Read Quechua Cuzco Bible 1988 1 CORINTIOS 15 Bible Online

1 CORINTIOS 15 - Quechua Cuzco Bible 1988 bible

1 CORINTIOS 15

¹Kunanqa, wawqe-panaykuna, Diosmanta allin willakuykunata willarqaykichis chaytan yuyarichiyta munaykichis, chay willakuytan chaskirqankichis, chaypitaqmi qaqata sayashankichispas.

²Chay allin willakuykunan qespichisunkichis willasqayman hinapunichus allinta purinkichis chayqa, yanqalla iñispan ichaqa mana qespichisqachu kankichis.

³Yachaqasqaykunatan yachachirqaykichis aswan chaniyoqta hinapuni, chaykunan kaykuna: Diospa Simin Qelqaq nisqanman hinan huchanchiskuna hawa Cristo wañurqan,

⁴hinaspan Diospa Simin Qelqaq nisqanman hina Cristoqa p'ampasqa kaspa kinsakaq p'unchaypi kawsarimpurqan.

⁵Chaymantataq Pedroman rikhurirqan, hinamantataq chunka iskayniyoq apostolkunaman*f** rikhurirqan.

⁶Chay qhepatataq phisqa pachak yaparisqa wawqe-panakunaman rikhurirqan. Chay rikuqkunamantaqa askharaqmi kawsashanku, wakintaq wañukapunkuña.

⁷Chaymantataq Jacoboman rikhurirqan, rikhurillarqantaq llapan apostolkunamanpas*f**.

⁸Llapankuq qhepantañan ñoqamanpas rikhurillawarqantaq, pisipasqa wawaman hina.

⁹Ñoqaqa apostolkunamantapas*f** aswan sullk'araqmi kani, manataqmi apóstol*f** niwanankupaq hinapaschu, Diospa llapa iñiq t'aqanta ñak'arichispa qatiykachaq kasqayrayku.

¹⁰Ichaqa imaynaña kani chaypas Diospa khuyapayakuyninraykun kani, Diospa khuyapayakuyninqa manan yanqachu ñoqapaqqa karqan, aswanpas llapankumanta astawanmi ñoqaqa llank'arqani, ichaqa manan ñoqachu llank'arqani, aswanpas khuyapayakuyninpi ñoqawan kashaq Diosmi llank'arqan.

¹¹Chaywanpas, manan imananpaschu, ñoqaña willani chaypas, paykunaña willanku chaypas, chay hinatakaman willayku, chaytataqmi qankunapas iñirqankichis.

¹²Wañusqanmanta Cristoq kawsarimpusqanta willashaqtinchisqa, ¿imaynataq wakinniykichisqa nin: Wañusqakunaqa manan kawsarimpunqachu, nispa?

¹³Kawsarimpuy mana kaqtinqa, manachá Cristopas kawsarimpurqanchu.

¹⁴Manataq Cristopas kawsarimpurqanchu chayqa, yanqachá willasqaykupas, yanqachá iñiyniykichispas.

¹⁵Ñoqaykupas Diospa llulla testigonkunachá kayku. Diosmi Cristota wañusqanmanta kawsarichimpun, nispa willayku, manataq kawsarimpuy kanchu chayqa, manachá Cristotapas Diosqa kawsarichimpurqanchu.

¹⁶Manachus wañusqakuna kawsarimpunku chayqa, manallataqmi Cristopas kawsarimpurqanchu.

¹⁷Manataq Cristo kawsarimpurqanchu chayqa, yanqan iñiyniykichisqa, huchallantinraqmi kashankichispas.

¹⁸Chay hina kaqtinqa, Cristopi iñispa wañukapuqkunapas ñak'ariypichá kashanku.

¹⁹Kay pacha kawsayllapaqchus Cristopi suyakuyninchis kan chayqa, llapan runakunamantapas aswan khuyapayanan kashanchis.

²⁰Manapunin hinachu, aswanpas Cristoqa wañusqanmanta kawsarimpurqanmi. Paymi wañukapuqkunaq kawsarimpunan qallariyqa karqan.

²¹Imaynan wañuyqa huk runallawan kay pachapi qallarirqan, ahinallataqmi huk runallawan wañusqakunaq kawsarimpuyninpas qallarirqan.

²²Imaynan Adanwan hukllachasqa kaspa llapa runa wañunku, chay hinallataqmi Cristowan hukllachasqa kaspa llapa kawsarimpunqa.

²³Ichaqa sapankan tupaqninman hina kawsarimpunqa. Criston kawsarimpuy qallariyqa, chaymantañan Cristopi iñiqkunaqa kawsarimpunqaku, Cristo kutimuqtin.

²⁴Chaymantataq p'uchukay chayamunqa, hinan Cristoqa tukuy kamachikuyta, tukuy atiyta, tukuy munaychakuytapas chinkachinqa, hinaspan Dios Yayaman kamachikunan atiyta qopunqa.

²⁵Cristoqa kamachikunqapunin, tukuy awqankunata chaki sarunanman Dios churanankama.

²⁶Qhepallataña ch'usaqyachina kaq awqaqa wañuymi.

²⁷Diospa Simin Qelqan nin: Diosqa tukuy imaymanatan Cristoq chaki sarunanman churarqan, nispa. Chay “tukuy imaymanan” Cristomanqa kasukushanku, Diostan ichaqa Cristo mana munaychakunchu, aswanpas Diosmi tukuy imaymanawan Cristota kasuchin.

²⁸Tukuy imaymanapas Cristowan munaychachisqa kaqtintaq, kikin Cristopas Churi kashaspa tukuy imaymanata paywan munaychachiq Dios Yayaman kasukunqa. Ahinapin Diosqa llapa imaymanapipas runakunapipas payllapuni munaychakunqa.

²⁹Kanmi wakinkuna wañusqakunaq sutinpi bautizachikuqkuna, manataq kawsarimpuy kanchu chayqa, ¿imapaqtaq chayta ruwanku? ¿Imaraykutaq wañusqakunaq sutinpi bautizachikunku?

³⁰¿Imanaqtintaq ñoqanchispas tukuy tiempo hatun sasachakuyllapi kashanchis?

³¹Wawqe-panaykuna, Señorninchis Jesucristopi iñisqaykichis hawan qankunamanta maytapuni kusikuni. Chay hawataqmi sut'ita niykichis sapa p'unchay wañuy patapiña kashasqayta.

³²Runa hinachus Efeso llaqtapi phiña animalkunawan hina maqanakurqani chayqa, ¿ima allinniypaqtaq karqan? Manataq wañusqakuna kawsarimpunchu chayqa, imaynan rimaypi nin hinachá nisunman: Mikhusunchis, ukyasunchis, paqarinmi wañupusunchis, nispa.

³³Ama q'otuchikuychischu chay hina rimaqkunawanqa. Rimaypin nillantaq: Mana allin runakunawan huñukuspaqa samaykachikunkun, nispa.

³⁴Yuyayta hap'iychis, amataq huchallikuychischu, wakinniykichisqa manan Diosta reqsinkichischu. Chaytaqa nini p'enqakunaykichispaqmi.

³⁵Pipas tapukunqakupaschá: ¿Imaynatataq wañusqakunari kawsarimpunqaku? ¿Imayna cuerpoyoqtaq kanqaku? nispa.

³⁶Mana yuyayniyoqpa tapukuyninmi chayqa. Qhawariy, muhu tarpusqaykiqa wañunanraqmi yura wiñamunanpaqqa.

³⁷Tarpuspaykiqa manan phutumunqa chay yuratachu tarpunki, aswanpas ruru muhullatan, trigo muhuta kaspapas wak muhuta kaspapas.

³⁸Chaymantataqmi Diosqa chay muhuta wiñachin, hinaspan paypa munasqanman hina sapanka muhuta imaynachus kasqanman hina tukuchin.

³⁹Llapan cuerpokunaqa manan kaqkamallachu. Runakunaq aychanqa huk rikch'aqmi, uywakunaq aychanpas huk rikch'aqmi, challwakunaq aychanpas huk rikch'aqmi, phalaq animalkunaq aychanpas huk rikch'aqllataqmi.

⁴⁰Chay hinallataqmi kan hanaq pachapi kaqkunapas kay pachapi kaqkunapas, hanaq pachapi kaqpa sumaq-kayninqa sapaqmi, kay pachapi kaqpa sumaq-kayninpas huk rikch'aqtaqmi.

⁴¹Intiq k'anchayninqa huk-hinan killaq k'anchayninmantaqa, ch'askakunaq k'anchayninpas huk-hinallataqmi, kikin ch'askakuna purapas sapankan huk-hinatakama k'anchan.

⁴²Chay hinallataqmi wañusqakunapas kawsarimpunqaku. Ismuq cuerpo p'ampakunqa, chaymantataq mana ismuq cuerpo kawsarimpunqa.

⁴³Wañusqataqa mana valeqtan p'ampanku, chaymantataq may sumaq cuerpoyoqta Diosqa kawsarichimpunqa, p'ampankuqa mana kallpayoqtan, chaymantataq kawsarichimpunqa kallpasapallataña.

⁴⁴Aycha cuerpotan p'ampanku, kawsarimpuspataq Santo Espirituq kawsachisqan cuerpo kapunqa. Kanmi aycha cuerpo, kallantaqmi Santo Espirituq kawsachisqan cuerpopas.

⁴⁵Chay hinallataqmi Diospa Simin Qelqapas nin: Ñawpaqkaq runa Adanqa kawsayniyoq runan karqan, nispa. Qhepakaq Adanmi ichaqa kawsachiq Espíritu kapurqan.

⁴⁶Chaywanpas manan Santo Espirituq kawsachisqan cuerpochu ñawpaqqa karqan, aswanpas aychakaqmi, chaymantañan Santo Espirituq kawsachisqan kaqqa.

⁴⁷Ñawpaqkaq runaqa kay pachamantan karqan, hallp'amanta ruwasqataq, qhepakaq runan ichaqa hanaq pachamanta hamuq Señor.

⁴⁸Imaynachus hallp'amanta runa, chay hinallataq kay pacha runakunapas, imaynachus hanaq pachamanta runa, chay hinallataq hanaq pacha runakunapas.

⁴⁹Imaynan hallp'amanta ruwasqa runaman rikch'akunchis, chay hinallataqmi hanaq pachamanta runaq rikch'aynin rikch'ayniyoq kasunchis.

⁵⁰Ichaqa, wawqe-panaykuna, kaytan niykichis: Runaqa manan iman kaq aycha cuerpoyoqchu Diospa kamachikushasqanmanqa haykunqa, manallataq ismuqpas mana ismuqtaqa chaskinmanchu.

⁵¹Reparaychis, huk pakasqa yachaytan willaykichis: Manan llapapunichu wañusunchis, ichaqa llapanchismi huk-niraqman tukuchisqa kasunchis,

⁵²huk ratolla, ñawi ch'ipiq niyllapi, p'uchukay trompeta waqaqtin hina. Trompetaqa waqanqan, chaymi wañusqakunaqa manaña wañuq cuerpoyoq kawsarichisqa kanqaku, ñoqanchis kawsashaqkunataq huk-niraqman tukuchisqa kasunchis.

⁵³Kay wañuq cuerponchisqa mana wañuq cuerpowanpunin p'achachisqa kanan, kay ismuq cuerponchisqa mana hayk'aq tukukuq cuerpowanpunin p'achachisqa kanan.

⁵⁴Kay ismuq cuerponchis mana tukukuq cuerpowan p'achallikuqtin, kay wañuq cuerponchispas mana wañuq cuerpowan p'achallikuqtinmi, Diospa Simin Qelqa hunt'akunqa, chaymi nin: Wañuyqa hukpaqkama atipasqañan, Diosmi chaytaqa atipanña.

⁵⁵Yaw wañuy, ¿maytaq atipasqayki? Yaw wañuy, ¿maytaq wañuchinayki t'urpuna? nispa.

⁵⁶Wañuypa wañuchinan t'urpunaqa huchan, huchaq atiynintaq kamachikuy simimanta paqarin.

⁵⁷¡Ichaqa Diosman gracias kachun, Señorninchis Jesucristoq wañusqanwan atipachiwasqanchismanta!

⁵⁸Chayrayku, munasqa wawqe-panaykuna, mana kuyurispa qaqata sayaychis, Señorpa llank'ananpi aswan-aswanta llank'aspa. Qankunaqa yachankichismi Señorwan llank'asqaykichisqa mana yanqapaqchu kasqanta.