Read Quechua Cuzco Bible 1988 ROMANOS 15 Bible Online

ROMANOS 15 - Quechua Cuzco Bible 1988 bible

ROMANOS 15

¹Chay hinaqa, ñoqanchis iñiypi kallpayoq kashaqkunan iñiypi pisi kallpayoqkunata sasachayninkupi yanapaykunanchis, amayá ñoqanchispa allinnillanchistachu maskhasun.

²Sapankanchismi runa-masinchispa sonqonman chayaqta ruwananchis paypa allinninpaq, ahinapi payta iñiyninpi wiñachinanchispaq.

³Cristopas manan pay kikinpa allinnintachu maskharqan, aswanpas Diospa Simin Qelqan nin: K'amiqniykikunaq k'amikuyninmi ñoqaman chayawarqan, nispa.

⁴Ñawpa tiempopi Qelqasqakunaqa yachaqananchispaqmi qelqasqa karqan, ahinapi chay Qelqakunaq takyachisqan sonqochasqan kaspa suyakuyniyoq kananchispaq.

⁵Sonqochawaqninchis, takyachiwaqninchis Diosmi yanapasunkichis, Jesucristoq yachachisqanman hina huk sonqolla qankuna pura kawsanaykichispaq,

⁶huk nisqalla, ch'ulla kunkalla Señorninchis Jesucristoq Yayan Diosta yupaychanaykichispaq.

⁷Chay hinaqa, Diosninchis yupaychasqa kananpaq sumaqtapuni chaskiykunakuychis imaynan Cristopas chaskiykuwarqanchis hinata.

⁸Niykichismi, Jesucristoqa Judío runakunata serviqmi hamurqan, machulanchiskunaman Diospa prometesqankunata hunt'ananpaq, ahinapi Diosqa hunt'aq kasqanta rikuchinanpaq.

⁹Hinallataq Cristoqa hamurqan paykunata Diospa khuyapayasqan hawa mana Judío runakunapas Diosta yupaychanankupaq. Diospa Simin Qelqan nin: Chayraykun hatun suyukuna ukhupi yupaychasqayki, sutiykita hatunchaspan takisaq, nispa.

¹⁰Diospa Simin Qelqaqa nillantaqni: Suyukuna, Señor Diospa llaqtanwan kuska q'ochukuychis, nispa.

¹¹Qelqaqa nillantaqmi: Llapa hatun suyukuna, Señor Diosta yupaychaychis, llapa llaqtakuna, payta hatunchaychis, nispa.

¹²Profeta*f** Isaiaspas nillantaqmi: Isaipa mirayninmi rikhurimunqa, suyukunata kamachinanpaqmi hamunqa, chay suyukunan payman hap'ipakuspa suyakunqaku, nispa.

¹³Suyachiwaqninchis Diosyá iñiyniykichispi hunt'aykusunkichis kusikuywan thak-kaywan ima, Santo Espirituq atiyninwan suyakuyniykichis phoqchirinanpaq.

¹⁴Wawqe-panaykuna, ñoqaqa manan iskayrayanichu qankunaq sumaq sonqo kasqaykichismanta, hunt'asqata yachasqaykichismantapas, yachankichistaqmi qankuna pura yuyaychanakuytapas.

¹⁵Ichaqa, sut'i simi-kayniywanmi chaykunata qelqamuykichis yuyarinaykichispaq. Chay hinataqa niykichis mana Judío runakuna ukhupi Jesucristota servinaypaq Diospa churawasqanraykun. Sacerdote hina servispan Diosmanta allin willakuykunata willakuni, ahinapi mana Judío runakunata Santo Espirituq t'aqasqan ofrendata hina Diospa sonqonman chayaqta qayllaykachinaypaq.

¹⁷Chaymi Jesucristowan hukllachasqa kaspay, Diosta servisqaymanta mayta kusikuni.

¹⁸Manan imatapas sapaqtaqa rimaymanchu, aswanpas kikin Cristo ñoqawan ruwarqan mana Judío runakuna Diosta kasukunanpaq chayllatan rimani. Chaykunan ruwasqa karqan rimasqaywan, ruwasqaywan,

¹⁹atiyniyoq señalkunawan, milagrokunawan, Santo Espirituq atiyninpiwan. Chay hinapin Cristomanta allin willakuykunata hinantinman hunt'aykachini, Jerusalenmanta qallarispa Ilírico hap'iykama purispa.

²⁰Chay hinatan Cristomanta manaraq uyariqkunaman allin willakuykunata willayta maytapuni munarqani, ama hukpa llank'ay qallarisqanman haykunaypaq.

²¹Chaytaqa ruwani Diospa Simin Qelqaq nisqanman hinan. Chaymi nin: Paymanta mana hayk'aq willasqa kaqkunan rikunqaku, paymanta mana hayk'aq uyariqkunan entiendenqaku, nispa.

²²Chayraykun sapa kutilla qankuna watukamuq hamuyta munarqani chaypas, mana atishanichu.

²³Kunanmi ichaqa kay ladokunapi willayta tukuniña, chaymi unay watakunamantaña qankunawan tupaykuyta munasqayrayku,

²⁴Españata riq hina qankunata watukamusqaykichis. Chay hinapin qankunawan kusikuspayña munayman hukniykichis Españaman pusawananta.

²⁵Kunanqa Jerusalén llaqtataraqmi rishani chaypi tiyaq iñiqkunaman yanapayta apaspay.

²⁶Macedonia provinciapi, Acaya provinciapi kaq wawqe-panakunan kusisqa yuyaykurqanku ofrenda huñuyta, Jerusalenpi kaq wakcha iñiq-masinchiskunaman yanapayta apachiwanankupaq.

²⁷Paykunaqa chay ruwayta allinpaqmi hap'irqanku, yanapanankupunitaqmi kanpas. Mana Judío runakunaqa iñiq Judío runakunamantan Diospa saminchayninta chaskirqanku, chaymi imatachus pisichikusqankutaqa qoykunankupuni.

²⁸Ahinaqa, chayta hunt'aspaña, yanapaytapas paykunaman apaspayña Españaman riq hina watukamusqaykichis.

²⁹Qankunaman hamuqtiyqa anchatapunin Cristo saminchasunkichis.

³⁰Ichaqa valekuykichismi, wawqe-panaykuna, Señorninchis Jesucristorayku, Santo Espirituq qowasqanchis munakuyraykupiwanmi ñoqawan kuska Diosmanta tukuy sonqo mañapuwanaykichispaq.

³¹Mañapuwaychis Judea provinciapi kaq mana iñiq runakunamanta Dios hark'aykuwananpaq, Jerusalén llaqtapi iñiqkunapaq yanapayta apasqay chaskisqa kananpaqwan.

³²Chay hinapi Diospa munayninwan kusisqallaña qankunaman chayamuspay qankunawan tupaykuspa allinta samaranaypaq.

³³Thak-kayta qoq Dios llapallaykichiswan kachun. Ahinapuni kachun.