Read Quechua Cuzco Bible 1988 1 CORINTIOS 12 Bible Online

1 CORINTIOS 12 - Quechua Cuzco Bible 1988 bible

1 CORINTIOS 12

¹Wawqe-panaykuna, Santo Espirituq qokuyninkunamantan tapukamuwarqankichis. Chaymantan yachanaykichista munani.

²Qankunaqa allintan yachankichis Diospi manaraq iñishaspaykichisqa, mana rimaq idolokuna yupaychaywan sonqoykichista imaymanapi suwachikusqaykichista.

³Chayraykun yachanaykichista munani, manan pipas Diospa Espiritunpa yanapasqan rimaspaqa “Jesusqa ñakasqan” ninmanchu, manallataq pipas rimaspaqa “Jesusqa Señormi” ninmanchu, mana Santo Espirituq yanapasqan rimaspaqa.

⁴Imaymana qokuykunan kan, ichaqa kikin Espiritullan chaykunata qoqqa.

⁵Imaymanapin servisunman, chaywanpas huk kikin Señorllatan servinchis.

⁶Imaymanan ruwaykunaqa kan, chaywanpas kikin Diosllan llapanchispi tukuy imaymanata ruwan.

⁷Diosmi sapankaman imaynallamantapas reparachin Santo Espirituq atiynin paypi kashasqanta llapankuq allinninpaq.

⁸Wakinmanmi Santo Espíritu qon yachaywan kusa rimayta. Wakinmanmi kikin Santo Espíritu qon allinta unanchaspa rimayta.

⁹Wakinmanmi chay kikin Santo Espiritullataq qon allintapuni iñiyta. Wakinmanmi qon onqosqakuna qhaliyachiy atiyta.

¹⁰Wakinmanmi qon milagrokuna ruwayta. Wakinmanmi qon profetizay atiyta. Wakinmanmi qon mana yachasqa simikuna rimayta. Wakinmantaq qon chay mana yachasqa simikunata sut'inchayta.

¹¹Tukuy chaykunataqa kikin Santo Espiritullan ruwan. Paymi munasqanman hina sapankaman qokuykunata rakin.

¹²Imaynan huk cuerpoqa askha imaymanayoq kashaspapas huklla, chay hinallataqmi Cristopas askha imaymanayoq kashaspa huk cuerpolla.

¹³Llapanchismi ñoqanchisqa sapan Santo Espiritullawan bautizasqa karqanchis, huk cuerpolla kananchispaq, Judío runapas mana Judío runapas, kamachipas mana kamachipas. Llapallanchismi huk Santo Espiritullata chaskirqanchis.

¹⁴Huk cuerpoqa manan ch'ulla miembrollayoqchu, aswanpas askha imaymanayoqmi.

¹⁵Chakichus ninman: Manan makichu kani, chaymi mana cuerpoqchu kani, nispa chayqa, ¿chayraykuchu mana cuerpoq kanman?

¹⁶Ninritaqchus ninman: Manan ñawichu kani, chaymi mana cuerpoqchu kani, nispa chayqa, ¿chayraykuchu mana cuerpoq kanman?

¹⁷Llapa cuerpochus ñawi kanman chayqa, ¿maypitaq uyarinaqa kanman? Llapa cuerpochus ninri kanman chayqa, ¿maypitaq muskhinaqa kanman?

¹⁸Aswanpas Diosmi churarqan munasqanman hina cuerpoq sapanka miembronkunataqa.

¹⁹Llapanchus huk sapan miembrolla kanman chayqa, ¿maypitaq cuerpoqa kanman?

²⁰Askha imaymanayoq kashan chaypas, huk cuerpollan kapun.

²¹Ñawiqa manan makita ninmanchu: Manan necesitaykichu, nispaqa, manataq umapas chakita ninmanchu: Manan necesitaykichu, nispaqa.

²²Huch'uyman rikch'akuwaqninchis miembrokuna mana kaqtinqa, manan kawsasunmanchu.

²³Cuerpopi mana ancha munasqanchiskunatan aswan allinta cuidanchis. Cuerponchispi mana qhawachikunapaq kaqkunatataqmi pakanchis.

²⁴Aswan allinpaq qhawasqa miembrokunatan mana pakanchischu. Ahinatan Diosqa cuerponchista tupachirqan, pisichasqa kaqta aswan allinpaq qhawachispa,

²⁵cuerpopi ama t'aqanakuy kananpaq, aswanpas cuerpopi llapan miembrokuna huk-nisqalla qhawarinakunankupaq.

²⁶Chay hinaqa, cuerpoq huk miembronchus muchun chayqa, llapan miembrokunan chaywan kuska muchullantaq. Cuerpoq huk miembronchus allinpaq hap'isqa chayqa, llapan miembrokunan chaywan kuska anchata kusikunku.

²⁷Qankunaqa Cristoq cuerponmi kankichis, sapankaykichistaq Cristoq cuerponpa miembronkuna kankichis.

²⁸Diosmi paypi iñiqkunapaq churarqan ñawpaqta apostolkunata*f**, chaymantataq profetakunata*f**, chaymantataq yachachiqkunata, chaymantataq milagro ruwaqkunata, onqosqakuna qhaliyachiqkunata, yanapakuqkunata, kamachikuqkunata, mana yachasqa simi rimaqkunatapas.

²⁹Manan llapanchu apostolkunaqa*f** kanku, manan llapanchu profetakunaqa*f** kanku, manan llapanchu yachachiqkunaqa kanku, manan llapanchu milagro ruwaqkunaqa kanku.

³⁰Manan llapanchu onqosqakunata qhaliyachinanpaq atiyniyoqkunaqa kanku, manan llapanchu mana yachasqa simi rimaqkunaqa kanku, manan llapanchu mana yachasqa simikunata sut'inchaqpas kanku.

³¹Chaywanpas aswan allinkaq qokuykunata chaskiytapuni munaychis. Ñoqan ichaqa yachachisqaykichis aswan allin purinata.