Read Quechua Cuzco Bible 1988 HECHOS 5 Bible Online

HECHOS 5 - Quechua Cuzco Bible 1988 bible

HECHOS 5

¹Huk runan kallarqantaq Ananías sutiyoq, warmintaq Safira. Paykunan hallp'ankuta venderqanku,

²hinaspan warminwan rimanakuspa wakin qolqeta qhepachikurqanku, wakin qolqetataq apostolkunaman*f** aparqan llapanpas kanman hinata.

³Chaymi Pedroqa nirqan: —Ananías, ¿imaraykun Satanasqa sonqoykiman hunt'aykun Santo Espirituman llullakunaykipaq? ¿Imaraykun hallp'a vendesqayki wakin qolqetapas qhepachikurqanki?

⁴Hallp'aqa manaraq vendeshaqtiyki qanpan karqan riki. Vendesqayki qolqepas munayniykipin karqan riki. ¿Imaraykun kay hinata sonqoykipi yuyaykurqanki? Manan runakunamanchu llullakunki, aswanpas Diosmanmi, nispa.

⁵Chayta uyarispan Ananiasqa kumpakuspa wañurqan. Hinan chayta llapan uyariqkunaqa sinchita mancharikurqanku.

⁶Waynakunataq Ananiaspa ayanta p'istuykuspa hawaman wanturqanku, hinaspa p'ampamurqanku.

⁷Yaqa kinsa horamanta hinataq Ananiaspa warmin Safiraqa haykurqan imachus sucedesqanta mana yachaspa.

⁸Hinan Pedroqa tapurqan: —Niway, ¿chay chhika qolqemanpunichu hallp'aykichista venderqankichis? nispa. Safirataq nirqan: —Arí, chay chhikamanpunin, nispa.

⁹Chaymi Pedroqa nirqan: —¿Imaraykun qosaykiwan yachachinakurqankichis Señor Diospa Espiritunta wateqanaykichispaq? Qhawariy, qosaykita p'ampamuq waynakunaqa punkupiñan kashanku, qantapas hawamanmi wantusunkiku, nispa.

¹⁰Chay kikin raton Safiraqa Pedroq ñawpaqenpi kumpakuspa wañurqan. Waynakunataq haykuspa wañusqataña tarispa hawaman wanturqanku, hinaspan qosanpa ladonman p'ampamurqanku.

¹¹Chaymi llapa iñiqkunapas uyariqkunapas chayta yachaspanku sinchitapuni mancharikurqanku.

¹²Llapa iñiqkunan huk sonqolla huñukuqku Dios yupaychana wasi patioq Salomón nisqa portalninpi. Aposltokunan*f** musphana askha milagrokunata runakuna ukhupi ruwarqanku.

¹³Mana iñiq runakunaqa manan mayqenpas iñiqkunawan huñukuyta munarqankuchu, hinaña llaqta runakuna allinpaq iñiqkunata qhawashaqtinpas.

¹⁴Chaywanpas askha runakunan qharipas warmipas Señor Jesuspi iñispa iñiqkunaman yapakusharqanku.

¹⁵Chay hinapin onqosqakunata calleman horqomuspa puñunakunapi wantunakunapi churarqanku, Pedro hamuqtin llanthullanpas wakinman llanthuykuspa qhaliyachinanpaq.

¹⁶Jerusalén qaylla llaqtakunamantapas askha runakunan Jerusalén llaqtaman huñukamurqanku, onqosqakunata supaypa ñak'arichisqankunatawan apamuspa, hinan llapanku qhaliyachisqa karqanku.

¹⁷Uma sacerdotepas llapan runankunapas saduceo*f** t'aqan karqanku. Paykunan sinchita envidiakuspa

¹⁸apostolkunata*f** hap'ispa llaqta carcelman apaykurqanku.

¹⁹Ichaqa Señor Diospa angelninmi cárcel punkukunata tuta kichaspa, hawaman paykunata horqomuspa nirqan:

²⁰—Riychis, hinaspa Dios yupaychana wasi patioman haykuspa kay mosoq kawsaymanta llapallanta runakunaman willamuychis, nispa.

²¹Chayta uyarispankun, tutallamanta Dios yupaychana wasi patioman haykuspa yachachirqanku. Chaykamataq uma sacerdoteqa runankunapiwan rispa Israel suyupi llapa kurak runakunata uma runakunaq huñunakuyniman waqyamurqanku. Hinaspan carcelman kacharqanku apostolkunata*f** apamunankupaq.

²²Dios yupaychana wasi guardiakunataq ichaqa carcelman chayaspa paykunata mana tarimurqankuchu, hinaspan kutimuspanku willarqanku:

²³—Carceltaqa allin wisq'asqatan tarimuyku, guardiakunatapas punkukunapi kashaqta, kicharispaykun ichaqa mana pitapas ukhupi tarimuykuchu, nispa.

²⁴Chay simikunata uyarispankun uma sacerdote, Dios yupaychana wasi guardiakunaq umallin, sacerdote umallikunapiwan iskayrayarqanku: Kayqa imaynaraqchá kanqa, nispanku.

²⁵Chayllamanmi huk runa hamuspan paykunaman willarqan: —¡Wiraqochaykuna! ¡Carcelman churamusqaykichis qharikunaqa Dios yupaychana wasi patiopiñan runakunata yachachishanku! nispa.

²⁶Hinaqtinmi Dios yupaychana wasi guardiakunaq umallinqa guardiakunapiwan rispa, apostolkunata*f** apamurqanku, ichaqa manan imanarqankupaschu runakunaq ch'aqenanta manchakuspanku.

²⁷Apostolkunata*f** apamuspataq uma runakunaq huñunakuynin chawpipi sayaykachirqanku, hinan uma sacerdoteqa paykunata nirqan:

²⁸—Ñoqaykuqa chunkay-chunkatan kamachirqaykiku ama Jesuspa sutinpi yachachinaykichispaq. Kunantaq Jerusalén llaqtaman yachachikuyniykichiswan hunt'aykachishankichis, chay runaq wañusqantapas ñoqaykuman wikch'uykuyta munankichis, nispa.

²⁹Hinan Pedroqa wakin apostolkunapiwan*f** nirqanku: —Diostan ñawpaqtaqa kasunayku, manan runakunatachu.

³⁰Qankunan Jesusta chakataspa wañuchirqankichis, paytan machulanchiskunaq Diosninqa kawsarichimpurqan.

³¹Hinaspan Diosqa hatunchaspa paña ladonman churarqan Qollana kananpaq, Qespichiq kananpaq, Israel runakunata Diosman kutirichispa huchankunata pampachananpaqwan.

³²Ñoqaykun Santo Espiritupiwan kaykunamanta testigokuna kayku. Diosmi kasukuqninkunaman Santo Espirituta qon, nispa.

³³Chay uma runakunataq chayta uyarispa k'utupakurqanku, hinaspan paykunata wañuchinankupaq rimanakurqanku.

³⁴Ichaqa huñunakuypi kashaq Gamaliel sutiyoq fariseon*f** sayarispa kamachirqan ratochalla apostolkunata*f** hawaman horqonankupaq. Payqa Diospa kamachikuy siminta yachachiq runan karqan, tukuy runakunaqpas respetasqanmi karqan.

³⁵Chay Gamalielmi paykunata nirqan: —Israel qharikuna, qankunaqa cuidakuychis kay runakunata imapas ruwanaykichistaqa.

³⁶Yuyariychis, qayna watakunapin Teudas hatarispa uma churakurqan. Paytan tawa pachak hina runakuna qatikurqanku. Teudasta wañuchiqtinkutaq llapan qatikuqkunaqa ch'eqechisqa kaspa ch'usaqyapurqanku.

³⁷Chay qhepatan Galilea runa Judasñataq runa yupay p'unchaykunapi hatarirqan, hinaspan askha runakunata huñurqan. Paytapas wañuchirqankun, hinan llapa qatikuqninkuna ch'eqechisqa karqanku.

³⁸Chaymi niykichis: Kay runakunataqa saqellaychis, hinalla kachunku. Kay yuyaykusqankupas kay ruwasqankupas runakunallamanta kan chayqa, ch'inyapullanqan,

³⁹Diosmanta kaqtinmi ichaqa mana ch'inyachiyta atiwaqchischu. Paqtataq Dioswan churanakushawaqchis, nispa.

⁴⁰Hinan paypa nisqanta hap'ikurqanku. Apostolkunata*f** waqyamuspataq suq'aykurqanku, hinaspan Jesuspa sutinpiqa amaña rimanankupaq kamachispa kacharipurqanku.

⁴¹Apostolkunataq*f** chay huñunakuymanta ripurqanku, Jesuspa sutinrayku p'enqayta muchunankupaq Diospa akllasqan kasqankumanta kusikuspanku.

⁴²Hinaspan Dios yupaychana wasi patiopipas iñiqkunaq wasinkunapipas sapa p'unchay yachachishallaqkupuni Jesusqa Diospa Akllasqan Mesías kasqanmanta allin willakuykunata willashallaqkupuni.