Read Quechua Cuzco Bible 1988 1 CORINTIOS 4 Bible Online

1 CORINTIOS 4 - Quechua Cuzco Bible 1988 bible

1 CORINTIOS 4

¹Chay hinaqa, Cristoq yanapaqninkunata hinallan ñoqaykutaqa qhawawanaykiku, Diospa pakasqa yachayninkunata yachachiqpaq churasqa runakunata hinalla.

²Yachachiqpaq churasqa runaqa allin hunt'aq kasqantan rikuchikunan.

³Ñoqaqa manan imatapas manchakunichu, qankunaq juzgawanaykichistapas, mayqen juezpa juzgawanantapas, manan ñoqa kikiypas juzgakunichu.

⁴Manan concienciaypas imamantapas huchachawanchu, chaywanpas, manan “mana huchayoqmi kani” nishanichu. Ñoqaq juzgaqniyqa Señormi.

⁵Chay hinaqa, ama imatapas manaraq tiemponpiqa juzgaychischu, Señorpa hamunantaraq suyaychis, paymi laqhayaqpi pakasqa kaqkunata sut'iman horqomunqa, sapanka runaq sonqonpi yuyaykusqankunatapas sut'inchanqa, hinaspanmi Diosqa maychus ruwasqanman hina sapankata saminchanqa.

⁶Wawqe-panaykuna, chaykunataqa allinniykichispaqmi nini, ñoqapiwan Apolospiwanmi yachaqakunaykichispaq kayku, ñoqaykuq kawsayniykumanta yachaqakunaykichispaq, Diospa Simin Qelqapi kashan chaymanta ama astawan yuyanaykichispaq. Chayrayku ama mayqenniykichispas hatunchakuspa, hukman sayakuspa hukkunata pisichaychischu.

⁷Chay hinaqa, ¿pitaq hukkunamanta aswan allintaqa ruwasunki? ¿Imatataq Diosmantaqa mana chaskirqankichu? Diosmantataq tukuy imatapas chaskirqanki chayqa, ¿imanaqtintaq hatunchakunki, manapas Diosmantachu chaskiwaq karqan hinaqa?

⁸Qankunaqa yuyankichis qhapaqña kasqaykichistan, tukuy imaymanayoqña kasqaykichistan, mana ñoqaykuwan kaspa rey hinaña kamachikushasqaykichistawan. ¡Allinchá kanman cheqaqtapuni kamachikuwaqchis chayqa, ñoqaykupas qankunawan kuska kamachikunaykupaq!

⁹Ñoqaq reparasqayman hinaqa, ñoqayku apostolkunataqa*f** Diosmi qhepallamanña churawanku, lliw runakunaq rikushasqan wañunaykupaq huchachasqata hina. Kay pachapaqqa ancha sut'i qhawanan kapuyku, angelkunaqpas runakunaqpas qhawakunanpaq.

¹⁰Cristoraykun ñoqaykuqa mana yuyayniyoqmanta qhawasqa kayku, qankunataq ichaqa Cristowan hukllachasqa kaspa allin yachaysapa kankichis. Ñoqaykuqa pisi kallpan kayku, qankunataq allin kallpasapa. Qankunataqa runakunapas respetasunkichismi, ñoqaykutataq pisichawanku.

¹¹Kunankaman ñoqaykuqa muchuyku yarqayta, ch'akiyta, thanta p'achayoq kayta. Runakunan maqawanku, manan wasiykupas kanchu,

¹²makiykuwan llank'aspapas sayk'uykun. Runakunan k'amiwanku, ñoqaykutaq sumaq simikunawan kutichiyku, qatiykachawankun, ñoqaykutaq hinalla muchukuyku.

¹³Ñoqaykutan mana kaqmanta tumpawanku, ñoqaykutaq sumaqta kutichiyku. Kunankaman kay pachaq q'opanta hina, llapa runaq qhellinta hina qhawawanku.

¹⁴Manan qankunata p'enqachinaypaqchu chay hinata qelqamuykichis, aswanpas munasqa wawaykunata hina qankunata yuyaychanaypaqmi.

¹⁵Chay hinaqa, Cristowan hukllachasqa kaspa chunka waranqa qhawaqniyoqña kankichis chaypas, manan askha taytayoqchu kankichis. Diosmanta allin willakuykunata willasqay hawan Jesucristopi qankunaq taytaykichis hina kani.

¹⁶Chaymi valekuykichis ñoqamanta yachaqakunaykichispaq.

¹⁷Chayraykun, Señorpi munasqa churiy Timoteota kachamushaykichis, payqa ancha confianzaymi. Paymi yuyarichisunkichis Cristopi iñiq kaspa imaynatachus kawsasqayta, hinantinpi iñiq t'aqakunata yachachisqayman hina.

¹⁸Wakinniykichismi sinchita hatunchakushanku, manapas qankunaman hayk'aqpas watukamuykichismanñachu hinata.

¹⁹Señor munaqtinqa usqhayllan watukamusqaykichis, hinaspan yachasaq chay hatunchakuqkunaq imayna atiyniyoqchus kasqankuta, manataq rimasqallankutachu.

²⁰Diospa kamachikushasqanqa manan rikukun simiwan thawtisqallapichu, aswanpas atiywan ruwasqapin.

²¹¿Mayqentataq munankichis? ¿Chayamuspay qankunata suq'anaytachu munankichis? Icha, ¿munakuywan llamp'u sonqowan hamunaytachu munankichis?