Read Quechua Cuzco Bible 1988 1 CORINTIOS 10 Bible Online

1 CORINTIOS 10 - Quechua Cuzco Bible 1988 bible

1 CORINTIOS 10

¹Wawqe-panaykuna, ñawpa machulanchiskunamantaqa yachanaykichistan munani. Llapankun paykunaqa sayashaq phuyuq pusasqan karqanku, llapankutaqmi Puka Qochatapas chimparqanku.

²Llapallankun Moiseswan hukllachasqa kaspanku bautizasqa karqanku phuyupipas Puka Qochapipas.

³Llapallankun Diospa qosqan mikhunallamanta mikhurqanku.

⁴Llapallankutaqmi Diospa qosqan ukyanallamanta ukyarqanku. Paykunaqa puriysiqninku qaqamanta Diospa phawachimusqan unutan ukyarqanku, chay qaqaqa Criston karqan.

⁵Chaywanpas yaqa llapankun Diosta mana kusichirqankuchu, chaymi ch'inneqpi wañurarqanku.

⁶Tukuy chaykunaqa ñoqanchista reparachinawanchispaqmi karqan, mana allin kaqkunata ama munapayananchispaq, imaynan paykuna munapayarqanku hinata.

⁷Chayrayku qankunaqa idolokunata ama yupaychaychischu paykunamanta wakinninku hinaqa. Diospa Simin Qelqan nin: Runakunaqa mikhuq ukyaq tiyaykurqanku, hinaspan tusuq sayarirqanku, nispa.

⁸Manan qhelli kawsaypi purinaykichischu, imaynan paykunamanta wakinninku qhelli kawsaypi purirqanku hinataqa, chay hawan paykunaqa huk p'unchayllapi iskay chunka kinsayoq waranqa wañurarqanku.

⁹Ama Señorta wateqasunchu, imaynan paykunamanta wakinninku wateqarqanku hinataqa, chay hawan paykunaqa mach'aqwaypa picasqan wañurarqanku.

¹⁰Amataq Dios contra chhuchupakuychischu, imaynan paykunamanta wakinninku chhuchupakurqanku hinataqa, chay hawan paykunataqa Wañuchiq Angel wañuchirqan.

¹¹Ñawpa machulanchiskunata tukuy chay sucedesqankunaqa ñoqanchista reparachinawanchispaqmi karqan, ñoqanchisqa p'uchukay tiempopin kashanchis, chaymi chaykunaqa anyawananchispaq qelqasqa karqan.

¹²Chay hinaqa, pipas qaqa sayashasqanta yuyaqqa allinta qhawakuchun, paqtataq urmanman.

¹³Qankunaqa manan wak pruebatachu muchunkichis, aswanpas llapa runaq muchusqanta hinallan. Chaywanpas Diosqa hunt'aqpunin. Maykamachus pruebata muchuwaqchis chaykamallan Diosqa probachisunkichis, chaypin kallpachasunkichis qaqata sayanaykichispaq, ahinapin chaymanta lloqsinkichis.

¹⁴Chayrayku, wawqe-panaykuna, amapuni idolokunataqa yupaychaychischu.

¹⁵Yuyayniyoq runakunaman hinan rimapayaykichis, qankuna kikiykichis nisqayta chaninchaychis.

¹⁶Santa Cenapi vasomanta Diosman graciasta qospa ukyaspanchisqa, ¿manachu Cristowan yawarninpi hukllachakunchis? T'antatapas phasmispanchisqa, ¿manachu Cristowan cuerponpi hukllachakunchis?

¹⁷Askhaña kanchis chaypas huk sapan t'antallamantan llapanchis mikhunchis, chayraykun huk cuerpolla kanchis.

¹⁸Qhawariychis Israel runakunata. ¿Manachu altarpi haywasqa sacrificiota mikhuspaqa Dioswanpas paykuna purapas hukllachakunku?

¹⁹Ñoqaqa manan nishani: Idoloqa valorniyoqmi, idoloman haywasqa aychapas valorniyoqmi, nispachu,

²⁰aswanpas nishani: Diospi mana iñiq runakunaqa supaykunamanmi sacrificiota haywanku, manan Diosmanchu, nispaymi. Chaymi ñoqaqa mana munanichu supaykunawan hukllachakunaykichista.

²¹Manan Señorpa vasonmantawan supaykunaq vasonmantawanqa ukyayta atinkichischu, manallataq Señorpa mesanpiwan supaykunaq mesanpiwanqa mikhuyta atinkichischu.

²²Chayri, ¿Señortachu phiñachisun? Ñoqanchisri, ¿paymanta aswan kallpasapachu kanchis?

²³Runaqa ninmi: Tukuy imatapas munaspayqa ruwallaymanmi, nispa. Arí, ichaqa manan llapanchu allinninchispaq kanman. Runaqa ninmi: Tukuy imatapas munaspayqa ruwallaymanmi, nispa. Arí, hinapunin, ichaqa manan llapanchu iñiypi wiñachin.

²⁴Ama pipas kikinpa allinnintaqa maskhachunchu, aswanpas runamasinpa allinninta maskhachun.

²⁵Diospa Simin Qelqan nin: Señor Diospan kay pachapas chaypi tukuy ima kaqpas, nispa. Chayrayku aycha qhatupi imapas vendesqataqa mikhullaychis, ama imatapas concienciaykichis hawa tapukuspa.

²⁷Mayqen mana iñiqpas mikhunaman waqyasunkichisman, qankunapas munawaqchistaq riyta chayqa, tukuy ima haywasqasuykichista mikhuychis, ama imatapas concienciaykichis hawa tapukuspa.

²⁸Ichaqa pipas nisunkichisman: Kay mikhunaqa idolokunaman haywasqan karqan, nispa chayqa, ama mikhuychischu, chay willaqniykichis runa hawa, conciencia hawa ima.

²⁹Willaqniykichispa conciencianmantan rimashani, manan qanpa concienciaykimantachu. Ñoqaqa ninin: ¿Imaynataq ñoqaq libre-kayniyri hukpa conciencian hawa juzgasqa kanman? nispa.

³⁰Ñoqaqa Diosman graciasta qospaymi mikhunataqa mikhuni, ¿imaynataq qhawawankuman mikhusqaytari?

³¹Chay hinaqa, mikhunkichisña, ukyankichisña, imataña ruwankichis chaypas, lliwta ruwaychis Diosta hatunchanapaq.

³²Ama misk'achiychischu Judío runakunatapas, mana Judío runakunatapas, Diospa iñiq t'aqantapas.

³³Ñoqapas lliw runatan tukuy imaymanapi kusichiytapuni munani, manan ñoqaq allinniytachu maskhani, aswanpas askhaq allinnintan maskhani, paykuna qespichisqa kanankupaq.