Read Quechua Cuzco Bible 1988 ROMANOS 1 Bible Online

ROMANOS 1 - Quechua Cuzco Bible 1988 bible

ROMANOS 1

¹Ñoqa Pablon Jesucristoq kamachin kani. Diosmi apostolnin*f** kanaypaq akllakuwaspa paymanta allin willakuykunata willanaypaq t'aqawarqan.

²Chay allin willakuykunatan Diosqa ñawpaqmantaña profetankunawan*f** Simin Qelqakunapi prometerqan.

³Chay willakuykunaqa Diospa Churin Jesucristomantan karqan, paymi runa kayninman hinaqa rey Davidpa miraynin karqan.

⁴Diosmi Santo Espirituq atiyninwan wañusqanmanta payta kawsarichimpurqan, hinaspan Diospa atiyniyoq Churin kasqanta sut'incharqan. Paymi Señorninchis Jesucristoqa.

⁵Dios khuyakuwaqtinmi Jesucristo akllakuwarqan apostolnin*f** kanaypaq, chay hinapi llapa suyukunapi runakuna Jesucristopi iñispa kasukunankupaq, paypa sutinta yupaychanapaq.

⁶Qankunatapas Diosmi akllakurqasunkichis Jesucristoq kanaykichispaq.

⁷Chaymi Roma llaqtapi kaqkunaman qelqamuykichis. Diosmi qankunatapas munakuspa llaqtan kanaykichispaq akllakurqasunkichis: Dios Yayanchismi Señorninchis Jesucristopiwan sumaqta qhawarisunkichis thak-kaynintapas qosunkichis.

⁸Ñawpaqtaqa, llapallaykichismantan Jesucristoq sutinpi Diosniymanraq graciasta qoni Jesucristopi iñisqaykichis kay pachantinpi willasqa kasqanmanta.

⁹Diostan tukuy sonqo servini, Churinmanta allin willakuykunata willaspa. Diosmi yachan sapa kuti mañakuyniypi qankunata yuyarisqayta.

¹⁰Diosmantan mañakushani, ichapas pay munaqtinqa imaynallamantapas qankuna watukuq hamuyman.

¹¹Qankunawan tupaykuytaqa munashanipunin, Santo Espirituq saminchayninta qankunaman phasmiykunaypaq, ahinapi iñiypi qaqatapuni sayanaykichispaq.

¹²Chay hinaqa, iñiyniykichismi kallpachawanqa, ñoqaq iñiyniytaq qankunatapas kallpachasunkichis.

¹³Wawqe-panaykuna, yachanaykichistan munani, askha kutiñan qankuna watukuq hamuyta munarqani, wak suyukunapi hina qankuna ukhupipas runakunata Jesucristopi iñichinaypaq, ichaqa manan kunankama atimushanichu.

¹⁴Ñoqaqa llapallanmanmi willanay educadokunamanpas mana educadokunamanpas, yachayniyoqkunamanpas mana yachayniyoqkunamanpas.

¹⁵Chaymi ñoqaqa maytapuni munashani Jesucristomanta allin willakuykunata qankuna Roma llaqtapi tiyaqkunaman willayta.

¹⁶Jesucristomanta allin willakuykunamantaqa manan p'enqakunichu. Chay willakuykunaqa Diospa atiyninmi, chaywanmi llapa iñiqkunata qespichin, ñawpaqtaqa Judío runakunata, chaymantataq mana Judío runakunatapas.

¹⁷Chay willakuykunan reqsichin imaynatachus Diosqa runata chaninpaq qhawarisqanta. Chay chaninpaq qhawarisqa kayqa iñiyllawanpunin. Diospa Simin Qelqan nin: Chanin runaqa iñiyllawanmi kawsanqa, nispa.

¹⁸Diosqa hanaq pachamantan phiñakuyninta rikuchin payta mana manchakuq llapa runakunaman, mana chanin kawsaq runakunamanwan. Paykunan mana chanin kawsayninkuwan Diospa cheqaq-kaynin reqsinata hark'ashanku.

¹⁹Imachus Diosmanta yachakuqtaqa paykunaqa yachankun, Diospuni paykunaman sut'inchasqanrayku.

²⁰Kay pacha qallariymantapachan runakunaqa sut'ita yachan Diosqa wiñay atiyniyoq kasqanta, payqa Diospuni kasqantapas. Chaykunataqa manan runakunaqa rikunchu, aswanpas Diospa ruwasqankunapin reparanku. Chay hinaqa, manan pipas: Manan yacharqanichu, ninmanchu.

²¹Diosta reqsishaspankupas, manan Diosta hinachu yupaycharqanku, manallataq graciastapas qorqankuchu, aswanmi yanqa yuyayniyoq kapurqanku, mana entiendeq kaspankun laqhapi hina kapurqanku.

²²Yachayniyoqmanmi tukurqanku, ichaqa mana yuyayniyoqmi karqanku.

²³Chaymi wiñay kawsaq Diosta hatunchanankutaqa wañuq runaq rikch'aynin ruwasqa idolokunata yupaycharqanku, hinallataq phalaq animalkunaq, uywakunaq, mach'aqwaykunaq rikch'ayninkunatapas yupaycharqanku.

²⁴Chayraykun Diosqa sonqonkuq munasqan sinchi mana chanin ruwayman saqerparirqan. Chaymi paykuna pura sinchi p'enqata ruwaspa qhellichanakurqanku.

²⁵Manan Diospa cheqaq yachachikuyninkunapi iñirqankuchu, aswanmi llulla yachachikuykunapi iñirqanku, hinaspan kamasqakunata yupaycharqanku servirqanku, manataq Kamaq Diostachu yupaycharqankupas servirqankupas. ¡Paytaqa wiñay-wiñaypaqmi hatunchananchis! Ahinapuni kachun.

²⁶Chaymi Diosqa paykunata saqerparirqan sinchi millay p'enqay ruwaykunaman. Chay hinapin warmikunapas qharita manaña munarqankuchu, aswanpas warmi puran t'inkinakurqanku,

²⁷hinallataq qharikunapas warmita manaña munarqankuchu, aswanpas munapakuyninkupi rawrarispan qhari pura p'enqayta t'inkinakurqanku, hinaspan kikin cuerponkupi mana chanin p'enqa ruwasqankumanta ñak'ariyta chaskirqanku.

²⁸Diosta reqsiyta mana munaqtinkun, Diosqa paykunatapas waqllisqa yuyayninkuman saqerparirqan mana ruwanakunata ruwanankupaq.

²⁹Paykunaqa tukuy mana chanin ruwaqkunan kanku: millaykuna, hillukuna, mana allinkuna, envidiakuqkuna, runa wañuchiqkuna, churanakuqkuna, q'otuqkuna, saltaq sonqokuna, simi apakuna.

³⁰Hinallataq runamasin contra rimaqkuna kanku, Diosta cheqnikuqkuna, usqhaylla phiñakuqkuna, pay-payman tukuqkuna, hatunchakuqkuna, mana allinkaqta paqarichiqkuna, tayta-mamankuta mana kasuqkuna,

³¹mana yuyayniyoqkuna, rimanakusqankuta mana hunt'aqkuna, mana munakuyniyoqkuna, mana khuyapayaqkuna ima.

³²Paykunaqa yachankun Diospa chanin kamachikuynin chay hina ruwaqkunataqa wañuchinapaq huchachananta, chaypas paykunaqa manan ruwallankuchu, aswanraqmi chhayna millay ruwaqkunataqa “allinmi” ninku.