Read Quechua Cuzco Bible 1988 HECHOS 6 Bible Online

HECHOS 6 - Quechua Cuzco Bible 1988 bible

HECHOS 6

¹Chay p'unchaykunapin Jesuspi iñiqkunaqa askhayarqanku. Griego rimaq Judío runakunan Hebreo rimaq Judío runakuna contra chhuchupakurqanku viudankuman sapa p'unchay yanapay rakiypi mana allintachu qosqankumanta.

²Hinaqtinmi chunka iskayniyoq apostolkunaqa*f** lliw iñiqkunata huñuykuspa nirqanku: —Ñoqaykupaqqa manan chaninchu Diospa simin yachachiyta saqespa yanapay rakiypi llank'anaykuqa.

³Wawqe-panaykuna, qankuna ukhumanta qanchis qharikunata akllaychis, Santo Espirituwan hunt'ata, yachayniyoqta, allin kawsaqta, hinaspa paykunata kay ruwaypi churananchispaq.

⁴Ahinapin ñoqaykuqa Diosmanta mañakuspallaña simintapas willaspallaña kasaqku, nispa.

⁵Llapankutaq chay nisqata allinpaq hap'irqanku, hinaspan Estebanta akllarqanku. Paymi allin iñiyniyoq Santo Espirituwan hunt'a karqan. Akllallarqankutaq Felipeta, Procorota, Nicanorta, Timonta, Parmenasta, Antioquía llaqtamanta Judío t'aqaman t'ikrakuq Nicolastawan.

⁶Paykunatan apostolkunaq*f** qayllanman sayaykachirqanku, apostolkunataq*f** Diosmanta mañakuspa patankuman makinkuta churaykurqanku.

⁷Ahinapin Diospa siminmanta willakuyqa hinantinman chayaq, Jesuspi iñiqkunapas Jerusalén llaqtapi aswan-aswanta askhayarqan. Sacerdotekunapas askhan Jesuspi iñirqanku.

⁸Estebantaqa Diosmi sumaqta qhawarirqan atiyninwanpas hunt'aykurqan, chaymi payqa musphana milagrokunata runakuna ukhupi ruwarqan.

⁹Jerusalén llaqtapin karqan Kacharisqakunaq nisqa Diosmanta yachachina wasin, chaypin huñukuqku Cirene llaqtamanta, Alejandría llaqtamanta, Cilicia provinciamanta, Asia provinciamantawan Judío runakuna. Paykunan Esteban contra hatarispa churanakurqanku.

¹⁰Ichaqa manan atipayta atirqankuchu Santo Espirituq qosqan yachaywan Estebanpa rimasqanta.

¹¹Chaymi hukkunaman pagarqanku: Moisespa contranpi, Diospa contrapiwan mana allin simikuna rimaqtan uyariyku, nispa llullakunankupaq.

¹²Chay hinatan runakunata, kurak runakunata, kamachikuy simita yachachiqkunatawan tanqarqanku. Estebanman phawaykuspataq hap'irqospa uma runakunaq huñunakuyninman aysarqanku.

¹³Chaypin llulla testigokunaqa nirqanku: —Kay runan Dios yupaychana ch'uya wasi contrata, kamachikuy simi contratawan millaykunata rimashallanpuni.

¹⁴Uyariykun: Chay Nazaret llaqtayoq Jesusmi Dios yupaychana kay wasita thuninqa, Moisespa qowasqanchis yachasqa ruwaykunatapas hukman t'ikranqa, niqta, nispa.

¹⁵Hinaqtinmi uma runakunaq huñunakuyninpi llapa tiyashaqkunaqa Estebanta allinta qhawaspa uyanta angelpa uyanta hina rikurqanku.