Read Quechua Cuzco Bible 1988 ROMANOS 16 Bible Online

ROMANOS 16 - Quechua Cuzco Bible 1988 bible

ROMANOS 16

¹Cencrea llaqtapi kaq iñiq t'aqapi yanapakuq pananchis Febeta allintapuni qhawarinaykichistan valekuykichis.

²Señorpa sutinpi payta chaskiychis iñiypi wawqe-panakuna imaynatachus ruwananta hina. Imata necesitaqtinpas yanapaykuychis, payqa askhatan yanaparqan, hinallataq ñoqa kikiytapas.

³Jesucristota serviypi llank'aysiwaqniykuna Priscata qosan Aquilatawan napaykapuwaychis.

⁴Paykunaqa ñoqaraykun yaqa wañuywanpas aypachikurqanku, chaymi maytapuni “gracias” nini, ichaqa mana ñoqallachu, aswanpas mana Judío runakuna ukhupi kaq llapan iñiq t'aqakunapas “gracias” nillantaqmi.

⁵Hinallataq paykunaq wasinkupi huñukuq iñiq t'aqatapas napaykapuwaychis. Ancha munasqay Epenetotapas napaykapuwaychis, paymi Asia provinciapiqa ñawpaqta Cristopi iñirqan.

⁶Mariatapas napaykapuwaychis, paymi qankunapaq anchata llank'arqan.

⁷Llaqtamasiy Andronicotapas Juniastawan napaykapuwaychis, paykunaqa ñoqawan kuskan preso karqanku, paykunaqa ñoqamanta ñawpaq iñiqkunan karqanku, apostolkuna*f** ukhupipas allin reqsisqan kanku.

⁸Señorpi munasqa amigoy Ampliatota napaykapuwaychis.

⁹Jesucristota serviypi llank'aysiwaqninchis Urbanota, munasqay Estakistawan napaykapuwaychis.

¹⁰Cristoq chaskisqan allinpaq qhawasqa Apelesta napaykapuwaychis, hinallataq Aristobuloq familiantapas.

¹¹Llaqtamasiy Herodionta napaykapuwaychis. Narcisoq wasinpi kaq iñiqkunata napaykapuwaychis.

¹²Señorpaq llank'aq pananchis Trifenata Trifosatawan napaykapuwaychis. Munasqay panay Persidata napaykapuwaychis, payqa sinchitan Señorpaq llank'an.

¹³Señorpaq allin llank'aq Rufota napaykapuwaychis, hinallataq mamantapas, payqa ñoqaqpas mamay hinan karqan.

¹⁴Kaqllataq Asincritota, Flegonteta, Hermesta, Patrobasta, Hermasta, paykunawan kashaq wawqe-panakunatawan napaykapuwaychis.

¹⁵Hinallataq Filologota, Juliata, Nereota, panantawan, Olimpasta, paykunawan llapan kashaq iñiqkunatawan napaykapuwaychis.

¹⁶Munakuywan abrazaykunakuspa napaykunakuychis. Cristoq llapa iñiq t'aqankunan napaykamusunkichis.

¹⁷Wawqe-panaykuna anchatan yuyaychaykichis yachasqaykichis yachachikuy contra yachachiqkunamanta cuidakunaykichispaq, paykunan iñiqkunata t'aqanachin hinaspa iñiyninkupi misk'achin. Chayrayku paykunamantaqa karunchakuychis.

¹⁸Chay hina runakunaqa manan Señorninchis Jesucristotachu servinku, aswanpas paykunaqa wiksallankumantan afanakunku, hinaspa sumaq simikunawan luylupayaspa pisi yachayniyoq runakunaq sonqonta suwanku.

¹⁹Qankunaq Diosta kasukusqaykichistaqa lliwmi yachanku, chaymi anchata kusikuni. Allin kaqpaqqa yachayniyoq kanaykichistan munani, mana allin kaqpaqtaq ch'uya sonqo kanaykichista.

²⁰Thak-kayta qoq Diosmi usqhaylla Satanasta sarurparichisunkichis. Señorninchis Jesucristo sumaqta qhawarisunkichis.

²¹Llank'aq-masiy Timoteo napaykamusunkichis, hinallataq llaqta-masiy Luciopas, Jasonpas, Sosipaterpas napaykamusunkichis.

²²Pabloq qelqaqnin ñoqa Terciopas Señorpa sutinpi napaykamuykichis.

²³Ñoqata qorpachawaqniy Gayon napaykamusunkichis, paypa wasinpin iñiq t'aqaqa huñukun. Hinallataq llaqta tesorero Erastopas, wawqe Cuartopas napaykamusunkichis.

²⁴[Señorninchis Jesucristo llapaykichista sumaqta qhawarisunkichis. Ahinapuni kachun.][3]

²⁵Kunanqa, ¡yupaychasun Diosta! Paymi qankunata allinta takyachisunkichis, Diosmanta allin willakuykunaman hina, Jesucristomanta yachachikuyman hina. Chayqa tupanmi wiñay-wiñay tiempomantaña Diospa ch'inlla pakasqan yachayta sut'inchasqawan.

²⁶Chay pakasqa yachaymi kunanqa profetakunaq*f** qelqasqankunawan ancha allin sut'inchasqa kapun, hinallataq wiñay Diospa kamachisqanman hina llapa suyukunaman willasqa kapun paykunaq Diospi iñispa kasukunankupaq.

²⁷¡Pay sapallan yachaysapa Diosta wiñay-wiñayta yupaychasun Jesucristoq ruwasqan hawa! Ahinapuni kachun.