Read Quechua Cuzco Bible 1988 ROMANOS 3 Bible Online

ROMANOS 3 - Quechua Cuzco Bible 1988 bible

ROMANOS 3

¹Chhaynaqa, ¿imapaqtaq Judío runa kayqa valen? Qhari-kaynin señalasqa kasqanpas, ¿imapaqtaq valen?

²¡Imaymanapaqmi valen! Ñawpaqtaqa Judío runakunamanmi Diosqa simintaqa qorqan waqaychanankupaq.

³Wakin Judío runakuna mana hunt'aqtinri, ¿imaynataq kanqa? ¿Paykuna hawachu Diosqa mana hunt'aq kanqa?

⁴¡Manapunin imaynamantapas! Diosqa cheqaq hunt'aqpunin llapa runaña llulla kashaqtinpas. Diospa Simin Qelqan nin: Cheqaq rimaq kasqaykitan reqsisunkiku, juzgaspataqmi atipankipuni, nispa.

⁵Ñoqanchispa mana chanin-kayninchistaq Diospa chanin-kayninta aswan sut'itaraq rikuchin chayqa, ¿imanisunchistaq? ¿Mana chanin kaspachu Diosqa muchuchiwanchis? Runa hinallan kaytaqa rimani.

⁶¡Chayqa manan hinachu! Dios mana chanin kanman chayqa, ¿imaynatataq payqa runakunata juzganman?

⁷Pipas ninman: Llullakusqaywan Diospa cheqaq-kayninta rikuchispa payta hatunchaqtiyqa, ¿imanaqtintaq Diosqa huchasapata hina juzgawan? nispa.

⁸Chhayna kaqtinqa, ¿manachu nisunman: Mana allinkaqkunata ruwasun allinkaqkuna kananpaqqa, nispa? “Chay hinatan Pablo yachachishan” nispan wakinkuna llullakuspa tumpawanku. Ichaqa, chay hina yachachiqkunataqa Diosmi huchachanqa, ahinapunitaqmi kananpas.

⁹Chay hinaqa, ¿mana Judío runakunamanta aswan allinchu ñoqanchis Judío runakunaqa kanchis? ¡Manapunin hinachu! Ñan huchachanchisña Judío runakunatapas mana Judío runakunatapas llapallanku huchapi kashasqankuta.

¹⁰Diospa Simin Qelqan nin: Manan pipas mana huchayoqqa kanchu, manapunin ch'ullallapas kanchu.

¹¹Manan pipas entiendeq kanchu, manan ch'ullallapas Diosta maskhaqqa kanchu.

¹²Llapallanmi pantaykapunku, llapallanmi mana valeq kapunku. Manan pipas allinkaqta ruwaqqa kanchu, manapunin ch'ullallapas kanchu.

¹³Kicharayaq sepultura hinan kunkankuqa, qallunkuwanmi llullakuspa q'otunku, siminkumantan mach'aqwaypa venenon hina lloqsimun,

¹⁴ñakashallankupunin, k'arakllatapunin rimashanku.

¹⁵Runa wañuchiqqa usqhayllan phawarinku,

¹⁶ñanninkupiqa wañuchinakuyllan qechunakuyllan.

¹⁷Thak kawsaytaqa manan yachankuchu.

¹⁸Manan hayk'aqpas Dios manchakuytaqa yachankuchu, nispa.

¹⁹Ichaqa yachanchismi kamachikuy simiq tukuy nisqanqa kamachikuy simipi kaqkunapaq kasqanta, llapa runa upallananpaq, hinaspa tukuy runa Diospa huchachasqan kananpaq.

²⁰Kamachikuy simiq nisqankunata hunt'aqtaqa manan Diosqa pitapas chaninpaqchu qhawarinqa, aswanmi kamachikuy simiqa huchayoq kasqanchista reqsichiwanchis.

²¹Kunanmi ichaqa mana kamachikuy simillawan Diosqa chaninchayninta rikuchin, chaytan kamachikuy simipas profetakunapas*f** willakun.

²²Diosqa Jesucristopi iñisqankuraykun llapa iñiqkunata chaninpaq qhawarin. Llapa runaqa paypaqqa kaqkamallan.

²³Llapallanmi huchallikurqanku, chaymi Diospa k'anchashaq qayllanmanta karupi kashanku.

²⁴Diosmi ichaqa runakunata khuyapayaspan yanqallanmanta chaninpaq qhawarin Jesucristo wañuspa kacharichisqanrayku.

²⁵Diosmi Jesucristota churarqan runakunarayku yawarninta hich'aspa wañunanpaq. Chayraykullan payqa runakunata khuyapayaspa huchankuta pampachan. Chaytaqa wañuyninpi iñispallan runakunaqa chaskinku. Chhaynapin Diosqa chaninchayninta rikuchin. Payqa pacienciayoq kaspanmi ñawpa tiempopi huchallikusqakunata hinallata qhawarqan.

²⁶Kunanmi ichaqa mana hinallatachu qhawan, aswanmi chaninchayninta rikuchin, payqa chanin kasqanta reqsichinanpaq, Jesuspi iñiqkunata chaninchaq kasqantapas reqsichinanpaqwan.

²⁷Chhaynaqa, ¿maytaq runaq alabakuyninri? ¡Manan kapunchu! ¿Mayqen kamachikuytaq chinkachipun? Manan kamachikuy simita hunt'asqanchiswanchu, aswanpas iñisqanchiswanmi.

²⁸Chhaynaqa, rikunchismi runaqa iñiywan chaninchasqa kasqanta, manataq kamachikuy simiq nisqanta hunt'aspachu.

²⁹Diosqa, ¿Judío runakunaq Diosnillanchu? ¿Manachu mana Judío runakunaqpas Diosnillantaq? Arí, Diosqa llapa runaq Diosninmi.

³⁰Manan wak Diosqa kanchu. Pay sapallan Diosmi qhari-kaynin señalasqakunatapas mana señalasqakunatapas iñiyrayku chaninchaqqa.

³¹Chhaynaqa, ¿iñiywanchu kamachikuy simita mana valeqman tukuchipunchis? ¡Manan hinachu! Aswanmi kamachikuy simitaqa allinta sayachinchis.