Read Quechua Cuzco Bible 1988 ROMANOS 12 Bible Online

ROMANOS 12 - Quechua Cuzco Bible 1988 bible

ROMANOS 12

¹Chay hinaqa, wawqe-panaykuna, Diospa khuyapayawasqanchisrayku valekuykichis: kawsashaq ofrendata hina cuerpoykichista Diosman haywaychis Diospa sonqonman chayaq kananpaq, paypaq t'aqasqa kananpaqwan. Chaymi cheqaq sonqowan Diosta yupaychayniykichisqa.

²Amaña runakunaq imaynatachus kawsashasqanta hinaqa kawsaychischu, aswanpas mosoqyachisqa yuyayniykichisman tupaqtapuni kawsaychis. Ahinapin mayqenchus Diospa munaynin kasqanta reparankichis, paypa munayninqa allinmi, sumaqmi, hunt'asqapunin.

³Khuyapayakuyninpi Diospa qowasqan qokuyman hinan llapaykichista niykichis, ama pipas aswan allinpuni kasqanta yuyakuchunchu, aswanpas pay kikin imaynachus kasqallanta yuyakuchun, sapankaman Diospa qosqasuykichis iñiyniykichisman hina.

⁴Imaynan runaq cuerponpiqa imaymanankuna kan, ichaqa manan llapanchu huk ruwayniyoqkamalla,

⁵ahinallataqmi ñoqanchispas askhaña kaspapas huk cuerpolla Cristowan hukllachasqa kanchis, hinallataq hukkuna hukkunawanpas hukllachasqa kashanchis.

⁶Diosqa imaymana qokuykunatan qowanchis, imatachus sapankaman qoyta munawasqanchisman hina. Chay hinaqa, profetizay qokuyta chaskiqqa iñiyninpa kasqanman hina profetizachun,

⁷hukkunata serviqpas allinta servichun, yachachiqpas allinta yachachichun,

⁸kallpachaqpas kallpachachun, qoqpas tukuy sonqowan qochun, kamachiqpas allin yuyaywan kamachichun, pisichikuqkunata yanapaqpas kusisqa yanapachun.

⁹Hukkuna hukkunawan tukuy sonqo munanakuychis. Mana allinkaqta cheqnikuychis, allinkaqmantaq k'askakuychis.

¹⁰Wawqe-panantin hinapuni munanakuychis, respetanakuspa aswan allinpaq qhawanakuychis.

¹¹K'uchi kaychis, ama qellakuychischu, rawrashaq sonqowan Señorta serviychis.

¹²Señorta suyakuypi kusisqalla kawsaychis, ñak'arispaykichisqa pacienciakuychis, Diosmantaqa mañakullaychispuni.

¹³Iñiqkunata pisichikuyninkupi yanapaykuychis, watukamuqniykichiskunatapas qorpachallaychispuni.

¹⁴Qatiykachaqniykichiskunata saminchaychis, amataq paykunata ñakaychischu.

¹⁵Kusikuqkunawan kusikuychis, waqaqkunawanpas waqaychis.

¹⁶Qankuna pura huk sonqolla kawsaychis, ama hatunchakuychischu, aswanpas pisichasqa runakunawan kuskachakuychis. Ama qankuna kikiykichis “yachaysapan kani” niychischu.

¹⁷Ama pimanpas mana allinmantaqa mana allinllawantaq kutichiychischu. Llapa runaq qayllanpi allin ruwayllatapuni munaychis.

¹⁸Atisqaykichisman hina allinllatapuni ruwaychis llapa runawan sumaqpi kawsanaykichispaq.

¹⁹Munasqa wawqe-panaykuna, ama qankuna kikiykichisqa vengakuychischu, aswanpas Diosman chaytaqa saqeychis pay muchuchinanpaq. Diospa Simin Qelqan nin: Señor Diosmi nin: Ñoqamanmi tupawan vengakunayqa, ñoqañan kutichipusaq, nispa.

²⁰Diospa Simin Qelqaqa nillantaqmi: Awqaykichus yarqachikun chayqa, mikhuchiy, ch'akichikuqtinpas ukyachiy. Chay hinata ruwaqtiykiqa, awqaykiq sonqonmi p'enqakuymanta “ch'allaq” ninqa, nispa.

²¹Mana allinkaqwanqa ama atipachikuychu, aswanpas mana allinkaqtaqa allinkaqwan atipay.