Read Quechua Cuzco Bible 1988 ROMANOS 10 Bible Online

ROMANOS 10 - Quechua Cuzco Bible 1988 bible

ROMANOS 10

¹Wawqe-panaykuna, tukuy sonqoywan munaspan Diosmanta mañakushani Israel runakuna qespichisqa kanankupaq.

²Paykunaq favornintan rimani, Israel runakunaqa tukuy sonqon Dios serviyta munashanku, ichaqa manan imayna servinata hinachu.

³Imaynatachus Diospa runata chaninchasqanta mana yachaspan, paykunaqa kikinkuq munayllankuwan chaninchakuyta munarqanku. Chaymi Diospa imaynatachus chaninchasqanta mana chaskirqankuchu.

⁴Kamachikuy simitaqa Criston tukupun llapa paypi iñiqkuna chaninchasqa kanankupaq.

⁵Kamachikuy simita hunt'aspa chaninchasqa kanamantaqa Moisespas qelqarqanñan: Pipas kamachikuy simita hunt'aqqa kawsanqan, nispa.

⁶Iñiywan chaninchasqa kanamantan ichaqa kay hinata nin: Ama sonqoykipi niychu: ¿Pitaq hanaq pachamanri wichanqa? nispa. (Chayqa Cristota uraykachimunapaqmi).

⁷Chayri, ¿pitaq Ukhu-pachamanri uraykunqa? nispa. (Chayqa Cristota wañusqanmanta kawsarichimunapaqmi).

⁸Chay hinaqa, ¿imanintaq? Kay hinatan nin: Diospa siminqa qayllaykipin kashan, simillaykipiña sonqollaykipiña, nispa. Kaymi iñiymanta willasqayku simiqa:

⁹Simiykiwanchus “Jesusqa Señormi” ninki chayqa, sonqoykipipas wañusqanmanta Diospa kawsarichimpusqanta iñinki chayqa, qespichisqan kanki.

¹⁰Sonqoykiwan iñiqtiykin Diosqa chaninpaq qhawarisunki, simiykiwan “Jesusqa Señormi” niqtiykin Diosqa qespichisunki.

¹¹Diospa Simin Qelqan nin: Pipas paypi iñiqqa manan p'enqachisqachu kanqa, nispa.

¹²Judío runakunapas mana Judío runakunapas kaqkamallan kanku, kikin Señormi llapaq Señornin, payqa llapan mañakuqninkunatapas anchatan saminchan.

¹³Diospa Simin Qelqan nillantaq: Pipas Señorpa yanapayninta mañakuqqa qespichisqan kanqa, nispa.

¹⁴Ichaqa, ¿imaynatan mañakunkuman paypi mana iñispankuqa? ¿Imaynatan paypi iñinkuman paymanta willakuyta mana uyarishaspaqa? ¿Imaynatan uyarinkuman pipas paykunaman mana willashaqtinqa?

¹⁵¿Imaynatan willaq rinkuman pipas paykunata mana kachashaqtinqa? Diospa Simin Qelqapin nin: ¡Ima sumaqmi allin willakuykunata willaqkunaq chayamuyninqa! nispa.

¹⁶Ichaqa manan llapachu Diosmanta allin willakuykunataqa kasukunku, chaymi profeta*f** Isaiaspas nirqan: Señor Diosníy, ¿pitaq willakusqaykutari chaskirqan? nispa.

¹⁷Chay hinaqa, Cristomanta willakuywanmi allin willakuykunaqa chayamun, allin willakuykunata uyarispan runaqa iñin.

¹⁸Ichaqa tapukunin: ¿Manachu willakuytaqa uyarirqanku? nispa. Arí, uyarirqankupunin, Diospa Simin Qelqapin nin: Lliw kay pachantinpin willaqkunaq kunkanqa uyarikurqan, teqsimuyuntinmanmi paykunaq siminpas chayarqan, nispa.

¹⁹Tapukullanitaqmi: ¿Manachu Israel llaqtaqa chayta yacharqan? nispa. Moisesmi ñawpaqtaraq nirqan: Diosmi nin: Pisipaq qhawasqa runakunawanmi envidiachisqaykichis, mana yuyayniyoq llaqtawanmi phiñapayachisqaykichis, nispan, nispa.

²⁰Isaiaspas mana mancharispan nirqan: Diosmi nin: Mana maskhawaqniykunan tariwarqanku, ñoqamanta mana tapukuqkunamanmi rikuchikurqani, nispan, nispa.

²¹Israel llaqtamantan Isaiasqa nillarqantaq: Diosmi nin: Ch'isiyaq p'unchaymi sumaqta waqyarqani mana kasukuq k'ullu runakunata, nispa.