Read Quechua Cuzco Bible 1988 ROMANOS 4 Bible Online

ROMANOS 4 - Quechua Cuzco Bible 1988 bible

ROMANOS 4

¹¿Imanisunchistaq machulanchis Abrahammanta? ¿Imatataq payqa tarirqan?

²Ruwasqankunawanchus Abraham chaninchasqa kanman karqan chayqa, atinmanmi alabakuyta karqan, ichaqa manan Diospa qayllanpichu.

³Diospa Simin Qelqan nin: Abrahammi Diospi iñirqan, chaymi payqa chaninchasqa karqan, nispa.

⁴Llank'aqpa pagonqa manan regalo hina qosqachu, aswanpas manumanta pagasqa hinan.

⁵Pipas llank'asqankunapi mana hap'ipakunchu, aswanpas huchasapata chaninchaq Diospi iñin chayqa, iñiynin hawan Diosqa chay runata chaninpaq qhawarin.

⁶Chay hinatan Davidpas rimarqan mana ima ruwasqanraykulla Diospa chaninchasqan runaqa kusisamiyoq kasqanta. Paymi nirqan:

⁷Kusisamiyoqmi mana chanin ruwasqankumanta pampachasqa runakunaqa, kusisamiyoqmi huchankupas qonqasqaña runakunaqa,

⁸Kusisamiyoqmi Diospa mana huchachasqan runaqa, nispa.

⁹¿Chay kusisamiyoq kayqa qhari-kaynin señalasqa kaqkunallapaqchu? Icha, ¿mana señalasqa kaqkunapaqwanchu? Abrahammi iñisqanrayku Diospa chaninchasqan karqan ninchis chayqa,

¹⁰¿hayk'aqtaq chaninchasqari karqan? ¿Qhari-kaynin señalasqa kaqtinñachu? Icha, ¿manaraq señalasqa kashaqtinchu? Manan qhari-kaynin señalasqa kaqtinñachu, aswanpas manaraq señalasqa kashaqtinmi payqa chaninchasqa karqan.

¹¹Abrahamqa manaraq señalasqa kashaspa Diospi iñisqanraykun chaninchasqa karqan, chayta sut'inchananpaqmi señalachikurqan sello hina kananpaq. Ahinapin Abrahamqa qhari-kaynin mana señalasqa kashaspa llapan iñiqkunaq taytan kapun, paykunatapas Diosmi chaninchan.

¹²Abrahamqa qhari-kaynin señalasqa runakunaq taytallantaqmi, paykunaqa manan señalasqallachu, aswanpas imaynan Abrahamqa manaraq qhari-kaynin señalasqa kashaspa iñirqan, chay hinata iñispan paykunapas kawsanku.

¹³Diosmi kay pachata herenciata hina chaskinanpaq Abrahamman mirayninmanwan prometerqan, manan kamachikuy simita hunt'aspachu chaskirqan, aswanpas iñisqanraykun Diospa chaninpaq qhawarisqan kaspa chaskirqan.

¹⁴Kamachikuy simita hunt'aqkunallachus herencia chaskiq kanman chayqa, yanqapaqchá iñiypas Diospa prometesqanpas kanman.

¹⁵Kamachikuy simiqa Diospa phiñakuynintan runakunaman chayachin, kamachikuy simiq mana kasqanpin ichaqa kamachikuy simi p'akiypas mana kanchu.

¹⁶Chhaynaqa, iñiyraykun Diospa prometesqanqa qosqa karqan yanqallanmanta kananpaq, ahinapi Abrahampa llapa mirayninpaq prometesqaqa qaqata sayananpaq. Diospa prometesqanqa manan kamachikuy simita kasuqkunallapaqchu, aswanpas Abraham hina llapa iñiqkunapaqwanmi. Paymi llapanchispa taytanchis.

¹⁷Diospa Simin Qelqan nin: Askha suyukunaq taytan kanaykipaqmi churayki, nispa. Chay hinapin payqa iñisqan Diospa qayllanpi llapanchispa taytanchis. Diosqa wañusqakunata kawsarichiqmi, mana kaqkunatapas rimarispalla paqarichiqmi.

¹⁸Abrahamqa manaña suyanapaq hina kaqta iñispanmi suyakurqan. Ahinapin askha suyukunaq taytan kapurqan: Sinchi askhan mirayniyki kanqa, nispa Diospa nisqanman hina.

¹⁹Abrahamqa manan iñiyninpi pisiyarqanchu pachak watayoq hinaña kashaspanpas, cuerponta wañusqata hina qhawashaspanpas, warmin Saraq manaña wachakunanta yachashaspanpas.

²⁰Diospa prometesqanpiqa manan iskayrayarqanchu, manallataq pisicharqanpaschu, aswanmi iñiypi kallpachakuspan Diosta yupaycharqan.

²¹Abrahamqa cheqaqllatañan hap'irqan Diosqa prometesqanta hunt'ananpaq atiyniyoq kasqanta.

²²Chaymi Diospa Simin Qelqaqa nin: Payqa chaninchasqan karqan, nispa.

²³Chay “chaninchasqan karqan” niq simikunaqa manan Abrahamllapaqchu qelqasqa karqan,

²⁴aswanpas ñoqanchispaqwanmi qelqasqa karqan. Señorninchis Jesusta kawsarichimpuq Diospi iñiqtillanchismi Diosqa chaninpaq qhawariwanchis.

²⁵Jesusmi huchanchiskunarayku wañupuwarqanchis, hinaspan chaninchasqa kananchispaq kawsarimpurqan.