Read Quechua Cuzco Bible 1988 ROMANOS 8 Bible Online

ROMANOS 8 - Quechua Cuzco Bible 1988 bible

ROMANOS 8

¹Kunanqa, manan Diosqa huchachanñachu Jesucristowan hukllachasqa kashaqkunataqa.

²Jesucristowan hukllachasqata kawsachiwaqniy Santo Espiritun atiyninwan kacharichiwarqan huchaq kamachiwasqanmanta wañuymantawan.

³Runaqa hucha munaq sonqoyoq kaqtinmi kamachikuy simiqa mana kallpayoq kapurqan, chaymi Diosqa kamachikuy simiq mana ruway atisqanta ruwarqan. Payqa sapan Churintan kachamurqan huchayoq runaman rikch'akuqta, huchamanta sacrificasqa kananpaq. Chay hinatan Jesuspa cuerponpi Diosqa huchata castigarqan.

⁴Chaytan ruwarqan kamachikuy simiq chanin kamachikusqanta hunt'ananchispaq. Ñoqanchisqa manan sonqonchispa munayninman hinachu purishanchis, aswanpas Santo Espirituq munayninman hinañan purishanchis.

⁵Sonqoq munayninman hinalla kawsaqkunaqa sonqoq munayninman hinallan imatapas yuyanku. Santo Espirituq munayninman hina kawsaqkunan ichaqa Espirituq munayninman hina imatapas yuyanku.

⁶Sonqoq munasqanman hina yuyayqa wañuymanmi apaykun, Santo Espirituq munasqanman hina yuyaymi ichaqa sumaq thak-kaypi kawsachin.

⁷Chaymi sonqoq munayninkunaman hina yuyaqqa Diospa contran sayarin, manan kamachikuy simintapas kasunchu, manallataq atinpaschu.

⁸Sonqoq munasqankunallapi kawsaqkunaqa manan Diospa sonqonman chayaqta ruwayta atinkuchu.

⁹Diospa Espiritunchus qankunapi kashan chayqa, manan sonqoykichispa munasqankunaman hinachu kawsankichis, aswanpas Santo Espirituq munasqanman hinan kawsankichis. Mayqenpichus Cristoq Espiritun mana kanchu chayqa, manan Cristoqchu.

¹⁰Cristochus qankunapi kashan chayqa, cuerpoykichisña hucha hawa wañunanpaq kashan chaypas, Diospa Espiritunqa kawsachisunkichismi Diospa chaninchasqan kasqaykichisrayku.

¹¹Wañusqanmanta Jesucristota kawsarichimpuq Diospa Espiritunchus qankunapi tiyan chayqa, wañuq cuerpoykichistapas Diosmi qankunapi tiyaq Espiritunwan kawsarichimpullanqataq.

¹²Chay hinaqa, wawqe-panaykuna, manan sonqonchispa munayninman hinañachu kawsananchis.

¹³Sonqoykichispa munaynillanman hinachus kawsankichis chayqa, wañunkichispunin, aswanpas mana allin yuyaykuyniykichiskunata Santo Espirituq yanapayninwan chinkachinkichis chayqa, kawsankichismi.

¹⁴Pikunachus Diospa Espiritunpa pusasqankunaqa Diospa wawankunan.

¹⁵Santo Espiritutaqa chaskirqankichis manan kamachi hina kaqlla manchapakushanaykichispaqchu, aswanpas Diospa wawankuna nisqa kaytan chaskirqankichis, chaymi Diosmantaqa mañakunkichis: ¡Yayalláy! nispa.

¹⁶Santo Espiritullataqmi espiritunchiswan kuska willakun Diospa wawankuna kasqanchista.

¹⁷Wawankunachus kanchis chayqa, Diospa prometewasqanchis herenciatapas chaskisunmi. Chay herenciatan chaskisun Cristowan kuska. Cristowan kuskachus ñak'arinchis chayqa, paywan kuskallataqmi hatunchasqa kapusunchis.

¹⁸Yachanin, kay tiempopi ñak'arisqanchiskunaqa manan imapasraqchu qhepaman Diospa hatunchasqan kananchiswan tupachiqtinchisqa.

¹⁹Tukuy imaymana kamasqakunaqa makillañan suyashanku Diosqa wawankunata rikhurichinanta.

²⁰Tukuy imaymana kamasqakunaqa manan paykunallamantachu mana valeqman tukupurqanku, aswanpas Diospuni chay hinata unanchaqtinmi, chaywanpas kamasqakunapaqqa suyakuyqa karqanpunin.

²¹Kikin kamasqakunatapas ismuypaq nisqa kaymanta Diosqa kacharinqan, chaymi Diospa wawankunawan kuska kacharisqa hatunchasqa kanqaku.

²²Yachanchismi Diospa tukuy imaymana kamasqankunaqa kunankama waqasqankuta muchusqankutapas, imaynan wachakuq warmi nanayta muchun hinata.

²³Manan kamasqakunallachu waqashan, ñoqanchispas Santo Espiritutaña ñawpaq rikhuriq ruruta hina chaskinchis chaypas, llakikuspan waqashanchis, hinallataq makillaña suyashanchis Diospa wawanpaq chaskikapuwananchis p'unchayta. Chaypachan cuerponchista kacharinqa,

²⁴chayta suyakuqtinchismi Diosqa qespichiwarqanchis. Suyasqanchista chaskispaqa manañan suyanchisñachu. Pipas chaskispañaqa, ¿imapaqñataq suyakunman?

²⁵Aswanpas mana chaskisqanchistachus suyakunchis chayqa, pacienciawanmi chaytaqa suyakunchis.

²⁶Chay hinallataqmi Santo Espiritupas pisi kallpa kaqtinchis yanapawanchis. Manan yachanchischu imayna mañakunachus kasqantaqa, ichaqa kikin Santo Espiritun mana rimay atina anchiywan ñoqanchispaq Diosmanta mañapuwanchis.

²⁷Llapa runaq sonqonta allintapuni reqsiq Diosqa yachanmi imachus Espirituq yuyaynin kasqanta, Espirituqa Diospa munayninman hinan iñiqkunapaq mañapun.

²⁸Diosmi yuyaykusqanta hunt'ananpaq runakunata waqyarqan. Chaymi yachanchis Diosqa tukuy ima sucedesqanwan munakuqninkunata allinninpaq yanapasqanta.

²⁹Diosqa ñawpaqmanta reqsisqankunataqa qallariyllapiraqmi t'aqarqan Churinman rikch'akuq kanankupaq, askha wawqe-panakuna ukhupi Churin phiwi kananpaq.

³⁰Qallariypi t'aqasqankunataqa waqyarqanmi, waqyasqankunatapas chaninchallarqantaqmi, chaninchasqankunatapas hatunchallarqantaqmi.

³¹Chay hinaqa, ¿imanisunñataq? Diostaq ñoqanchiswan kashan chayqa, ¿pitaq imanawasunpas?

³²Diosqa kikin Churintapas mana hark'akuwaspanchis llapanchisrayku wañunanpaq entregarqan chayqa, ¿manachu Churintapas qoshawaspanchisqa tukuy imatapas yanqallan qowasunchis?

³³¿Pitaq Diospa akllakusqankunataqa tumpaykunman? Diosmi chaninchaqqa.

³⁴¿Pitaq paykunataqa huchachanman? Jesucriston wañurqanqa, chaymantataq wañusqanmanta kawsarimpurqan, paymi Diospa paña ladonpipas kashan ñoqanchispaq Diosmanta mañapuwaspanchis.

³⁵¿Pitaq Cristoq munakuyninmantaqa t'aqawasunman? ¿Ñak'ariychu? ¿Llakikuychu? ¿Qatiykachasqa kaychu? ¿Yarqaychu? ¿Mana p'achayoq kaychu? ¿Wañuchinapaq nisqaña kaychu? ¿Espadawan wañurqachisqa kaychu?

³⁶Kay ñak'ariymantaqa Diospa Simin Qelqapas nirqanñan: Qanraykun sapa p'unchay wañuchinapaq nisqa kayku, nak'anapaq ovejakuna hina qhawasqan kayku, nispa.

³⁷Aswanpas tukuy chaykunapin munakuwaqninchis Cristoq yanapasqan atipallanchispuni.

³⁸Chayraykun allintapuni yachani: Manan wañuypas, kawsaypas, angelkunapas, kamachikuqkunapas, atiyniyoqkunapas, kunankaqpas, hamuqkaqpas,

³⁹hanaq pachapi kaqpas, Ukhu-pachapi kaqpas, ima kamasqapas Señorninchis Jesucristopi Diospa munakuyninmantaqa t'aqawasunchischu.