Read Quechua Cuzco Bible 1988 ROMANOS 14 Bible Online

ROMANOS 14 - Quechua Cuzco Bible 1988 bible

ROMANOS 14

¹Chaskiychis pisi iñiyniyoq runata, ichaqa ama ima iskayrayanamantapas paywan churanakuychischu.

²Wakinmi tukuy imapas mikhunalla kasqanta yuyanku, wakintaq pisi iñiyniyoq kaspa aychata mana mikhunkuchu.

³Chay hinaqa, tukuy imapas mikhuqqa ama pisichachunchu aychata mana mikhuq runataqa. Amataq mana aychata mikhuqpas tukuy imaymana mikhuqtaqa huchachachunchu, paytapas Diosqa chaskinmi.

⁴¿Pitaq qanqa kanki hukpa kamachinta huchachanaykipaqri? Patronninmi niyta atin allin kasqantapas, mana allin kasqantapas, ichaqa Señor Jesucristoqa atiyniyoqmi allinta sayachinanpaq, chaymi kamachiqa allinta sayanqa.

⁵Wakinmi huk p'unchayta allinpaq hap'in hukkaq p'unchaymantaqa, wakintaq llapan p'unchaytapas kaqkamapaq hap'in. Sapanka kikinpa yuyaykusqanta sut'ita entiendespa ruwachun.

⁶P'unchayta waqaychaqqa, Señorta hatunchananpaqmi waqaychan, [p'unchayta mana waqaychaqpas Señorta hatunchananpaqmi mana waqaychanchu.][2] Aychata mikhuqpas Señorta hatunchananpaqmi mikhun Diosman graciasta qospa, aychata mana mikhuqpas Señorta hatunchananpaqmi mana mikhunchu Diosman graciasta qospa.

⁷Manan mayqenninchispas kikillanchispaqchu kawsashanchis, manallataqmi kikillanchispaqchu wañunchispas.

⁸Kawsanchischus chayqa Señorpaqmi kawsashanchis, wañunchistaqchus chaypas Señorpaqmi wañunchis. Chay hinaqa, kawsaspapas wañuspapas Señorpan kanchis.

⁹Chaypaqmi Cristoqa wañurqan, hinaspa kawsarimpurqan, wañusqakunaqpas kawsaqkunaqpas Señornin kananpaq.

¹⁰Qanri, ¿imanaqtintaq wawqeykita huchachanki? Qanpas, ¿imanaqtintaq wawqeykita pisichanki? Llapallanchismi Diospa ñawpaqenman asuykusun juzgasqa kananchispaq.

¹¹Diospa Simin Qelqan nin: Señor Diosmi nin: Ñoqaraykun jurani, ñoqamanmi llapa qonqorikamuwanqaku, ñoqatan llapa runa yupaychawanqaku, nispan, nispa.

¹²Chay hinaqa, sapankanchismi kikinchismanta Diosman cuentata qosun.

¹³Chayrayku, amaña hukkuna hukkunawan huchachanakusunchu, aswanpas khaynata yuyaykukuychis: Ama iñiqmasita imapipas misk'achiyta, nitaq urmachiytapas.

¹⁴Ñoqaqa Señor Jesuspi iñiq kaspaymi cheqaqtapuni yachani ima mikhunapas kikillanmantaqa mana qhelli kasqanta, ichaqa pichus chay mikhunata qhellipaq yuyan chayqa, paypaqqa qhellin.

¹⁵Qanpa mikhusqayki hawa iñiqmasiyki llakichisqa kan chayqa, manan munakuyman hinañachu purishanki. Ama pitapas imatachus mikhusqaykiwan urmachiychu, paypaqwanmi Cristoqa wañurqan.

¹⁶Amayá allinpaq hap'isqaykichistaqa mana allinpaq qhawachiychischu.

¹⁷Diosqa kamachikushaspaqa manan mikhusqatachu ukyasqatachu qhawan, aswanpas Santo Espirituq yanapasqan chanin kawsananchistan, thak-kaypi kananchistan kusisqa kananchistan munan.

¹⁸Chay hinapi Cristota serviqqa Diostan kusichin, runakunaq allinpaq qhawasqantaq kanpas.

¹⁹Chay hinaqa, hukkunaq thak-kaypi kawsanankupaq llank'asun, iñiq-masinchiskunawan wiñachinakunanchispaq kallpachakusun.

²⁰Diospa ruwasqantaqa ama mikhusqayki hawa waqllichiychu. Ima mikhunapas manan qhellichu, ichaqa manan allinchu mikhusqaykiwan hukkunata huchallichiyniykiqa.

²¹Aswan allinmi aychata mana mikhuypas, vinota mana ukyaypas, ima hayk'ata mana ruwaypas iñiqmasita ama misk'achinapaq.

²²Chaykunamanta yuyasqaykitaqa Diosllaman willaspa sonqollaykipi hap'iy. Kusisamiyoqmi kanki allinpaq hap'isqaykita ruwashaqtiyki concienciayki mana huchachasunkichu chayqa.

²³Pipas iskayrayaspa mikhuqmi ichaqa huchallikun, mana iñispan mikhusqanrayku. Tukuy imapas mana iñiywan ruwayqa huchan.