Read Quechua Cuzco Bible 1988 ROMANOS 6 Bible Online

ROMANOS 6 - Quechua Cuzco Bible 1988 bible

ROMANOS 6

¹Chay hinari, ¿imanisunchistaq? ¿Huchallapichu purishasun aswan-aswanta Dios khuyapayawananchispaq?

²¡Manapunin imaynamantapas! Ñoqanchisqa huchapaq wañusqañan kanchis, ¿imaynataq huchallikuspallaqa kawsashasunman?

³¿Manachu yachankichis llapallanchis Jesucristowan hukllachasqa kananchispaq bautizasqa kaqkunaqa wañuyninpi bautizasqa kasqanchista?

⁴Bautizasqa kaspanchismi Cristowan kuska wañuyninpi p'ampasqa kanchis. Imaynan Yayaqa hatun atiyninwan Cristota wañusqanmanta kawsarichimpurqan, chay hinallatataqmi ñoqanchistapas mosoq kawsaypi purinanchispaq kawsarichiwarqanchis.

⁵Cristowan kuska wañuspachus paywan hukllachakurqanchis chayqa, cheqaqtapunin paypa kawsarimusqanpi paywan kuska hukllachasqa kasunchis.

⁶Yachanchismi ñawpa kawsayninchisqa Cristowan kuska chakatasqa kasqanta, huchallikuylla munaq-kayninchis atipasqapuni kananpaq, ahinapi manaña astawan huchaq kamachin kananchispaq.

⁷Pichus wañunña chayqa, huchamanta kacharichisqañan.

⁸Cristowanchus wañurqanchis chayqa, iñillanchistaqmi paywan kawsananchistapas.

⁹Yachanchismi, Cristoqa wañusqanmanta kawsarimpuspa manaña wañunanta. Wañuyqa manañan payta munaychakunqañachu.

¹⁰Cristoqa huk kutillatan huchanchismanta wañurqan tukuy huchata atipananpaq, kawsaspantaq Diosllapaqña kawsashan.

¹¹Ahinallataq qankunapas huchapaqqa wañusqapuniña kasqaykichista yuyaychis, Diospaqtaq ichaqa Señorninchis Jesucristowan hukllachasqa kawsashasqaykichista yuyaychis.

¹²Chayrayku, huchaqa amaña wañuq aycha cuerpoykichispi munaychakuchunñachu, cuerpoq munasqanta amaña kasunaykichispaq.

¹³Amataq cuerpoykichistapas huchaman hap'ichiychischu mana chanin kaqkunata ruwananpaqqa, aswanpas Diosman wikch'uykakapuychis wañuspaña kawsarimpuq runa hina, llapa cuerpoykichista Diosman hap'iykachiychis chaninkaqta ruwananpaq.

¹⁴Huchaqa manan qankunata atipasunkichisñachu, manan kamachikuy simipiñachu kashankichis, aswanmi Diospa khuyapayakuyninpiña kashankichis.

¹⁵Chay hinari, ¿imanasuntaq? Manataq kamachikuy simipiñachu kashanchis, aswanpas Diospa khuyapayakuyninpitaq chayqa, ¿huchallikusunchu? ¡Manapunin imaynamantapas!

¹⁶Qankunaqa allintan yachankichis, pipas kamachi kananpaq huk runaman k'askaykakapun chayqa, chay runaq kamachinmi kapun, paytan kasunpas. Chay hinan, huchata kasuqqa wañunqa, Diosta kasuqtaq chaninpaq qhawarisqa kanqa.

¹⁷Ichaqa Diosman gracias kachun, qankunan ñawpaqqa huchaq kamachin karqankichis, kunantaq tukuy sonqoña kasukushankichis imayna yachachikuytachus chaskisqaykichisman hina.

¹⁸Kaqllataq huchaq kamachinmanta kacharichisqaña kaspa, qankunaqa chanin kawsaypa kamachinña kapunkichis.

¹⁹Runakuna hinallan rimani, pisitaraq entiendeq runalla kasqaykichisrayku. Chhaynaqa, imaynan llapa cuerpoykichista qhelli kawsayman millay-kayman tukuy mana allinkaqta ruwananpaq entregarqankichis, ahinallataq kunanpas llapa cuerpoykichista chanin kawsay ruwayman entregaykuychis, Diospaq t'aqasqa hinapuni kawsanaykichispaq.

²⁰Huchaq kamachin kashaspaykichisqa, chanin-kaymantaqa libren karqankichis.

²¹Chay ruwasqaykichismanta kunan p'enqakunkichis, chayri, ¿ima allintataq chay tiempopi tarirqankichis? Manan imatapas tarirqankichischu, aswanmi chaykunaqa wañuyllaman q'epiykun.

²²Kunanmi ichaqa huchamanta kacharichisqa kaspa Diospa kamachin kapunkichis, ahinapin Diospaq t'aqasqapuni kaspa wiñay kawsayniyoq kapunkichis.

²³Huchaq pagayninqa wañuymi, Diospa qokuyninmi ichaqa Señorninchis Jesucristopi wiñay kawsay.