Read Quechua Cuzco Bible 1988 HECHOS 8 Bible Online

HECHOS 8 - Quechua Cuzco Bible 1988 bible

HECHOS 8

¹Sauloqa Esteban wañuchisqankutan allinpaq hap'irqan. Chay p'unchaymantapachan Jerusalén llaqtapi kaq iñiqkunata sinchita qatiykacharqanku. Chaymi llapanku Judea provinciantinman Samaria provinciantinman ch'eqechisqa karqanku, apostolkunallan*f** kaqpi qhepakurqanku.

²Estebantataq Dios sonqo qharikuna wantuspa p'ampapurqanku, hinaspan paymanta mayta waqarqanku.

³Saulotaq iñiqkunata ch'inyachisharqanña, wasi-wasita haykuspa, qharikunatapas warmikunatapas aysaspataq carcelman churachirqan.

⁴Jerusalén llaqtamanta ch'eqechisqa iñiqkunan ichaqa hinantinta purirqanku Jesucristomanta allin willakuykunata willaspa.

⁵Felipetaq Samariapi huk llaqtaman uraykuspa paykunaman Cristomanta willarqan.

⁶Hinan runakunaqa Felipeta uyarispanku musphana milagrokuna ruwasqanta rikuspanku makilla tukuy sonqo uyarirqanku.

⁷Supaypa ñak'arichisqan askha runakunamantaqa supaykunan sinchita qaparispa lloqsirqanku. Askha such'ukunapas wist'ukunapas qhaliyachisqan karqanku.

⁸Hinan chay llaqtapi anchata q'ochukurqanku.

⁹Chay llaqtapin huk qhari Simón sutiyoq karqan. Paymi ñawpamantaña layqa karqan. Layqakusqanwanmi Samaria llaqta runakunata musphachirqan: —Ñoqaqa atiyniyoq runan kani, nispa.

¹⁰Paytan llapa runa huch'uypas hatunpas maki uyariqku: —Kaymá Diospa hatun atiyninqa, nispanku.

¹¹Makillan payta uyarishaqku, unaytaña layqakuyninkunawan paykunata musphachisqanrayku.

¹²Ichaqa Diospa kamachikushasqanmanta allin willakuykunata Jesucristoq sutinmantawan Felipe willaqtinmi, paykunaqa iñispanku qharikunapas warmikunapas bautizachikurqanku.

¹³Kikin Simonpas iñillarqantaqmi, bautizachikuspataq Felipewanpuni kasharqan. Ancha musphana milagrokunatawan ruwasqanta rikuspantaq Simonqa muspharqan.

¹⁴Jerusalén llaqtapi kaq apostolkunan*f** Samaria runakunaq Diospa siminta chaskisqanta uyarispanku, paykunaman Pedrota Juantawan kacharqanku.

¹⁵Paykunan Samariaman chayaspa, iñiqkunapaq Diosmanta mañapurqanku Santo Espirituta chaskinankupaq.

¹⁶Manaraqmi mayqenninkumanpas Santo Espirituqa uraykamusqachu, Señor Jesuspa sutillanpiraqmi bautizasqa kasqaku.

¹⁷Chaymi Pedrowan Juanwan makinkuta paykuna pataman churaqtinku, Santo Espirituta chaskirqanku.

¹⁸Simontaq apostolkunaq*f** makinku churasqanwan Santo Espirituta chaskiqta rikuspa, paykunaman qolqeta haywarqan:

¹⁹—Ñoqamanpas kay atiyta qoykuwaychis, pimanpas makiyta churaqtiy Santo Espirituta chaskinanpaq, nispa.

²⁰Hinaqtinmi Pedroqa payta nirqan: —¡Qolqeykiqa supay wasimanmi q'epiykusunki, Diospa qokuyninta qolqewan rantiyta yuyasqaykirayku!

²¹Kay atiyqa manan qanpaqchu, manan tupasunkipaschu, Diospa qayllanpi sonqoyki mana chanin kasqanrayku.

²²Kay mana allin yuyaykusqaykimanta Diosman kutirikuy, hinaspa Diosta rogakuy, ichapas sonqoykipi mana chanin yuyaykusqayki pampachasqa kanman.

²³Reparaykin envidiosollaña, huchaq watasqantaq kasqaykita, nispa.

²⁴Chaymi Simonqa nirqan: —Qankuna Señormanta mañaykapuwaychis, nisqaykichiskuna ama imapas chayamuwananpaq, nispa.

²⁵Pedrowan Juanwanmi Jesucristomanta willakuspankuña, Diospa simintapas yachachispankuña, Jerusalén llaqtaman kutipurqanku. Samaria runakunaq askha huch'uy llaqtankunapin Jesucristomanta allin willakuykunata willaspa purirqanku.

²⁶Señor Diospa angelninmi Felipeta nirqan: —Sayarispayki uray ladoman riy, Jerusalén llaqtamanta Gaza llaqtaman uraykuna ch'inneq ñanninta, nispa.

²⁷Chaymi Felipeqa rirqan. Rishaspataq Etiopía suyupi kamachikuq qhariwan tuparqan. Paymi karqan Etiopía suyu reina Candaceq tesoreron umalli runa.

²⁸Paymi Jerusalén llaqtaman yupaychaq risqanmanta carretanpi tiyaykuspa kutipusharqan profeta*f** Isaiaspa qelqasqanta leekuspan.

²⁹Santo Espiritun Felipeta nirqan: —Chay carretaman qayllaykuy, nispa.

³⁰Hinan Felipeqa qayllaykuspa profeta*f** Isaiaspa qelqan leesqanta uyarirqan, chaymi nirqan: —¿Entiendenkichu leesqaykita? nispa.

³¹Paytaq nirqan: —¿Imaynatan entiendeyman mana pipas yachachiwashaqtin? nispa. Hinaspan Felipeta valekurqan carretaman wichaspa paywan kuska tiyaykunanpaq.

³²Diospa Simin Qelqa leesqan cheqasmi kay hinata nirqan: Wañuchinapaqmi oveja hina apasqa karqan, millman rutuqninpa qayllanpi upallakuq borrego hinan paypas mana rimarirqanchu.

³³K'umuykachisqan karqan, manan chaninchayta ruwapurqankuchu, paytaqa kay pachapi wañuchirqankun, manan pipas mirayninmantaqa willakunmanchu, nispa.

³⁴Chaymi kamachikuq runaqa Felipeta nirqan: —Ama hinachu kay, willaykuway, ¿pimantan profetaqa*f** kayta nin? ¿Pay kikinmantachu? Icha, ¿hukmantachu? nispa.

³⁵Hinaqtinmi Felipeqa chay qelqamantapacha qallarispa Jesusmanta allin willakuykunata payman willarqan.

³⁶Ñanta rishaspataq unuq kasqanman chayarqanku, hinan kamachikuq runaqa nirqan: —Kaypin unu kashan, ¿manachu bautizasqa kayta atiyman? nispa. [

³⁷Chaymi Felipeqa nirqan: —Tukuy sonqochus Jesuspi iñinki chayqa atinkin, nispa. Hinan nirqan: —Arí, iñinin Jesucristoqa Diospa Churin kasqanta, nispa.]

³⁸Kamachikuqtaq carretanta sayachinanpaq kamachirqan, hinaspa iskayninku unuman uraykurqanku, chaypin Felipeqa payta bautizarqan.

³⁹Unumanta lloqsimuqtinku hinataq, Señor Diospa Espiritunqa Felipeta aparikurqan, chaymi kamachikuq runaqa manaña payta rikurqanchu, chaywanpas ancha kusisqan ripurqan.

⁴⁰Felipetaq ichaqa Azoto llaqtapi rikhurirqan, hinaspan llapan llaqtakunapi Jesucristomanta allin willakuykunata willaspa purirqan Cesarea llaqtaman chayanankama.