paykunaqa ruwarqanku ñawpaqmantaña yuyaykusqaykiman hinapuni hunt'akunanpaq.

²⁹Kunanqa, Señor Diosniyku, qhawariy manchachiwasqankuta, kamachiykikunatapas kallpachawayku mana manchakuspa simiykita willanaykupaq.

³⁰Chhaynallataq atiyniykita rikuchiy mana huchayoq kamachiyki Jesuspa sutinpi onqosqakunata qhaliyachispa, señalkunatapas milagrokunatapas ruwaspa, nispa.

³¹Mañakuyta tukuqtinkutaq, huñukusqanku cheqasqa kuyurirqan, hinan llapankuman Santo Espirituqa hunt'aykurqan, chaymi mana manchaspa Diospa siminta willarqanku.

³²Llapa iñiqkunan huk sonqolla huk yuyaylla karqanku. Manan pipas “ñoqaqmi” niqchu ima kaqninkunatapas, aswanqa tukuy imankupas llapallankupaqmi karqan.

³³Ancha atiywanmi apostolkunaqa*f** Señor Jesuspa kawsarimpusqanta willasharqanku, Diostaq llapallankuta sumaqta qhawarispa samincharqan.

³⁴Manan pipas ima pisichikuqpas paykuna ukhupiqa karqanchu. Llapan kaqniyoqkunan hallp'ankuta wasinkuta vendespa vendesqanku preciota apaspanku

³⁵apostolkunaman*f** entregarqanku, chaymi sapankaman pisichikuqtin qoqku.

³⁶Leví ayllumantan Chipre islapi naceq José sutiyoq runa karqan, paytan apostolkunaqa*f** Bernabé sutiwan suticharqanku, chay sutin “sonqochaq” ninanta nin.

³⁷Paymi hallp'anta venderqan hinaspan qolqeta apaspa apostolkunaman*f** entregarqan.