Read Quechua Cuzco Bible 1988 ROMANOS 11 Bible Online

ROMANOS 11 - Quechua Cuzco Bible 1988 bible

ROMANOS 11

¹Chay hinaqa, tapukunin: ¿Diosqa Israel llaqtanta wikch'urqanchu? ¡Manapunin! Ñoqapas Israel runan kani, Abrahampa miraynin, Benjamín ayllumanta.

²Diosqa ñawpaqmantaña reqsisqan llaqtantaqa manan wikch'urqanchu. Icha, ¿manachu yachankichis imatachus Eliasmanta Diospa Simin Qelqapi willakusqanta? Eliasmi Israel llaqta contra Diosmanta mañakuspa nirqan:

³Señor Diosníy, profetaykikunatan*f** wañuchinku, altarniykikunatan thuninku, ñoqa sapallayñan qhepani, ñoqatapas wañuchiytan munashawanku, nispa.

⁴Hinan Diosqa payman kutichimurqan: Qanchis waranqa runakunatan ñoqapaq qhepachikuni, paykunaqa Baal nisqa diosman manan qonqorikurqankuchu, nispa.

⁵Chay hinallataqmi kunanpas Israel runakunamanta pisi qhepaqkunalla kashanku, khuyapayakuyninwan Diospa akllakusqankunalla.

⁶Diosqa khuyapayaspanmi paykunata akllarqan, manan paykuna imatapas ruwaqtinkuchu, mana chayqa, Diospa khuyapayakuyninqa manachá khuyapayakuyñachu kanman.

⁷Chay hinaqa, Israel llaqtan imatachus maskhasqanta mana tarirqanchu, Diospa akllakusqankunan ichaqa tarirqanku. Wakinpa sonqontaq rumiyachisqa karqan.

⁸Diospa Simin Qelqan nin: Diosmi paykunata tunuyachirqan mana imatapas reparanankupaq, chay hinan kunan p'unchaykama kashanku. Paykunatan ñawsayachirqan mana rikunankupaq, roqt'uyachirqan mana uyarinankupaq, nispa.

⁹Davidpas nillantaqmi: Hatun mikhuyninkupas toqllaman tukuchun, misk'anaman tukuchun, urmaspanku muchuchisqa kanankupaq.

¹⁰Ñawinkupas tutayachun amaña rikunankupaq, wasankupas qhopuyachun wiñaypaq, nispa.

¹¹Ñoqa tapukuni: ¿Israel runakunaqa misk'aspanku pasaqtachu urmapurqanku? nispa. ¡Manapunin imaynamantapas! Aswanpas paykunaq urmasqankuraykun mana Judío runakunata Diosqa qespichin, chay hinapi Israel runakuna paykunata envidiakunankupaq.

¹²Chay hinaqa, paykunaq urmasqankuchus kay pachaq ancha allinninpaq karqan, pisi kallpayasqankupas mana Judío runakunaq ancha allinninpaq karqan chayqa, ¡may hina allinraqmi kanqa llapanku Judío runakuna wakmanta Diosman kutirikuqtinkuqa!

¹³Chaytaqa niykichis qankuna mana Judío runakunamanmi. Qankunaq apostolniykichis*f** kasqayraykun llank'anaytaqa ancha chaniyoqpaq qhawani.

¹⁴Ahinapi ichapas llaqtamasiy Judío runakunata envidiachispa wakinta qespichiyman.

¹⁵Israel runakunaq wikch'usqa kasqanraykutaq wak runakunata Dios sumaqta chaskirqan chayqa, ¿imaynaraqtaq kanman paykuna Diospa chaskisqan kaqtinkuqa? ¡Wañuymanta kawsarimpuq hinaraqmi kanman!

¹⁶Ñawpaqkaq chapusqa wakin masachus Diospaq t'aqasqa kan chayqa, llapan masan Diospaq kapun. Hinallataq sach'aq saphinchus Diospaq t'aqasqa chayqa, llapan k'allmankunapas Diospaqmi kapun.

¹⁷Wakin Judío runakunaqa olivo sach'aq k'allman wit'usqa hinan karqanku, qantaq k'ita olivo k'allma hina kashaspa chay wit'usqaman t'inkisqa karqanki. Ahinapin, chay olivo sach'aq saphinwan alimentasqa karqanki.

¹⁸Ichaqa ama yuyaychu kikin k'allmakunamanta aswan allin kasqaykitaqa. Hatunchakunkichus chayqa, allinta yachay, manan qanchu saphitaqa alimentashanki, aswanpas saphin qantaqa kawsachishasunki.

¹⁹Qanqa ninkipaschá: Chay olivo sach'a k'allmakunaqa, chayman ñoqa t'inkisqa kanaypaqmi wit'usqa karqan, nispa.

²⁰Arí, mana iñisqankuraykun wit'usqa karqanku, qanmi ichaqa iñisqaykirayku chaypi qaqata sayashanki. Chay hinaqa, ama hatunchakuychu, aswanpas Diosta manchakuy.

²¹Kikin k'allmakunatapas Diosqa manan hinallatachu wiñachirqan, chaychu qanta hinallata wiñachisunkiman.

²²Qhawariy Diospa imayna sumaq sonqochus kasqanta chaninninpipuni huchachaq kasqantapas. Urmaqkunatan chaninninpi huchachan, qantataq ichaqa sumaq sonqowan qhawarisunki, sumaq sonqo-kayninpi sayanki chayqa. Mana hinaqa qanpas wit'usqallataqmi kanki.

²³Israel runakunachus wakmanta iñinqaku chayqa, paykunan wakmanta sach'aman t'inkichisqa kanqaku. Diosqa atiyniyoqmi iman kaqta paykunata t'inkichinanpaq.

²⁴Qanpas k'ita olivo sach'amanta wit'uqasqa kaspa mana kanayki cheqaq olivo sach'aman t'inkichisqa karqanki chayqa, astawanraqmi kikin k'allmakunaqa cheqaq olivo sach'ankuman t'inkichisqa kanqaku.

²⁵Wawqe-panaykuna, kay pakasqa yachayta yachanaykichistan munani qankuna kikiykichis ama yachaysapa kasqaykichista yuyanaykichispaq. Israel runakunaq mana kasukuq k'ullu kasqankuqa manan wiñaypaqchu, aswanpas mana Judío runakunaq hayk'achus qespichisqa kanankukamallan.

²⁶Chay hina kaqtinmi llapallan Israel runakunaqa qespichisqa kanqa. Diospa Simin Qelqan nin: Sión llaqtamantan Qespichiqqa hamunqa, Jacobmantan Diosta mana manchakuq-kayta qechunqa.

²⁷Paykunawanmi rimanakusaq: Huchaykichistan pampachasaq, nispay, nispa.

²⁸Jesucristomanta allin willakuykunaman hinaqa Diospa awqanmi Israel runakunaqa kanku qankunaq allinniykichispaq. Chaywanpas Diosqa paykunata munakunraqmi, machulankumantaraq akllakusqanrayku.

²⁹Diosqa runakunata akllakuspapas qokuykunata qospapas yuyaykusqanta mana cambiaqmi.

³⁰Qankuna mana Judío runakunan ñawpa tiempopiqa Diosta mana kasukurqankichischu, kunanmi ichaqa Israel runakuna mana kasukusqanku hawa qankunata Dios khuyapayasunkichis.

³¹Chay hinallataqmi, paykunaña kunan mana kasukuq kanku chaypas, Diosqa paykunata khuyapayallanqapuni, qankunata khuyapayasqasuykichisrayku.

³²Diosqa llapa runakunatan mana kasukuqpaq hap'irqan, llapallankuta khuyapayananpaq.

³³¡May hatunpunin Diospa qhapaq-kayninpas, yachayninpas, yuyayninpas! Yuyaykusqankunapas mana sut'inchay atinapunin, ruwasqankunapas mana entiendey atinapunin.

³⁴¿Pitaq Señor Diospa yuyaynintaqa reqsin? ¿Pitaq paytaqa yuyaychan?

³⁵¿Pitaq Señor Diosman ñawpaqta imatapas qorqan payman kutichipunapaq?

³⁶Tukuy imapas Diospa kamasqanmi, paymi hap'ishan, paypaqtaqmi kanpas. ¡Diosninchis wiñay-wiñaypaq hatunchasqa kachun! Ahinapuni kachun.