Read Quechua Cuzco Bible 1988 ROMANOS 9 Bible Online

ROMANOS 9 - Quechua Cuzco Bible 1988 bible

ROMANOS 9

¹Cristopi iñispaymi cheqaqta rimani, manan llullakunichu. Concienciaypas Santo Espirituq yuyaychasqanmi cheqaq rimashasqayta sut'itapuni willawan.

²Sinchi llakisqan kashani, sonqo nanaytan waqashallanipuni.

³Ñoqa kikiymi munayman ñakasqa kayta, Cristomanta t'aqasqa kaytapas, llaqtamasiy Judío runakunata yanapaykunayrayku.

⁴Paykunaqa Diospa wawanpaq hap'ikusqan Israelpa mirayninmi kanku, paykunamanmi Diosqa lliphlli-kayninta rikuchirqan, paykunawantaqmi Diosqa rimanakurqanpas, paykunamanmi qorqan kamachikuy simitapas, Diosta imayna yupaychaytapas yachachirqan, paykunan Diospa prometesqankunatapas chaskirqanku.

⁵Paykunan ñawpa machulanchiskunaq miraynin kanku, paykuna miraymantan Cristopas runa-kayninman hinaqa nacemurqan. Criston lliwpa Qollanan Diosqa, ¡wiñay-wiñaypaq yupaychasqa kachun! Ahinapuni kachun.

⁶Chayta nispaqa manan: Diosqa prometekusqankunatan mana hunt'anchu, nishanichu, aswanpas machulanchis Israelpa mirayninkunan mana llapanchu Diospa akllasqan kanku.

⁷Manallataqmi Abrahampa miraynin kasqankuraykuchu llapankupas paypa wawanpuni kanku, aswanpas Diosmi Abrahamta nirqan: Isaac churiykimantan mirayniyki kanqa, nispa.

⁸Chay hinaqa, manan valenchu aychaman hina naceyqa Diospa wawankuna kanapaqqa, aswanpas Diospa prometesqanman hina naceqkunallan Abrahampa cheqaq wawankunaqa kanku.

⁹Kay hinatan Diosqa Abrahamman prometerqan: Kunan hina tiempotan kutimusaq, warmiyki Sarataq qhari wawayoq kanqa, nispa.

¹⁰Manataqmi chayllachu, Rebecaq iskaynin churinkunaqa ch'ulla taytallayoqmi karqan, paymi machulanchis Isaacqa karqan.

¹¹Ichaqa wawakuna manaraq nacespa, allintapas mana allintapas manaraq ruwashaqtinkun, Rebecata Diosqa nirqan: Kurakkaqmi sullk'akaqta servinqa, nispa. Huk cheqaspipas nillantaqmi: Jacobtan munakurqani, Esautataq cheqnikurqani, nispa. Ahinapin Diospa yuyaykusqanman hina akllakusqanqa kashallanpuni, paymi runaq ruwasqanta mana qhawaspalla munasqanman hina waqyaspa pitapas akllakun.

¹⁴Chay hinaqa, ¿imanisuntaq? ¿“Diosqa manan chaninchu” nisunchu? ¡Manapunin imaynamantapas!

¹⁵Diosmi Moisesta nirqan: Pitachus khuyapayaytapas munani chaytan khuyapayasaq, pitachus llakipayaytapas munani chaytan llakipayasaq, nispa.

¹⁶Chay hinaqa, Diosqa runakunataqa akllan khuyapayaspallanmi, manan runakuna munaqtinkupaschu kallpachakuqtinkupaschu.

¹⁷Chaymi Qelqapi Diosqa Egipto reyta nin: Qanpi atiyniyta rikuchinaypaqpunin reyta churarqayki, runakunapas ñoqamanta kay pachantinpi willakunankupaqwan, nispa.

¹⁸Chay hinaqa, pitachus khuyapayayta munan chaytan Diosqa khuyapayan, pitachus sonqonta rumiyachiyta munan chaytan rumiyachinpas.

¹⁹Niwankichispaschá: Chay hinaqa, ¿imanaqtintaq Diosqa runata huchachan? nispa. Chayri, ¿pitaq Diospa munaynin contra sayarinman?

²⁰Ichaqa, ¿pitaq qanri kanki Dioswan churanakunaykipaq? ¿T'uru mankaqa ruwaqninta ninmanchu: ¿Imanaqtinmi khaynata ruwawarqanki? nispa.

²¹Manka ruwaqqa ima munasqantan t'urumanta ruwayta atin, kikin t'urumanta ruwanman hukta sumaq waqaychana mankata, huktataq sapa p'unchay apaykachana mankata.

²²Diosqa phiñakuynintapas atiynintapas reqsichiyta munaspan phiñakuyninwan muchuchinapaq kaq runakunata ancha pacienciawan hinallata qhawasharqan. ¿Imanisunmantaq chaymanta?

²³Kaqllataqmi Diosqa ancha sumaq-kayninta rikuchiyta munaspa ñoqanchistapas khuyapayawarqanchis. ¿Imanisunmantaq chaymanta? Ñawpaqmantañan wakichiwarqanchis payman rikch'akuq sumaqpuni kananchispaq.

²⁴Chay hinatan Diosqa waqyawarqanchis, wakinta Judío runakunamanta wakintataq mana Judío runakunamanta.

²⁵Profeta*f** Oseaspa qelqasqanpipas ninmi: Mana llaqtaytan “llaqtaymi” nisaq, mana munakusqaytan “munakusqay” nisaq, nispa.

²⁶Nillantaqmi: Qankunaqa “manan llaqtaychu kankichis” nisqa cheqaspin, “kawsachiq Diospa wawankuna” nisqa kankichis, nispa.

²⁷Isaiaspas Israel runakunamantaqa nirqanmi: Israelpa miraynin mama qocha aqo hina askhaña kanqa chaypas, wakillanmi qespichisqa kanqa.

²⁸Señor Diosqa usqhayllan kay pachantinpi simintaqa hunt'anqapuni, nispa.

²⁹Isaiasqa ñawpaqtapas nillarqantaqmi: Tukuy-atiyniyoq Señor Dios llapanchista tukunman karqan chayqa, Sodoma llaqta hinan kasunman karqan, Gomorra llaqtamantaq rikch'akusunman karqan, nispa.

³⁰Chay hinaqa, ¿imanisuntaq? Kaytan nisunchis: Chaninchayta mana maskhaq mana Judío runakunan Diospi iñispa chaninchasqa karqanku.

³¹Ichaqa Israel runakunan kamachikuy simita maskharqanku chayta hunt'aspa Diospa chaninchasqan kanankupaq, manataqmi chaytaqa tarirqankuchu.

³²¿Imanaqtintaq mana tarirqankuchu? Mana iñiywan maskhasqankuraykun, aswanpas ruwasqankuwan maskhasqankuraykun. Chaymi misk'ana rumi nisqapi misk'akurqanku.

³³Diospa Simin Qelqan nin: Sionpin churani misk'ana rumita, Sionpin churani urmana qaqata, paypi iñiqqa manan p'enqaypichu kanqa, nispa.