Read Quechua Cuzco Bible 1988 1 CORINTIOS 2 Bible Online

1 CORINTIOS 2 - Quechua Cuzco Bible 1988 bible

1 CORINTIOS 2

¹Wawqe-panaykuna, ñoqaqa Diospa pakasqa siminta qankunaman willaq hamushaspayqa, manan sumaq rimaywanpaschu yachaysapa simiwanpaschu willarqaykichis.

²Ñoqaqa yuyaykurqani qankunawan kashaspayqa mana imatapas yachachiytan, aswanpas Jesucristollamanta pay chakatasqa kasqallanmantawan yachachiytan.

³Qankunamanmi hamurqani pisi kallpayoq, sinchi manchasqa khatatataspa.

⁴Diosmanta willaspayqa manan runakunaq yachayninman hina sumaq simikunawanchu yachachirqani, aswanpas Santo Espirituq atiyninta rikuchispan yachachirqaykichis,

⁵iñiyniykichis ama runakunaq yachaynin patapi takyachisqa kananpaq, aswanpas Diospa atiyninpi.

⁶Chaywanpas, yachaysapa simikunataqa rimayku iñiypi allin takyasqa runakunawanmi, ichaqa manan chay yachayqa kay pachaq yachayninchu, manataq kay pachapi kamachikuqkunaq yachayninpaschu, chaykunaqa chinkaripullanqan.

⁷Aswanpas Diospa pakasqa yachaynintan rimayku, chay pakasqa yachaytan Diosqa wiñay-wiñaymantaña churarqan wiñaypaq paywan hatunchasqa kananchispaq.

⁸Chaytaqa manan kay pachapi mayqen kamachikuqpas yacharqanchu, yachankuman karqan chayqa, manan hayk'aqpas hatun atiyniyoq Señortaqa chakatankumanchu karqan.

⁹Diospa Simin Qelqan nin: Ñawiq mana rikusqankunatan, ninriq mana uyarisqankunatan, sonqoq mana yuyaykusqankunatan Diosqa munakuqninkunapaq wakichirqan, nispa.

¹⁰Ichaqa Diosmi Santo Espiritunwan chaykunata reqsichiwarqanchis, Espirituqa lliwtan t'aqwin, Diospa ukhu sonqontapas.

¹¹Chay hinaqa, ¿pitaq yachanman runaq sonqonpi kaqkunata? Manan pipas, aswanpas paypa sonqonpi kaq espiritullanmi yachan. Chay hinallataqmi, Diospa yuyayninkunatapas paypa Espiritullan yachan.

¹²Ñoqanchisqa manan kay pacha espiritutachu chaskirqanchis, aswanpas Diosmanta kaq Espiritutan chaskirqanchis, sumaq sonqo-kayninpi Diospa qowasqanchis kaqkunata yachananchispaq.

¹³Chaykunatan ñoqaykuqa rimayku Diospa Espiritunpa yachachiwasqanku simikunawan, manan runaq yachayninwan yachachisqa simikunawanchu. Ahinapin Diospa Espiritunmanta kaqkunata sut'inchayku Diospa Espiritunpa pusasqan runakunaman.

¹⁴Mana iñiq runan ichaqa Diospa Espiritunpa kaqninkunataqa mana chaskinchu, paypaqqa mana yuyayniyoq-kay kaqtin, manataqmi chaykunataqa entiendenchu Diospa Espiritunpa pusasqan runalla reparayta atisqanrayku.

¹⁵Diospa Espiritunpa pusasqan runan ichaqa tukuy imaymanata reparaspa juzgan, paytan ichaqa mana pipas juzganchu.

¹⁶Diospa Simin Qelqan nin: ¿Pitaq Señorpa yuyayninta yacharqan? ¿Pitaq payta yachachirqan? nispa. Chaywanpas ñoqanchisqa Cristoq yuyaynin yuyayniyoqmi kanchis.